پەداگوگ مارتەبەسى تۋرالى زاڭ ورىندالۋى ءۇشىن قوعام بولىپ بەلسەندىلىك تانىتۋىمىز كەرەك - مينيستر
بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىندا جازدى، دەپ حابارلايدى قازاقپارات ءتىلشىسى.
«مەملەكەت باسشىسى قاسىم-جومارت توقايەۆ «پەداگوگ مارتەبەسى تۋرالى» زاڭعا قول قويدى. بارلىق ۇستازدار قاۋىمىن وسىنداي تاريحي شەشىمنىڭ قابىلدانۋىمەن قۇتتىقتايمىن! وزدەرىڭىز بىلەتىندەي، پرەزيدەنت بيىلعى تامىز كەڭەسىندە جانە جولداۋىندا وسى زاڭنىڭ اياسىندا ۇستازداردىڭ جالاقىسىن ەكى ەسە ءوسىرۋ، مۇعالىمدەردىڭ جۇكتەمەسىن ازايتۋ، وزىنە ءتان ەمەس جۇمىستاردان بوساتۋ ماسەلەلەرىن قاراستىرۋدى تاپسىرعان بولاتىن. ەلباسىمىز ن. نازاربايەۆتىڭ وسى زاڭدى دايارلاۋ بويىنشا ۇستازداردىڭ جاعدايىن جاقسارتۋ، قاعازباسىلىقتان، ورىنسىز ەسەپتىلىكتەن بوساتۋ جانە دە تاعى دا باسقا وزەكتى تاپسىرمالارى تولىعىمەن قامتىلدى. «پەداگوگ مارتەبەسى تۋرالى» زاڭ 21 باپتان تۇرادى جانە جارتى ميلليوننان استام ۇستازدىڭ جۇمىسىنا قاتىستى. جالپى زاڭ ءتورت باعىتتى قامتيدى: ءبىرىنشى - ۇستازداردىڭ قۇقىقتارىن كەڭەيتۋ جانە وزىنە ءتان ەمەس جۇمىستان بوساتۋ، جۇكتەمەسىن ازايتۋ؛ ەكىنشى - مۇعالىمنىڭ قىزمەتىنە قويىلاتىن تالاپتاردى كۇشەيتۋ؛ ءۇشىنشى - ماتەريالدى ەمەس ستيمۋل تەتىكتەرى؛ ءتورتىنشى - ماتەريالدىق ىنتالاندىرۋ»، - دەپ جازدى مينيستر.
سونىمەن قاتار ول پەداگوگ جۇمىسىن ىنتالاندىرۋعا باعىتتالعان نەگىزگى شارالارعا توقتالدى. ونىڭ دەرەگىنشە، 2020-جىلى جالاقى 25 پايىز ءوسىپ، 4 جىل ىشىندە ەكى ەسە ارتادى. جاڭا جۇيە بويىنشا ەندى بالاباقشا، كوللەدج پەداگوگتارى دا بىلىكتىلىك ساناتى ءۇشىن لاۋازىمدىق جالاقىدان 30 بەن 50 پايىز ارالىعىندا قوسىمشا اقى الادى. پەداگوگ مىندەتىنە جاتپايتىن فۋنكتسيالارعا تارتۋدان قورعاۋ، ورىنسىز ەسەپتىلىكتەن بوساتۋ، پەداگوگتەردىڭ بالالارىنا تۇرعىلىقتى جەرى بويىنشا مەكتەپكە دەيىنگى ۇيىمدارعا ءبىرىنشى كەزەكتە ورىن بەرۋ، تالىمگەرلىك ءۇشىن مەكتەپ مۇعالىمدەرىنە ءار اي سايىن قوسىمشا اقى ( 17 مىڭ تەڭگە) ەنگىزىلەدى. 2021-جىلدان باستاپ مەكتەپ مۇعالىمدەرىنە ءبىر ستاۆكا ءۇشىن سانالاتىن وقۋ جۇكتەمەسىن 18 ساعاتتان 16 ساعاتقا دەيىن تومەندەيدى.
عىلىمي-پەداگوگيكالىق باعىتتاعى ماگيستر دارەجەسى ءۇشىن ءار اي سايىن مەكتەپ ۇستازدارىنا 10 ا ە ك (25,5 مىڭ تەڭگە) مولشەرىندە ۇستەمە اقى تولەنىپ، سىنىپ جەتەكشىلىگى جانە داپتەر تەكسەرگەنى ءۇشىن تولەنەتىن اقى ەكى ەسەگە ارتادى. بىلىكتىلىك ساناتى ءۇشىن مەكتەپ ديرەكتورلارى مەن ولاردىڭ ورىنباسارلارىنىڭ جالاقىسىن 30 دان 100 پايىزعا دەيىن قوسىمشا اقى تولەپ ارتتىرۋ قولعا الىنادى. اسكەري قىزمەتكە شاقىرۋ كەيىنگە قالدىرىلادى. حالىقارالىق كونكۋرستتار مەن جارىستاردىڭ جەڭىمپازدارىن، ءتۇرلى وليمپيادالارمەن سپورتتىق جارىستاردىڭ لاۋرەاتتارىن دايارلاعان پەداگوگتەرگە 3 لاۋازىمدىق جالاقىعا دەيىن ءبىرجولعى سىياقى تولەنەدى .
«قازاقستاننىڭ ەڭبەك سىڭىرگەن ۇستازى» مەملەكەتتىك ماراپات تاعايىندالادى جانە يەگەرلەرىنە 1000 ا ە ك مولشەرىندە ءبىرجولعى سىياقى بەرىلەدى. 42 كۇن دەمالاتىن پەداگوگتەردىڭ دەمالىس ۋاقىتى 56 كۇنگە ۇزارتىلادى. تاعا دا باسقا جاڭا باستامالار قاراستىرىلعان.
«ەڭ باستىسى زاڭ قارجىمەن تولىعىمەن قامتاماسىز ەتىلدى. جالپى، 2024-جىلعا دەيىن 5 تريلليون 3 ميلليارد تەڭگە وسى نورمالاردى جۇزەگە اسىرۋ ءۇشىن بيۋجەتتەن بولىنەدى. بۇدان باسقا، ىلەسپە زاڭدا اتا-انانىڭ جاۋاپكەرشىلىگىن ارتتىرۋ، بالا قۇقىعىن قورعاۋ، ۇستازدارعا ادەپسىز مىنەز-قۇلىق كورسەتكەنى ءۇشىن، ورىنسىز ەسەپتىلىك، قاعازباسىلىق، زاڭسىز تەكسەرىستەر ءۇشىن ناقتى سانكسيالار، ياعني ايىپپۇلدار قاراستىرىلدى. ەندىگى كەزەكتە، زاڭ تالاپتارىنىڭ ورىندالۋى بارىسىندا قوعام بولىپ بەلسەندىلىك تانىتۋىمىز كەرەك. ەلىمىزدەگى مۇعالىمدەردىڭ بەدەلىن، ابىرويىن ارتتىرۋعا ۇلكەن مۇمكىندىك بەرەتىن جاڭا زاڭ ۇستازدارىمىزدىڭ مەرەيىن ءوسىرىپ، مارتەبەسىن ارتتىرا تۇسەتىنىنە سەنىمدىمىن. مينيستىرلىك زاڭنىڭ ورىندالۋىن تىكەلەي باقىلاۋىندا ۇستايدى. جالپى، اتالمىش زاڭ ءبىلىم ساپاسىنىڭ ارتۋىنا تىكەلەي اسەر ەتەتىن بولادى»، - دەدى اسحات ايماعامبەتوۆ.
