اتىراۋدا براكونەرلەردى تىكۇشاقتىڭ كومەگىمەن قولعا ءتۇسىردى
«اتىراۋلىق پوليتسەيلەر بالىق قورعاۋ قىزمەتكەرلەرىمەن بىرلەسىپ تىكۇشاق ارقىلى كاسپي تەڭىزىنىڭ جاعالاۋىن بارلاي ۇشقان كەزىندە مۇز ۇستىندە تۇرعان موتوسيكلدەردى كورگەن. ولار بالىق اۋلاۋعا تىيىم سالىنعان اۋماقتا بولعان. موتوسيكلدەردىڭ قاي جەردە تۇرعانى پوليتسەيلەرگە حابارلانعان. دابىل جەتكەن ساقشىلار كاسپي تەڭىزىنىڭ سولتۇستىك بولىگىندەگى كامەننىي جارتى ارالىنا شۇعىل اتتانعان. ارادا كوپ ۋاقىت وتپەي، قالا ماڭىنداعى كەنتتەردىڭ ءبىرىنىڭ ءۇش تۇرعىنى ۇستالدى. موتوسيكلدەر قالاعا جەتكىزىلىپ، ايىپ تۇراعىنا قويىلدى»، - دەپ حابارلادى ايماقتىق پ د باسپا ءسوز قىزمەتى.
ۇستالعاندار اكىمشىلىك جازاعا تارتىلدى.
