ارنايى جاساق وقۋشىلارعا تۇتقىنداردى قالاي ۇرۋ كەرەكتىگىن كورسەتتى
ارنايى جاساق وكىلدەرى ۇيىمداستىرعان «شوۋدى» جوعارى سىنىپتارمەن قاتار ورتا، باستاۋىش سىنىپ وقۋشىلارى دا كوردى. قولدارىنا قالقان جانە رەزەڭكە تاياق ۇستاعان ارنايى جاساق وكىلدەرى سپورت زالدا ءبىر قاتارعا ءتىزىلىپ تۇردى. كوماندير «تاياقتى كوتەرىپ، ۇرىڭدار» جانە «تاياقتى تومەن ءتۇسىرىپ، ۇرىڭدار» دەپ كوماندا بەرگەن كەزدە ولار بۇيرىقتى بۇلجىتپاي ورىنداپ وتىردى.
جەرگىلىكتى ب ا ق- تىڭ حابارلاۋىنشا، وعان 25№ تۇزەۋ مەكەمەسىنىڭ جىلدام جاۋاپ بەرۋ توبى قاتىسقان. چەليابينسك وبلىسىنىڭ جازانى ورىنداۋ فەدەرالدىق قىزمەتى شوۋدىڭ «كەرەمەت» بولعانىن ايتىپ، بۇل شارانىڭ «جاستاردى پاتريوتتىق تاربيەلەۋ» باعدارلاماسى اياسىندا وتكەنىن جەتكىزدى.
زلاتوۋست قالاسىنىڭ ءبىلىم بەرۋ باسقارماسىنىڭ ايتۋىنشا، قالادا تۇرمە مەن تەرگەۋ يزولياتورى بولعاندىقتان مەكتەپ وقۋشىلارىنا مۇنداي شوۋ العاش رەت كورسەتىلىپ وتىرعان جوق.
بۇعان دەيىن تاتارستاندا نوۆوترويتسك اۋىلىندا روسگۆارديا جاساقتارى توعىزىنشى سىنىپ وقۋشىلارىنىڭ قاتىسۋىمەن ميتينگىنى باسۋ بويىنشا جاتتىعۋ وتكىزگەن. جاتتىعۋ كەزىندە وقۋشىلار نارازىلاردىڭ ءرولىن ويناعان.
«ازاتتىق»
