تارازدا ورتاعاسىرلىق شىعىس ۇلگىسىندە سالىنعان الىپ كەشەن اشىلدى

 ورتا ازيادا بالاماسى جوق الىپ كەشەندى تارازدىڭ 2000 جىلدىق تاريحىن قايتا تىرىلتكەن «عاجايىپ ساۋلەت قۇرىلىسى» دەپ اتاۋعا تولىق نەگىز بار، دەپ حابارلايدى قازاقپارات.

مىڭجىلدىقتاردىڭ كۋاسى كيەلى ولكەنىڭ رۋحانياتىن وياتىپ، رۋحىن اسقاقتاتقان، مەرەيىن ءوسىرىپ، مازمۇنىن ارتتىرعان جوبا جامبىلدىقتار ءۇشىن تەڭدەسىز تارتۋ بولعانى ءسوزسىز.

بارلىق قۇرىلىس بارىسى ورتا عاسىرلىق شىعىس ساۋلەت ستيلىندە جۇرگىزىلگەن كەشەن 2000 جىلدان اسا تاريحى بار تاراز شاھارىنىڭ تاريحي بولمىسىن بارىنشا ايشىقتاي تۇسۋدە. وندا بارلىعى 8 نىسان قامتىلعان. ولار: «رۋحانيات جانە تاريحتانۋ» ورتالىعى، «قولونەر شەبەرلەرىنىڭ گالەرەياسى» ، «كوركەمسۋرەت گالەرەياسى» ، «وبلىستىق تاريحي- ولكەتانۋ مۋزەيى»، «رەترو- فەستيۆال» امفيتەاترى، «كورمە» پاۆيلونى، «ساعات» ستەلاسى، «اربات-2» جاياۋ جۇرگىنشىلەر الاڭى.

 ايتا كەتۋ كەرەك، ۇلتتىق قۇندىلىعىمىزدى بولاشاق ۇرپاققا جەتكىزىپ، تاريحىمىزدى تانىتۋعا باعىتتالعان جوباعا دەمەۋشىلەر دە ءوز ۇلەسىن قوسىپ، قۇرىلىسقا قولداۋ كورسەتۋدە.

«بۇگىندە كەشەندەگى 8 نىسان بويىنشا قۇرىلىس- مونتاج، ارلەۋ- بەزەندىرۋ جۇمىستارى تولىعىمەن اياقتالدى. قۇرىلىس جۇمىستارىنا بارلىعى 1000-نان استام قۇرىلىسشى، 100-دان اسا تەحنيكا جۇمىلدىرىلدى. ارلەۋ جۇمىستارى سامارقاند ستيلىندەگى كىرپىشتەرىمەن جۇرگىزىلۋىنە بايلانىستى وزبەكستاننان ارنايى ماماندار تارتىلدى. ينفراقۇرىلىممەن قامتۋ شارالار دا تيىسىنشە ورىندالعان. جالپى جەتى گەكتارعا جۋىق اۋماقتى قۇرايتىن ورتالىقتاعى قۇرىلىس جۇمىستارى اعىمداعى جىلدىڭ ماۋسىم ايىندا باستالىپ، جەلتوقسان ايىندا مارەسىنە جەتتى»، - دەيدى شتاب باسشىسى راحمانقۇل بايتەليەۆ.

ايتا كەتەيىك، مۇنداعى قۇرىلىسقا قاجەتتى ماتەريالداردىڭ 80 پايىزى وتاندىق ءوندىرىس ورىندارىنان جەتكىزىلسە، قالعانى سامارقان كىرپىشى، «گلازۋر» اتتى توسەنىشتەر قىتاي مەن وزبەكستان مەملەكەتتەرىنەن اكەلىندى. ولارمەن ارنايى كەلىسىمشارت جاسالىپ، ەڭ ساپالى ماتەريالدار پايدالانىلدى. گلازۋر توسەنىشتەرى ارنايى پەشتەردە 1800 گرادۋستا الدىن- الا ولشەممەن دايىندالعان.

جالپى كەشەندەگى نىسانداردىڭ قابىرعالارىن ارلەۋ جۇمىستارىنا 7000 شارشى مەتردەن استام سامارقاند كىرپىشتەرى، 2000 شارشى مەترگە گلازۋر توسەنىشتەرى پايدالانىلعان. ارلەۋگە پايدالانىلعان تراۆەرتين تاستارىنىڭ ەلەمەنتتەرى قىرعىزستاندا ازىرلەنگەن.

سونداي- اق ءار عيماراتتىڭ سىرتقى ارلەۋ- بەزەندىرۋ بارىسى ەرەكشە، ءبىر- بىرىنە ۇقسامايدى. دەگەنمەن كەشەندەگى بارلىق نىساندى بەزەندىرۋ جۇمىستارىنا ايشا ءبيبى كەسەنەسىندە كەزدەسەتىن سەگىز بۇرىشتى ورنەك- بەدەرلەردىڭ پايدالانىلعانىن ايتىپ ءوتۋ كەرەك. ول تاراز قالاسىنىڭ ورتا عاسىرلىق كەلبەتىن قالىپتاستىرۋعا مۇمكىندىك بەرىپ، كەلۋشىلەرگە ايرىقشا اسەر ەتەدى.

اۆتور: عيبرات سەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى