ەلوردالىق جاس كومپوزيتور ديماشقا ءان جازۋدى ارماندايدى

نۇريسلام دوسپاي قازاق ۇلتتىق ونەر ۋنيۆەرسيتەتى جانىنداعى مۋزىكالىق مەكتەپتىڭ 6-سىنىبىندا وقيدى. ول 8 جاسىنان باستاپ ءان جازادى جانە جاقىندا العاشقى اۆتورلىق جيناعىن شىعاردى. نۇريسلام ءتۇرلى حالىقارالىق جارىستارعا قاتىسىپ، ءتۇرلى ماراپاتتاردى يەلەنگەن. جاقىندا ول رەسەي، ۋكراينا، فرانتسيا جانە گرەكيا كومپوزيتورلارى قازىلىق ەتكەن «New music Generation -2019» ءبىرىنشى حالىقارالىق كومپوزيتورلار بايقاۋى «سيمفونيالىق شىعارما» نوميناتسياسىندا جەڭىمپاز اتاندى.

نۇرسيلامنىڭ اناسى شىنار شوقپانوۆا قازاقپارات تىلشىلەرىنە جاس سازگەردىڭ شىعارماشىلىق جولى تۋرالى سۇحبات بەردى.

«شىنىمىزدى ايتساق، ونىڭ اۋەن جازۋعا قابىلەتىن ءوزىمىز دە بايقامادىق. نۇريسلام 1-2 - سىنىپتى نۇر- سۇلتان قالاسىنىڭ №37 ورتا مەكتەبىندە وقىدى. ءبىرىنشى سىنىپتان كەيىن ول مۋزىكالىق مەكتەپتە بارعىسى كەلەتىنىن، مۋزىكانت بولعىسى كەلەتىنىن ايتتى. ءسويتىپ، مۋزىكا مەكتەبىنە قۇجات تاپسىرۋدى ءجون كوردىك. ءبىراق قابىلداۋعا ۇلگەرمەي، كەلەسى جىلعا قالدىق. ەكىنشى سىنىپتا دا نۇرسيلام مۋزىكالىق مەكتەپكە بارعىسىن كەلەتىنىن ايتقاندا، ونى ارنايى ماماندارعا اپارىپ، مۋزىكالىق قابىلەتىن تەكسەرۋدى ۇيعاردىق» ، - دەيدى شىنار شوقپانوۆا.

ارنايى تەكسەرۋلەردەن كەيىن ماماندار بالانىڭ مۋزىكالىق بەيىمىن بايقاپ، تاڭدانىسىن جاسىرماعان. نۇريسلامنىڭ مۋزىكالىق قابىلەتىن 100 پايىزعا باعالاپ، مۋزىكالىق مەكتەپكە اۋىستىرۋعا كەڭەس بەرگەن.

«ەمتيحانداردى ءساتتى تاپسىرعان سوڭ، 8 جاسار بالانى بىردەن 3-سىنىپقا قابىلدادى. وسىمەن ءۇشىنشى جىل نۇريسلام مۋزىكالىق مەكتەپتە وقىپ ءجۇر. ول دەمالىستىڭ نە ەكەنىن ۇمىتتى. جازعى، قىسقى كانيكۋلداردا دا بوساڭسىپ كەتپەۋگە تىرىسادى. ونى مەكتەپتە بارلىعى جاقسى كورەدى. تۋىندىلارىن سىناقتاردا وينايدى. مۇنىڭ بارلىعى ۇلىمنىڭ ەڭبەكقورلىعىنىڭ ارقاسىندا شىعار» ، - دەيدى انا.

نۇريسلامنىڭ ەڭ العاشقى تۋىندىسى «ەكى كوڭىل- كۇي» دەپ اتالادى. وسى شىعارماسى ارقىلى جاس تالانت 2017 -جىلى ع. جۇبانوۆا اتىنداعى بايقاۋدا «جاس كومپوزيتور» اتالىمىندا  1- ورىن العان. بۇل شىعارمانى يتاليالىق، يسپانيالىق ماماندار، كەڭەس دۇيسەكەيەۆ سىندى وتاندىق كومپوزيتورلار جوعارى باعالاعان. 2019 -جىلى نۇريسلام «سامال» حالىقارالىق جاس كومپوزيتورلار بايقاۋىندا گران- پري الىپ، گەرمانيا، يتاليا، يسپانيا، رەسەيدەن كەلگەن قاتىسۋشىلاردى باسىپ وزدى. وسىدان كەيىن بالانى يسپانيا مەن رەسەيدەگى مۋزىكالىق مەكتەپتەر وقۋعا شاقىرعان. ءبىراق، اتا- انا جاس بالانى وزگە ەلدەرگە جىبەرمەۋدى ۇيعارعان.

20 -جىل بۇرىن بەلورۋسسيالىق اقىن ۆلاديمير پەتروۆ «استانا- قازاقستان» ولەڭىن جازعان ەدى. 2018 -جىلى نۇرسيلام وسى ولەڭگە ءان جازىپ، «قازاقستان - ءبىزدىڭ ورتاق ءۇيىمىز» حالىقارالىق فەستيۆالىندە «ۇزدىك ۆوكال» جۇلدەسىن جەڭىپ الدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى