ەلجان ءبىرتانوۆ ۇشاق اپاتىنان زارداپ شەككەن ناۋقاستىڭ جاعدايىن ءبىلىپ قايتتى

دەپ حابارلايدى قازاقپارات ءمينيستردىڭ Facebook پاراقشاسىنا سىلتەمە جاساپ.

«بۇگىن تاڭەرتەڭ ەلورداداعى تراۆماتولوگيا جانە ورتوپەديا عىلىمي- زەرتتەۋ ينستيتۋتىنا باردىم. ورتالىقتا الماتى ماڭىنداعى ۇشاق اپاتىنىنان زارداپ شەككەن ادام جاتىر. ول كەشە ساعات 14:40-تا ساناۆياتسيامەن جەتكىزىلدى»، - دەپ جازدى ەلجان ءبىرتانوۆ.

ونىڭ ايتۋىنشا، زارداپ شەككەن ايەلدىڭ جاعدايى ورتاشا اۋىر، كوپ جاراقات العان جانە كوپ قان جوعالتقان.

«ونىڭ ومىرىنە قاۋىپ ءتونىپ تۇرعان جوق. ورتالىق ماماندارى بارلىق قاجەتتى تەكسەرۋدەن وتكىزىپ، وتا جاساۋعا دايىندادى. ۇلتتىق تراۆماتولوگيا جانە ورتوپەديا ورتالىعىنىڭ ديرەكتورى، پروفەسسور نۇرلان باتپەنوۆتىڭ قاتىسۋىمەن وتا ارقىلى ەمدەۋدىڭ ءبىرىنشى كەزەڭى جۇزەگە استى. قازىرگى ۋاقىتتا NIIITO ديرەكتورى، پروفەسسور نۇرلان باتپەنوۆتىڭ قاتىسۋىمەن وتا جاساۋ ارقىلى ەمدەۋدىڭ ءبىرىنشى كەزەڭى جۇزەگە استى»، - دەيدى مينيستر.

ۇشاق اپاتىنان زارداپ شەككەندەردىڭ بارلىعىنا قاجەتتى ەم كورسەتىلگەنىن ايتا كەتۋ كەرەك.

«وعان رەسپۋبليكالىق عىلىمي- زەرتتەۋ ينستيتۋتتار مەن ورتالىقتاردىڭ ۇزدىك ماماندارى تارتىلدى. زارداپ شەككەندەردىڭ جاعدايى مەنىڭ جەكە باقىلاۋىمدا»، - دەيدى ول.

سونداي- اق، مينيستر اتالمىش ورتالىقتىڭ جانساقتاۋ جانە ينتەنسيۆتى تەراپيا بولىمىندە اۋىر جاعدايدا جاتقان تاعى ەكى ناۋقاستىڭ ەمدەۋ كەزەڭىمەن تانىسقان.

«ونىڭ ءبىرى - جول اپاتىنان جاراقات العان 1961 -جىلعى ايەل. ول ورتالىققا ساناۆياتسيامەن جەتكىزىلگەن. ناۋقاستىڭ جاعدايى ورتاشا اۋىر، جاقسارۋ ءۇردىسى بايقالادى. رەانيماتسيادان مامانداندىرىلعان بولىمگە اۋىستىرۋ جوسپارلانىپ جاتىر. جامباس سۇيەكتەرىنە وتا جاسالادى. ءۇشىنشى ناۋقاس - 2019 -جىلدىڭ 29 - جەلتوقسانىندا وتە اۋىر جاعدايدا اۋرۋحاناعا تۇسكەن. ول دا جول- كولىك وقيعاسىنان جاراقات العان. قارقىندى تەراپيا جۇرگىزىلەدى»، - دەپ جازدى ەلجان ءبىرتانوۆ Facebook پاراقشاسىنا.

اۆتور: زارينا قاھارمان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى