ا ق ش ەلشىسى: قازاقستان مەنى تاڭقالدىرىپ كەلەدى
«2019 -جىلدىڭ ناۋرىز ايىندا قازاقستانعا ەلشى بولىپ كەلگەندە مەنى تاڭعاجايىپ تاجىريبە كۇتىپ تۇرعانىن ءبىلدىم. بيىل قازاقستان مەن ا ق ش تىعىز ىنتىماقتاستىعىن دالەلدەيتىن كوپتەگەن باعدارلامالار مەن شارالارعا قاتىسۋ مارتەبەسىنە يە بولدىم. قازاقستاننىڭ تاۋەلسىزدىگىن مويىنداعان العاشقى مەملەكەت رەتىندە ا ق ش جارىق بولاشاق جولىندا قولداۋ كورسەتۋگە دايىن. سوڭعى 10 ايدا قازاقستاننىڭ تۇكپىر- تۇكپىرىندە، وسكەمەندە، اتىراۋدا، ورالدا، پەتروپاۆل مەن شىمكەنت سىندى ءتۇرلى قوناقجاي قالالاردا بولدىم» ، - دەدى ۋيليام موزەر Facebook جەلىسىندە جاريالانعان قۇتتىقتاۋىندا.
سونىمەن بىرگە، ديپلومات ەلىمىزدەگى كورىكتى ورىندارعا بارۋ جونىندە كەڭەس بەرگەن قازاقستاندىقتارعا العىس ايتتى.
«ءالى تالاي قىزىقتى ورىنداردى كورۋىم كەرەك، سىزدەردىڭ اقىل- كەڭەستەرىڭىز وتە قاجەت. قازاقستان مەنى تاڭقالدىرىپ كەلەدى. اسىرەسە، كاسپي تەڭىزىنىڭ سۇلۋلىعى، شارىن شاتقالىنىڭ ەرەكشەلىگى تاڭداي قاقتىرادى. 2020 -جىلى دا مەملەكەتتەرىمىز اراسىنداعى دوستىقتى نىعايتۋعا ىقپال ەتەمىز دەپ ۇمىتتەنەمىن. جاڭا جىل قۇتتى بولسىن!» ، - دەدى ۋ. موزەر.
