فۋتبول: يسلامبەك قۋات رەسەيدىڭ «ورىنبور» كلۋبىنا اۋىستى

رەسەيدىڭ پرەمەر- ليگاسىندا ونەر كورسەتەتىن «ورىنبور» فۋتبول كلۋبى ي. قۋاتپەن كەلىسىمشارتقا قول قويىلعاندىعىن حابارلادى.

«استانا»، «وقجەتپەس»، «اقتوبە» كلۋبتارىندا دوپ تەپكەن يسلامبەكتىڭ 2014 -جىلدان بەرى الماتىنىڭ «قايراتىندا» ويناعانى بەلگىلى.

ي. قۋات 2015 -جىلدان ۇلتتىق قۇراما ساپىندا ەل نامىسىن دا قورعاپ كەلەدى. سول جىلى 10- قازاندا نيدەرلاندى قاقپاسىنا العاشقى گولىن ەنگىزدى. ءۇش كۇننەن كەيىن ريگادا لاتۆيا قۇراماسىمەن ماتچتا جەڭىس گولىن سوعىپ، ەرەكشە كوزگە ءتۇستى.

«ورىنبور» فۋتبول كلۋبىنا ەركىن اگەنت رەتىندە اۋىسقان 26 جاستاعى ي. قۋاتتى Transfermarkt.de سايتى 2 ميلليون ەۋروعا باعالاپ وتىر (ءسويتىپ ول اتالمىش كلۋبتىڭ ەڭ قىمبات ويىنشىلارىنىڭ بىرىنە اينالدى).

يسلامبەككە جاڭا كوماندا قۇرامىندا ءسىڭىسىپ كەتۋ وڭايعا تۇسپەسى انىق. «ورىنبور» كلۋبى تۋرنير كەستەسىندە 18 تۋردان كەيىن 19 ۇپايمەن 14-ورىندا كەلەدى. وتكەن ماۋسىمدا ورىنبورلىقتار چەمپيوناتتى جەتىنشى ورىندا اياقتاعان بولاتىن. ەندى بيىل تومەنگى توپقا ءتۇسىپ قالماۋ ءۇشىن كوماندا بارىن سالاتىنى بەلگىلى.

قازىرگى كەزدە رەسەيلىك كلۋبتار قىسقى دەمالىستا. وسى قاڭتار ايىندا وقۋ- جاتتىعۋ جيىندارىنان كەيىن 28 - اقپاندا كوكتەمگى تۋرلار باستالادى.

ەسكە سالا كەتەيىك، بۇدان بۇرىن «قايراتتىڭ» وقۋ- جاتتىعۋ جيىنى كەزىندەگى قارسىلاستارى بەلگىلى بولعانىن جازعان ەدىك.

اۆتور ەلجان ەرالى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى