وسكەمەننىڭ ەكولوگيالىق ماسەلەسى قالاي شەشىلەدى - ءمينيستردىڭ جاۋابى
«ەلىمىزدە بىرنەشە پروبلەمالىق قالا مەن وبلىس بار. سوندىقتان، ءار وبلىس پەن ءار قالاعا قاتىستى ماسەلەنى شەشۋ جولىن ىزدەدىك. ەكولوگيالىق ماسەلەسى بار وڭىرلەردىڭ ءبىرى - وسكەمەن قالاسى. جالپى، شىعىس قازاقستاننىڭ ەكولوگيالىق احۋالىن بىلەمىز. شىعىس قازاقستانداعى ەڭ ءىرى كاسىپورىنداردىڭ ءبىرى - «كازسينك» كومپانياسى. ول ريددەر مەن وسكەمەن قالاسىندا جۇمىس ىستەيتىن ءىرى مەكەمە. ءبىز سول مەكەمەنىڭ باسشىسىن شاقىرىپ الىپ، مىنا ماسەلەنى قالاي شەشۋگە بولادى دەپ اقىلداستىق. ءبىر جاعىنان جاڭا ەكولوگيالىق كودەكس كۇشىنە ەنگەننەن كەيىن 2025 - جىلعا دەيىن ەڭ وزىق قولجەتىمدى تەحنولوگيالار ۇعىمى پايدا بولادى. دەگەنمەن، وسكەمەن قالاسىنىڭ پروبلەماسىن 2025 -جىلدى كۇتپەي، شەشۋ كەرەك دەپ ويلايمىز»، - دەدى ماعزۇم مىرزاعاليەۆ و ك ق- دا وتكەن باسپا ءسوز ءماسليحاتىندا.
مينيستر «كازسينك» مەتاللۋرگيالىق كومپانياسىنىڭ باسشىسىمەن كەزدەسىپ، ناقتى كەلىسىمگە قول جەتكىزىلگەنىن ايتادى.
«سول كەلىسىمگە سايكەس، «كازسينك» كومپانياسى قاتەلەسپەسەم، 300 ميلليون دوللار قاراجات سالعالى وتىر. ولار وسى سوما ارقىلى فيلتردى ەمەس، تەحنولوگيانى وزگەرتكىسى كەلەدى. ەڭ وزىق قولجەتىمدى تەحنولوگيالاردى 2025 -جىلدى كۇتپەي، كەلەسى جىلدان باستاپ ەنگىزبەك. ءبىزدىڭ ەسەبىمىز بويىنشا بۇل تەحنولوگيا 3-4 جىلدىڭ ىشىندە اۋاعا تارالاتىن شىعارىندىلاردى 20-30 پايىزعا ازايتادى. بۇل - وتە جاقسى ناتيجە، مەنىڭشە»، - دەدى ول.
ماعزۇم مىرزاعاليەۆ «كازسينك» باسشىلىعىنان نەلىكتەن 2025 -جىلدى كۇتپەي، وزىق تەحنولوگيالاردى تەزىرەك ەنگىزۋگە اسىعىپ وتىرعانىن سۇراعان.
«ءبىزدىڭ العان جاۋابىمىز مىناداي بولدى: «كازسينكتىڭ» قازىرگى قوجايىنى - ەۋروپالىق كومپانيا. ەۋروپادا نارىق پەن ەكولوگيالىق تالاپتار جوعارى. ەگەر ءبىزدىڭ كومپانيالار ەۋروپالىق دەڭگەيگە شىقپاسا، وندا «كازسينك» كومپانياسى وندىرەتىن ونىمدەردى ەۋروپالىقتاردىڭ ساتىپ الۋى ەكىتالاي. سوندىقتان، كاسىپورىن اتالمىش ماسەلەگە قازىردەن باستاپ نازار اۋدارىپ وتىر»، - دەدى ول.
مينيستر وسكەمەن قالاسىندا اۋانى لاستايتىن نەگىزگى ءۇش ءىرى كاسىپورىن بارىن، «كازسينك» كومپانياسىمەن بىرگە تاعى ەكى كاسىپورىن ءتيىستى تالاپتار بويىنشا جۇمىس جۇرگىزىپ جاتقانىن جەتكىزدى.
اۆتور: ايان بەكەن ۇلى
