ش ى ۇ بەيجىڭدە وزبەكستاننىڭ مادەنيەت كۇنىن وتكىزدى
شارا شاڭحاي ىنتىماقتاستىق ۇيىمىنا مۇشە ەلدەردىڭ مادەني- گۋمانيتارلىق بايلانىسىن نىعايتۋ، ولاردىڭ ءداستۇرى، سالتىمەن تانىسۋ ماقساتىندا «ش ى ۇ - ءبىزدىڭ ورتاق ءۇيىمىز» جوباسى اياسىندا ءوتتى.
ش ى ۇ باس حاتشىسى ۆلاديمير نوروۆ جوبا ماقساتى - كوپ جىلدار بويى حالىقتار دوستىعىنا، ءبىلىم الماسۋ مەن مادەنيەتىمەن تانىسۋعا قىزمەت ەتىپ كەلە جاتقان ۇلى جىبەك جولىنىڭ باعىتىمەن ۇقساس ەكەنىن اتاپ ءوتتى.
«بۇل قىتايدان ەۋروپاعا، افريكا مەن ءۇندىستان ەلدەرىنە دەيىن سوزىلعان، شاڭحاي ىنتىماقتاستىق ۇيىمىنىڭ ورتالىعى سانالاتىن ورتالىق ازيا ارقىلى وتەتىن اۋقىمدى ساۋدا جانە مادەنيەت ارتەرياسى»، - دەدى ول.
ۆ. نوروۆ ەلدەر اراسىنداعى وركەنيەتارالىق ديالوگتى دامىتۋعا «ش ى ۇ- نىڭ سەگىز عاجايىبى» جوباسى ۇلكەن ۇلەس قوستى دەيدى. بۇل جوبا ءبىرىڭعاي تۋريستىك كەڭىستىك ورناتۋعا باعىتتالعان.
«ۇلى جىبەك جولى شىۇ- نا مۇشە ەلدەرگە ماتەريالدىق قۇندىلىقتار سىيلاپ قانا قويماي، ادامزات دامۋىنا ىقپال ەتەتىن ءتۇرلى ەلدەر مەن حالىقتاردىڭ گۋمانيستىك ءداستۇرىن بىرىكتىردى. قازىرگى كۇنى شىۇ - ءارتۇرلى تاريحي مادەنيەتى بار جانە ۇلتتىق ءداستۇرى بولەك ەلدەردىڭ ۇيلەسىمدى جۇمىس ىستەپ جاتقانىنىڭ ۇلگىسى»، - دەپ اتاپ ءوتتى وزبەكستاننىڭ مادەنيەت ءمينيسترى باحتيەر سايفۋللايەۆ.
شارا بارىسىندا قىتاي استاناسىنىڭ تۇرعىندارى يۋنەسكونىڭ الەمدىك مۇرالار تىزىمىنە ەنگەن ەجەلگى بۇقارا ەسكەرتكىشتەرى تۋرالى اقپارات الدى.
بۇقارا قالاسىنىڭ ونەر ۇجىمدارى كونسەرت جانە ءداستۇرلى ونەر كورمەسىن ۇيىمداستىردى. سونىمەن قاتار، كەلگەن قوناقتار وزبەك ۇلتتىق اسحاناسىنان ءدام تاتتى.
سالتاناتتى شاراعا قازاقستان، وبەكستان، قىرعىزستان، رەسەي، تاجىكستان، پاكىستان، اۋعانستان، تۇركيا جانە ازەربايجان ەلدەرىنىڭ ەلشىلەرى قاتىستى.
ەستەرىڭىزگە سالا كەتەيىك، «ش ى ۇ - ءبىزدىڭ ورتاق ءۇيىمىز» جوباسى اياسىندا بەيجىڭدەگى قازاقستاننىڭ مادەنيەت كۇندەرى 2016-جىلدىڭ جەلتوقسان ايىندا بولعان.
