ب ۇ ۇ باس حاتشىسى جاستارعا ۇندەۋ جولدادى
«ءبىز 2020 -جىلعا بەلگىسىزدىك پەن قاۋىپتى جاعدايدا، تامىرى تەرەڭگە كەتكەن تەڭسىزدىك پەن وشپەندىلىك ورشىگەن، الەمدەگى اسكەري قاقتىعىستار مەن جەر شارىمىز جىلىنىپ بارا جاتقان مەزەتتە اياق باسقالى وتىرمىز. كليماتتىڭ وزگەرۋى - ۇزاقمەرزىمدى سيپاتتاعى پروبلەما عانا ەمەس، ايقىن ءارى تىكەلەي قاۋىپكە اكەپ سوعاتىن احۋال. جەر شارىن ءورت شارپىپ جاتقان ۋاقىتتا بوس سوزبەن قول قۋسىرىپ وتىرعان بۋىن بوپ قالۋىمىزعا جول بەرمەۋىمىز كەرەك»، - دەيدى ۆيدەجولداۋىندا انتونيۋ گۋتەرريش.
ب ۇ ۇ باس حاتشىسى دەسە دە ءالى ءۇمىت بار ەكەنىن اتاپ ءوتتى.
«مەن وسىناۋ جاڭا جىلدىق جولداۋىمدى وسى ءۇمىتتىڭ سۇيەنىشى - بۇكىل الەم جاستارىنا ارناعىم كەلەدى. كليماتتىڭ وزگەرۋىنە مەن گەندەرلىك تەڭدىكتەن باستاپ الەۋمەتتىك ادىلەتتىلىك پەن ادام قۇقىقتارىن ساقتاۋعا دەيىنگى كۇرەستە ءسىزدىڭ بۋىن «الدىڭعى قاتاردا» ءارى باستى نازاردا تۇر. مەن سىزدەردىڭ ىنتا مەن باتىلدىعىڭىزعا تامسانامىن. سىزدەر ادىلەتتى تۇردە بولاشاق قۇرىلىمىن جاساۋعا قاتىسۋدى تالاپ ەتىپ وتىرسىزدار. مەن سىزدەردى تولىق تۇسىنەمىن. بىرىككەن ۇلتتار ۇيىمى سىزدەردىڭ جاعىڭىزدا، ول - سىزدەردىڭ ۇيىمىڭىز»، - دەيدى ول.
انتونيۋ گۋتەرريش 2020 -جىلى بىرىككەن ۇلتتار ۇيىمىنىڭ قۇرىلعانىنا 75 جىل تولاتىنىن ەسكە سالدى.
«ءبىز تۇراقتى دامۋ تۇرعىسىندا ماقساتتارعا جەتۋ بويىنشا ون جىلدىق ءىس-قيمىلدارعا - ادىلەتتى جاھاندانۋ مۇددەسى ءۇشىن ارەكەت جوسپارىنا كىرىسكەلى وتىرمىز. الەم جاستاردىڭ ءوز ويىن اشىق بىلدىرۋىنە مۇقتاج. اۋقىمدى تۇردە وي ءوربىتىپ، جاڭا كوكجيەكتەردى اشا بەرىڭىزدەر. تاباندىلىقتى السىرەتپەڭىزدەر. 2020 -جىلى مەن سىزدەرگە باقىت پەن تىنىشتىق تىلەيمىن. راحمەت!»، - دەدى ب ۇ ۇ باس حاتشىسى.
اۆتور: ايان بەكەن ۇلى
