اقتاۋدا تەڭىزگە سەكىرگەن جىگىتتى دارىگەرلەر امان الىپ قالدى

بەلگىلى بولعانداي، سپيرتتىك ىشىمدىك ىشكەن 30 جاستاعى قالا تۇرعىنى كاسپي تەڭىزىنە سەكىرىپ، سۋعا باتىپ كەتە جازداعان، دەپ حابارلايدى egemen.kz سايتى ماڭعىستاۋ وبلىستىق دەنساۋلىق ساقتاۋ باسقارماسى باسپا ءسوز قىزمەتىنە سىلتەمە جاساپ.

وقيعا اقتاۋ قالاسىندا 4-شاعىناۋدانداعى «تاستاقتى سوقپاق» (سكالنايا تروپا) اۋماعىندا ورىن العان. «جەدەل جاردەم» بريگاداسى وقيعا ورنىنا 4 مينۋتتا جەتكەن.

الدىن الا «اسپيراتسيالىق سيندروم» دياگنوزى قويىلعان. باسپا ءسوز قىزمەتىنىڭ مالىمەتىنشە، بريگادا قۇرامىندا بولعان دارىگەر ايگەرىم سالي مەن فەلدشەر سامات تەمىرحانوۆتىڭ جەدەل ارەكەت ەتۋىنىڭ جانە كاسىبيلىگىنىڭ ارقاسىندا تەڭىزگە باتۋعا ءسال قالعان ازامات امان قالدى.

«جەدەل جاردەم» بريگاداسى كەلە سالىسىمەن الگوريتم بويىنشا 10 مينۋت ىشىندە جۇرەك-وكپە قىزمەتىنە رەانيماتسيا جاسادى. شۇعىل ارەكەتتىڭ ارقاسىندا بەتى بەرى قاراعان جىگىت وبلىستىق اۋرۋحاناعا جەتكىزىلدى. اۋرۋعا ينەمەن تامشىلاتىپ ءدارى ەنگىزىلدى، جالپى قان تالداۋى، بيوحيميا، قۇرساق قۋىسىنا ۋزي جاسالىندى.

حيرۋرگ- تەراپيەۆت جانە تراۆموتولوگ قاراپ، قاجەتتى ءدارى-دارمەگىن جازىپ بەرگەن سوڭ اۋرۋحانادا جاتىپ ەم الۋدان باس تارتىپ، ءوز ەركىمەن ۇيىنە قايتىپ كەتكەن.

ايتا كەتۋ كەرەك، نە سەبەپتى ونىڭ سۋعا سەكىرگەنى ازىرگە بەلگىسىز جانە بۇل ماسەلەنىڭ ءمان-جايىن ەندىگى جەردە پوليتسيا ورگاندارى انىقتاماق.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى