تارازدا «اۋەندەر الەمى» الاڭى اشىلدى
نىسان ى. دۇكەن ۇلى اتىنداعى قالالىق مادەنيەت ءۇيىنىڭ ماڭىندا ورنالاسقان. اۋماعى 700 شارشى مەتردەن اسادى. بۇعان دەيىن قاراۋسىز جاتقان الاڭ ماڭىنداعى اللەيا قايتا جاڭعىرتىلىپ، قالپىنا كەلتىرىلۋدە.
ايتا كەتەيىك، ەلىمىزدىڭ اتىن الەمگە تانىتىپ جۇرگەن مۋزىكا ونەرى قايراتكەرلەرىنىڭ شىعارماشىلىعىن ناسيحاتتاپ، ونەگەلى ءومىر جولىن بۇگىنگى ۇرپاققا ۇلگى ەتۋ ماقساتىندا اشىلعان الاڭنىڭ ورتاسىنا ونەر يەلەرىنىڭ قۇرمەتىنە ارنالعان ستەللا قويىلعان. ونىڭ بيىكتىگى - 6,5 مەتر. ستەلانىڭ اينالاسىنا وتىز تۇعىر تاس ورناتىلعان. ولارعا قويىلعان الپىس جۇلدىز بەلگىسىنە ەلىمىزدىڭ مادەنيەتىنە ۇلكەن ۇلەس قوسقان تۇلعالار مەن ونەر جۇلدىزدارىنىڭ ەسىمدەرى جازىلعان. ستەللانىڭ تۇعىرىنا ج. جابايەۆ، ب. شولاق، ى. دۇكەن ۇلى، ك. ازىربايەۆتىڭ ونەر تۋرالى قاناتتى سوزدەرى قاشالىپ جازىلعان.
نىساننىڭ اشىلۋ سالتاناتىندا قازاقستاننىڭ جانە قىرعىزستاننىڭ حالىق ءارتىسى، قازاقستان رەسپۋبليكاسىنىڭ مەملەكەتتىك سىيلىعىنىڭ لاۋرەاتى التىنبەك قورازبايەۆ ءسوز سويلەپ، كەيىنگى جىلدارداعى وڭىردەگى وركەندى ىستەر تۋرالى ايتا كەلە، رۋحانيات پەن مادەنيەت باعىتىندا اتقارىلىپ جاتقان جۇيەلى جۇمىستارعا توقتالدى. سونداي- اق ول اشىلعالى وتىرعان نىساننىڭ وبلىستان شىققان ونەر ادامدارىنا دەگەن شەكسىز قۇرمەتتىك بەلگىسى ەكەندىگىن مارقايا جەتكىزدى. شارا بارىسىندا ايماق باسشىسى اسقار مىرزاحمەتوۆ «اۋەندەر الەمى» الاڭىنا ەسىمدەرى جازىلعان ونەرپازدارعا سەرتيفيكاتتار تابىستاپ، ونەر مەن ومىردە ساتتىلىك تىلەدى.
جامبىل ءوڭىرى ەلىمىزدىڭ ونەر الەمىندە قاناتىن كەڭگە جايعان جايساڭداردان كەندە ەمەس. ولار تەك وبلىسقا عانا ەمەس، بارشا ەلىمىزدىڭ ماقتانىشىنا دا اينالۋدا. قازاق ءان- كۇي ونەرىندەگى تۇلعالار بالۋان شولاق، ىقىلاس دۇكەن ۇلى، كەنەن ازىربايەۆ، يليا جاقانوۆ، التىنبەك قورازبايەۆ، مەلس وزبەكوۆ جانە تاعى باسقالاردى ايرىقشا اتاپ ايتۋعا بولادى. بۇگىندە وسى تۇلعالاردىڭ ءىزىڭ جالعاپ كەلە جاتقان تالانتتار از ەمەس. بۇل الاڭ سولاردىڭ ونەرىنە دەگەن قۇرمەت بەلگىسى دەسەك قاتەلەسپەيمىز.
