گرۋزيادا قازاق مەيرامحاناسى اشىلدى
گرۋزيادا تۇراتىن قازاقستان ازاماتتارى بۇل جاڭالىقتى قۋانا قابىلداپ، الەۋمەتتىك جەلىلەردە بولىسۋدە. ولار مەيرامحانا جىراقتا جۇرگەن جەرلەستەر باس قوساتىن ورىنعا اينالعانىن ايتادى. ال وندا اسپازشى بولىپ گرۋزين ايەلى جۇمىسى ىستەيدى.
«ءتۇرلى ءدامحانالاردا ىستەدىم، ليۆاندىق، ۋكراينالىق، گرۋزيالىق. قازاق مەيرامحاناسى اشىلاتىنىن ەستىپ، وسىندا جۇمىسقا ورنالاسۋعا كەلدىم. جاڭا تاعامداردى تانىپ ءبىلۋدى ۇناتامىن. وسىندا مەنى قازاق اسپازشى ۇيرەتتى. بۇل گرۋزيا تاعامدارىنان ەرەكشە: قوي مەن جىلقى ەتى، جالپى كوپ مولشەردە ەت پەن پياز سالادى. ماعان ۇنايدى.
مەيرامحانانى قازاقستاننان كەلگەن ءۇش جاس ادام اشتى. ۇلتتىق تاعامدارىنىڭ ءدامىن ساعىنعاندىقتان، وسىنداي قادامعا بارعانىن ايتادى. گرۋزيادا كەزدەسپەيتىن ءونىمدى، مىسالى جىلقى ەتىن وتانىنان اكەلەدى»، - دەيدى اسپازشى نينو كۋركۋنۋلي.
ال مەيرامحانا يەسىنىڭ سوزىنشە، مەيرامحاناعا جەرگىلىكتى تۇرعىندار دا اعىلىپ جاتىر.
«بۇل ءدامحانانى ەڭ الدىمەن گرۋزيادا تۇراتىن قازاقتار ءۇشىن اشتىق. ولاردان باسقا جاڭا تاعامدارعا قىزىققان جەرگىلىكتى تۇرعىندار كوپتەپ كەلەدى. ولارعا قازاقشا ەت پەن باۋىرساقتار وتە ۇنايدى. مانتىنى وزدەرىنىڭ ۇلتتىق تاعامى - حينكاليمەن سالىستىرادى. اشىلعانىنا ەكى-اق اي وتسە دە، مەيرامحانا تابىستى جۇمىس ىستەپ كەلەدى. ال تاۋەلسىزدىك كۇنىندە بۇل جەردە وتانداستارىمىز باس قوستى»، - دەيدى ەركەش بايمۇحامبەت.
ال تبيليسي تۇرعىنى ايگۇل قويشىمانوۆا قازاقتاردىڭ جەلىدە جەكە توبى بار ەكەنىن ايتادى.
«تبيليسيدە تۇراتىن قازاقتاردىڭ جەلىدە ءوز توبى بار، وسىلاي جاڭا مەيرامحانا اشىلعانىن بىلدىك. تاۋەلسىزدىك كۇنىندە وسىندا كەزدەسۋدى شەشتىك. ادام كوپ بولدى، بارلىعى بالالارىن ەرتىپ كەلدى. وسىلاي مەيرامدى اتاپ وتتىك. بولاشاقتا دا وسىندا جينالىپ، ءوزارا ارالاسامىز دەپ ۇيعاردىق. مەيرامحانا اكىمشىلىگى ۇمىتىلىپ كەتكەن تاعامداردى قايتا جاڭعىرتىپ، وزىندىك اس ءمازىرىن كەڭەيتۋدى كوزدەپ وتىر»، - دەيدى ول.
ايتا كەتەيىك، وڭتۇستىك كورەيادا ەكى جىلدان بەرى تۇراتىن ساۋلە قوساقايەۆا «شىرايلى شىمكەنت» اتتى ءدامحانا اشقان. عيمارات ماڭدايشاسىندا شىمكەنت قالاسىنىڭ تاڭباسى مەن قازاقستان مەن تمد ەلدەرىنىڭ تۋلارى ىلىنگەن.
ءدامحانا زالىندا قازاقتىڭ ەسترادالىق مۋزىكاسى ويناپ تۇرادى، ال داستارحانعا شىمكەنتتىڭ كاۋابى مەن سامساسى قويىلادى.
سونداي-اق، ەلىمىزدىڭ باس قالاسى نۇر-سۇلتاندا ديماش قۇدايبەرگەننىڭ جانكۇيەرلەرىنە ارنالعان ەرەكشە مەيرامحانا اشىلدى.
