ۇشاق قۇلاعان ءۇي يەسىنىڭ اعاسى شىندىقتى ايتتى
ول قيراعان ءۇيى ءۇشىن ءىنىسىنىڭ وتەماقى ەش سۇراماعانىن، ءتىپتى ونى ويلاماعانىن دا ايتتى.
بۇل تۋرالى قايسار قاۋىمبەك ءوزىنىڭ Facebook الەۋمەتتىك جەلىسىندەگى پاراقشاسىندا جازدى. ايتۋىنشا، جۋرناليستەر ىنىسىنەن سۇحبات العان. ول جەردە ءتورتىشى بيلىك وكىلىنىڭ قايعىلى جاعداي كەزىندە ودان وتەماقى تۋرالى سۇراعانىنا قىنجىلاتىنىن جەتكىزدى.
«Bek Air ۇشاعى سوقتىعىسقان ءۇي مەنىڭ تۋعان جيەنىمە تيەسىلى. اپايىمنىڭ ۇلىنىڭ ءۇيى. بۇل ءۇي سۋ، گاز بولماعاندىعى ءۇشىن بىرنەشە جىلدان بەرى يەن تۇرعان بولاتىن. وزدەرى شەلەك اۋدانىندا ءۇي جالداپ تۇرىپ جاتقان. تاڭ الدىندا اۋىلدىق اكىمشىلىكتەن حابارلاسىپ، ءۇي ورنىندا اپاتتى جاعداي بولعانىن ايتقاندا مۇلدەم سەنبەپتى. سالدەن كەيىن Whatsapp جەلىسىنە سۋرەتتەر جىبەرگەندە عانا بارىپ سەندىم دەپ وتىر. ءۇيدىڭ قۇجاتتارىن الىپ، شتابقا جەتۋىن ايتقان. الەۋمەتتىك جەلىدەگى قارالى حابارلاردان كەيىن نە ىستەرىن بىلمەي ساسقالاقتاپ قوڭىراۋ شالىپ «مەنى شاقىرىپ جاتىر، بىرگە بارساڭىزدار» دەدى. ارينە، ءبىزدىڭ دە جۇرەگىمىزدى قان جىلاتىپ تۇرعانى ءۇي ەمەس، ۇشاق اپاتىنان زارداپ شەككەندەردىڭ قازاسى مەن قاسىرەتى ەدى. شىنىن ايتقاندا جۇرت قارا جامىلىپ جاتقان جەرگە جەتىپ بارۋدىڭ ءوزى قيىن ەكەن. باردىق، كوردىك. ءبىز بارعاندا اۋەلى جاقىنداتپادى. كەيىن ءۇي يەسىنىڭ اعاسى ەكەن دەگەن سوڭ عانا ىشكە جىبەردى» ، - دەپ جازدى ول.
ونىڭ ايتۋىنشا، وسى ساتتە ءىنىسىنىڭ جۋرناليستەرگە سۇحبات بەرۋگە شاماسى بولماعان. ءتىپتى قازىر دە وتەماقى ويلايتىن شاماسى جوقتىعىن ايتادى. ونى اكىمدەر مەن Bek Air كومپانياسى شەشە جاتار دەيدى.
«بۇل كەزدە ريشاتتىڭ اينالاسىندا كىلەڭ سول جەردەگى بيلىكتەگىلەر. جۋرنالسيتەرگە سۇحبات بەرمەۋىن، وزدەرى كەلىسىپ شەشەتىندەرىن قايتا- قايتا تاپسىرىپ، ابدەن سانسىراتىپتى. ءبىز قاسىنا بارىپ تۇرعاندا دا ولار ريشاتتى قايتا- قايتا شاقىرىپ اكەتىپ، مازالاپ تۇردى. جۇزدەرىندە قايعىدان گورى ۇرەي مەن الاڭ باسىم. ال جيەنىم «ماعان باتىپ تۇرعانى ءۇيدىڭ قيراعانى ەمەس، ون بەس ادام قايتىس بولدى دەيدى جانە بۇل جاعداي مەنىڭ ءۇيىمنىڭ اۋلاسىندا بولعانى» دەپ ەگىلىپ وتىر. وسى ءۇشىن دە ول سول جەردەگى جۋرناليستەرگە سۇحبات بەرۋدەن ىڭعايسىزدانىپ، قاشىپ ءجۇردى. مەن ونى ءتۇسىنىپ ءھام قارا باسىن كۇيتتەمەگەن ازاماتتىعىنا ريزا بوپ تۇردىم. جاراس نيازبەك دوسىم ءۇي يەسىنىڭ سۇحبات بەرۋىن، ءۇي جانە قۇجاتتار تۋرالى عانا سۇراق قوياتىنىن ايتىپ ەدى.
اۋىل اكىمى جۋرناليستەردى قاقپايلاپ، ريشاتتى كولىگىنە سالىپ الىپ كەتتى. ودان كەيىن ونى ءبىز دە كورمەي قالدىق. ال، كەشەگى بەلگىلى اقپاراتتىق سايتتاردىڭ «ۇيىنە ۇشاق قۇلاعان ازامات وتەماقى تولەنبەي مە دەپ قاۋىپتەنەدى» دەپ ايعاي- سۇرەننىڭ تاقىرىبىن قويىپ، قارالى ەلدىڭ اشۋ- ىزاسىن سول جىگىتكە بۇرىپ جاتقانىنا نە ايتۋعا بولادى. مارقۇمداردىڭ سۇيەگى سۋىماي تۇرىپ، ءۇيدىڭ يەسىن تولەم اقى تۋرالى اڭگىمەگە تارتۋ جۋرناليستيكالىق ەتيكا تۇگىلى ادامدىق بولمىسىمىزعا دا سىن ەمەس پە؟ ! بۇل جاعدايدا ول دا زارداپ شەگۋشى ەسەبىندە. تولەم اقى بەرىلەر، بەرىلمەس. ونى سول جەردەگى «ۋايىم- قايعى باسىپ» جۇرگەن اكىمدەر مەن Bek Air كومپانياسى شەشە جاتار»، - دەپ جازدى قايسار قاۋىمبەك.
ۇشاق اپاتىنان كەيىن ءۇيدىڭ يەسى كەيىننەن حالىققا ۇندەۋ جاسادى. ول مۇلدەم وتەماقى سۇراماعانىن، ءتىپتى قيراعان ءۇيى ءۇشىن ەسەپتەسكىسى كەلمەيتىنىن ايتقان.
