زەينەتاقى جيناعىمەن باسپانا الۋعا مۇمكىندىك بەرەتىن تەتىكتەر دايىن - ساپاربايەۆ

 بۇل تۋرالى بۇگىن ۇكىمەت ۇيىندەگى باسپا ءسوز ءماسليحاتىندا ق ر پرەمەر- ءمينيسترىنىڭ ورىنباسارى بەردىبەك ساپاربايەۆ ايتتى، دەپ حابارلايدى قازاقپارات ءتىلشىسى.

«ۇكىمەت جانىنان جۇمىس توبى قۇرىلعان. ءبىز قازىرگى ۋاقىتتا ۇسىنىستار ازىرلەدىك، پرەزيدەنتكە ۇسىناتىن بولامىز. تۇپكىلىكتى شەشىمدى پرەزيدەنت قابىلدايدى. بىرنەشە رەت ايتقانمىن، تاعى دا قايتالاپ ايتامىن. زەينەتاقى جيناعىن پايدالانۋ سالىمشى جيناعىنىڭ سوماسىنا بايلانىستى بولادى. بەلگىلەنگەن نورما بار. ياعني، ءبىز ءتيىستى ەسەپتەۋلەرىن شىعاردىق. ءبىرىنشىسى - بۇگىنگى كۇنگە دەيىن جيناقتالعان جيناق سوماسى. ەكىنشىسى - قازاقستاندىقتاردىڭ ورتاشا ءومىر ءسۇرۋ ۇزاقتىعى. زەينەتكەرلىككە شىققاننان كەيىن قازاقستاندىق قانشا جىل ءومىر سۇرەتىندىگىن ەسەپتەدىك. ياعني، سالىمشىنىڭ ەسەپشوتىندا قانشا جىلعا جەتەتىن جيناق بولۋى قاجەتتىگىن انىقتادىق»، - دەدى ۇكىمەت باسشىسىنىڭ ورىنباسارى.

ونىڭ اتاپ وتۋىنشە، سالىمشى زەينەتاقى جيناعىنىنىڭ بەلگىلى ءبىر مولشەرىن باسپانا ساتىپ الۋعا نەمەسە ءبىلىم الۋعا جۇمساۋى ءۇشىن ونىڭ ەسەپشوتىندا قالاتىن سوما 75 جاسقا دەيىن ءومىر سۇرۋىنە جەتكىلىكتى بولۋى قاجەت.

«بۇگىن- ەرتەڭ ءوز ۇسىنىستارىمىزدى پرەزيدەنت اكىمشىلىگىنە بەرەمىز جانە پرەزيدەنت تاراپىنان شەشىم قابىلدانادى»، - دەدى بەردىبەك ساپاربايەۆ.

پرەمەر- ءمينيستردىڭ دەرەگىنشە، 9 ميلليون 600 مىڭ سالىمشىنىڭ 10 تريلليون تەڭگە جيناعى بار. ورتاشا ەسەپپەن ءبىر سالىمشىنىڭ ەسەپشوتىندا 1 ميلليون تەڭگە عانا جيناقتالعان.

«ءبىزدىڭ ەسەبىمىزشە، سالىمشى زەينەتكە شىققاننان كەيىن جاقسى ءومىر ءسۇرۋى ءۇشىن ەسەپشوتىندا 11-12 ميلليون تەڭگە قاراجاتى بولۋى كەرەك. جالپى، ءاربىر قازاقستاندىڭ جيناعىنا قاتىستى ناقتى ەسەبىمىز بار»، - دەدى ول.

ەسكە سالا كەتسەك، مەملەكەت باسشىسى قازاقستان حالقىنا جولداۋىندا ۇكىمەتكە ازاماتتاردىڭ زەينەتاقى جيناقتارىن باسپانا الۋعا جۇمساۋىن رەتتەۋدى تاپسىرعان بولاتىن.

اۆتور مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى