ءبىلىم ساپاسىن كوتەرۋ ءۇشىن مۇعالىمگە جاعداي جاساۋىمىز كەرەك - بەردىبەك ساپاربايەۆ

بۇل تۋرالى بۇگىن ۇكىمەت ۇيىندەگى باسپا ءسوز ءماسليحاتىندا ق ر پرەمەر- ءمينيسترىنىڭ ورىنباسارى بەردىبەك ساپاربايەۆ ايتتى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ بەرگەن تاپسىرماسى بار. ەڭ نەگىزگىسى ءبىز ءبىلىمنىڭ ساپاسىن كوتەرۋىمىز كەرەك. ول ءۇشىن بىرىنشىدەن، مۇعالىمدەرگە جاعداي جاساۋىمىز كەرەك. ەكىنشىدەن، ءبىلىم سالاسىنىڭ ماتەريالدىق- تەحنيكالىق بازاسىن نىعايتۋىمىز قاجەت. ال ول ءۇشىن قازىرگى تاڭدا 2020-2025 -جىلدارعا ارنالعان مەملەكەتتىك باعدارلاما ۇكىمەت تاراپىنان بەكىتىلدى»، - دەدى ول.

پرەمەر- مينيستر ورىنباسارىنىڭ ايتۋىنشا، مۇعالىمدەردىڭ جالاقىسى قاڭتار ايىنان باستاپ ورتا ەسەپەن 25-30 پايىزعا وسەدى. 4 جىلدىڭ ىشىندە 2,5 ەسە ارتادى. ال ۇكىمەت قابىلداعان، بەكىتكەن باعدارلامانىڭ ارقاسىندا مەكتەپكە دەيىنگى جاستاعى بالالار بالاباقشامەن 100 پايىز قامتىلادى. 2025 جىلعا دەيىن ءۇش اۋىسىمدى، اپاتتى جاعدايداعى مەكتەپتەردىڭ بارلىعى جويىلادى. مەكتەپتەر 100 پايىز ينتەرنەتپەن قامتاماسىز ەتىلىپ، ينتەرناتتار اشىلادى، قوسىمشا سپورت زالدار سالىنادى.

«وزدەرىڭىز بىلەسىزدەر، قازىر سەناتتا مۇعالىمدەردىڭ مارتەبەسى جونىندەگى زاڭ جوباسى قارالىپ جاتىر. ءبىزدىڭ جوسپارىمىز بويىنشا ەرتەڭگى وتىرىستا ول قابىلداناتىن شىعار. ودان كەيىن مەملەكەت باسشىسىنىڭ قول قويۋىنا جىبەرىلەدى»، - دەدى بەردىبەك ساپاربايەۆ.

اۆتور مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى