ارىستانبەك مۇحامەدي ۇلى: «اباي» وپەراسىنا جاڭاشا سيپات بەردىك، اباي ادەمى شاپانمەن، كەڭ دالادا عۇلاما كەيپىندە تۇراتىن بولدى

 ق ر ۇلتتىق مۋزەيىنىڭ ديرەكتورى ارىستانبەك مۇحامەدي ۇلى قازاقپارات تىلشىسىنە بەرگەن سۇحباتىندا وسى جانە وزگە دە سۇراقتارعا جاۋاپ بەردى.

- ارىستانبەك مۇحامەدي ۇلى، مادەنيەت جانە سپورت ءمينيسترى بولعان بەس جارىم جىل ىشىندە ءسىزدىڭ باستاماڭىزبەن قانداي جوبالار جۇزەگە استى؟ ەڭ ماڭىزدى، ەڭ ءساتتى 3 جوبا تۋرالى ايتا الاسىز با؟

- ءبىرىنشى جوبا - ەلوردادا وتكەن EXPO-2017  حالىقارالىق كورمەسىندە قۇرعان ەتنواۋىل. اۋەجايعا كەتىپ بارا جاتقان جولداعى يپپودرومدا اپتا سايىن قىز قۋۋ، ات جارىسى، تەڭگە ءىلۋ، ساداق اتۋ، اۋدارىسپاق سياقتى ۇلتتىق سپورت تۇرلەرىن ءوتىزىپ، ونىڭ ارعى جاعىنا كيىز ۇيلەر قۇرىلىپ، ەتنواۋىل جاسادىق. قالا تۇرعىندارى مەن قوناقتارى بەسىككە بولەۋ، تۇساۋ كەسۋ سياقتى سالت- داستۇرلەردى سول جەرگە بارىپ جاساپ جاتاتىن. سالت- ءداستۇرىمىزدى بارىنشا كەڭىنەن ناسيحاتتاپ، الەمنىڭ تۇكپىر- تۇكپىرىنەن كەلگەن مەملەكەت باسشىلارى مەن تانىمال تۇلعالاردى تاڭعالدىردىق. ەتنواۋىلدى ەكى جىل قاتارىنان كەڭىنەن ناسيحاتتاۋ جۇمىسى بۇرىن- سوڭدى بولماعان.

قازاق وپەرالارىن جاڭا دەڭگەيگە كوتەردىك

ەكىنشى جوبا - قازاق وپەرالارىن ءبىرىنشى رەت جوعارى دەڭگەيگە كوتەردىك. ول كەزگە دەيىن قازاقتىڭ وپەرالارى سوۆەت وداعىنداعىداي قويىلاتىن. مىسالى، «اباي» وپەراسى باستالعان كەزدە اباي كەيىپكەرى سۇپ- سۇر شاپانمەن قاپ- قارا كيىز ءۇيدىڭ جانىندا باسى جارىلعان كۇيدە «ۋا، حالايىق، نە بولدى؟!» دەپ جىلايتىن. وپەرا اياقتالعان كەزدە دە كۇڭىرەنىپ اياقتالاتىن. سوۆەت وداعى كەزىندە يدەولوگيا سولاي بولدى. ءبىز سول وپەرالاردىڭ مۋزىكالىق ماتەريالدارىن زەرتتەپ، قايتا وڭدەپ، تولىقتىرىپ، دەكوراتسياسىن وزگەرتىپ، جاڭاشا سيپات بەردىك. وسىلايشا، اباي ادەمى شاپانمەن، كەڭ دالادا عۇلاما كەيپىندە تۇراتىن بولدى. وپەرا جانرى - الەمدەگى ەڭ كۇردەلى جانر، ونەردىڭ شىڭى. ونى جاڭاشا سيپاتتا قويۋ - وڭاي جۇمىس ەمەس. بۇرىن تەاتر رەپەرتۋارىنداعى قاي وپەراعا ادام از كەلسە، سونى تىزىمنەن الىپ تاستايتىن. اتالعان وپەرالارعا حالىق از كەلەتىن. رەپەرتۋاردان الىنىپ قالماسى ءۇشىن ستۋدەنت، اعايىن- تۋىستاردى شاقىرتىپ، كورەرمەندەردى جاساندى جولمەن جينايتىنبىز...

ال قازىر ەلورداداعى «استانا وپەرا» بولسىن، الماتىداعى اباي اتىنداعى وپەرا جانە بالەت تەاترى بولسىن، كورەرمەنگە كەندە ەمەس، ءتىپتى كاسسادا بيلەت بولماي قالادى. «اباي»، «قىز جىبەك»، «ءبىرجان- سارا» وپەرالارىن جاڭاشا سيپاتتا قويىپ، شەتەلگە شىعارىپ جاتىرمىز. كورەرمەننىڭ كوپتىگى سونداي - ول جاقتا دا بيلەت بولماي قالادى.

«كينو دامىتۋ ورتالىعىن» قۇردىق

ءۇشىنشى جوبا - كينو تۋرالى جاڭا زاڭ قابىلدادىق. كينو سالاسى - يدەولوگيا، ونەر عانا ەمەس، ۇلكەن بيزنەس. انگليادا ءار 11 جۇمىس ورنىنىڭ ءبىرى - كينو، تەلەۆيدەنيە سالاسىندا ەكەن. ءبارى نە سەبەپتى كينوتەاترلاردا كەشكى ۋاقىتقا قازاقتىڭ فيلمدەرى قويىلمايتىنىن سۇرايدى. ونىڭ سەبەبى مىنادا: «قازاق فيلم» مەن رەجيسسەر بىرىگىپ فيلم تۇسىرەدى، ارى قاراي ونىڭ پروكاتىمەن ەشكىم اينالىسپايدى. رەجيسسەر پروكاتقا كومەك سۇراپ ءوزى جۇگىرىپ جۇرەدى. ال دامىعان مەملەكەتتەردە قالاي؟ فيلم تۇسىرىلەر كەزدە- اق ول قاشان پروكاتقا شىعاتىنىن بەلگىلەپ، كەلىسىپ قويادى. وسىلايشا، ءبىر جىل بۇرىن فيلم جارناماسى جۇرە باستايدى. ال بىزدە «قازاق فيلم» فيلم تۇسىرۋمەن دە، اقشا بولۋمەن دە، پروكاتپەن دە اينالىسۋى كەرەك. بۇل - دۇرىس ەمەس نارسە. سوندىقتان كينو تۋرالى زاڭعا وزگەرىس ەنگىزىپ، «كينو دامىتۋ ورتالىعىن» قۇردىق.

ورتالىقتىڭ مىندەتى - فيلمنىڭ جارناماسىن جاساپ، بىرنەشە اي بۇرىن كينوپروكاتشىلارمەن كەلىسۋ. سونداي- اق، قازاق فيلمدەرىنىڭ پروكاتىنان تۇسكەن قاراجاتتىڭ 20 پايىزى كورپوراتيۆتى سالىققا ۇستالمايتىن بولدى. وسى ارقىلى كينوپروكاتشىلارعا قازاق فيلمدەرىن كورۋگە ىڭعايلى ۋاقىتقا قويۋعا جاعداي جاسايمىز. سونىمەن قاتار، ەلىمىزدە تۇسىرىلگەن فيلمدەر 12 پايىزدىق سالىقتان بوساتىلادى. زاڭ بيىل قابىلداندى، ەندى جۇزەگە اسا باستايدى. بۇل زاڭ جۇزەگە اسسا، فيلم تۇسىرۋشىلەر بيۋدجەت قاراجاتىنا تاۋەلدى بولمايدى جانە قازاق كينوسىن دامىتۋعا كومەكتەسەدى.

قازاقتىڭ نامىسىن تاپتايتىن فيلم تۇسىرۋگە شەكتەۋ قويدىم

- 2019 -جىلدىڭ 10 - ماۋسىمىنان بەرى ق ر ۇلتتىق مۋزەيىنىڭ ديرەكتورىسىز. قازىرگى قىزمەتىڭىزدىڭ ءسىز ءۇشىن قانداي ارتىقشىلىقتارى بار؟

- قانداي لاۋازىمدا ەكەنىڭ ماڭىزدى ەمەس، ماڭىزدىسى - جۇمىسىڭدى بەرىلىپ ىستەۋ. ەكى جىل بۇرىن مينيستر بولىپ تۇرعان كەزىمدە «التىن ادام» شەرۋى دەگەن جوبانى قولعا الدىق. العاش رەت «التىن ادامدى» 2002 -جىلى ەرميتاجعا اپارىپ قويعانبىز. ول كەزدە «التىن اداممەن» شەت ەلگە شىققاندا الدىن الا كەلىسىپ، وسىنداي جادىگەرىمىز بار ەكەنىن ايتىپ، قويۋعا رۇقسات سۇرايتىنبىز. قازىرگى ۋاقىتتا قانشاما ەلشىلىك وزدەرى حابارلاسىپ، «التىن ادامدى» الىپ كەلۋىمىزدى سۇرايدى. ەكى ايعا قويساق، ءۇش ايعا دەيىن ۇزارتۋىمىزدى وتىنەدى. بۇل - ىستەپ جاتقان جۇمىسىمىزدىڭ جەمىسى.

سونداي- اق، مەن مينيستر بولعان كەزدە قازاقتىڭ نامىسىن اياققا تاپتايتىن فيلمدەردى تۇسىرۋگە شەكتەۋ قويدىم. ءسويتىپ «قۇنانباي»، «امىرە»، «بالۋان شولاق»، «اناعا اپارار جول»، «الماس قىلىش»، «التىن تاق»، «توميريس» سياقتى قازاقتىڭ رۋحىن كوتەرەتىن فيلمدەردى تۇسىردىك. رەسەيمەن بىرىگىپ تۇسىرىلگەن قازاقتىڭ «28 پانفيلوۆشى» فيلمى تولىققاندى تۇردە شەتەلدىك پروكاتقا شىقتى. قىتايمەن بىرىگىپ تۇسىرىلگەن «كومپوزيتور» فيلمى ق ح ر پروكاتىنا شىقتى. ول فيلمدە ويناعان اكريسا ارۋجان جازىلبەكوۆا گولليۆۋدتا «ەڭ ۇزدىك ايەل ءرولى» نوميناتسياسىن الدى.

تۇرسىنبەك قاباتوۆ - ساتيرانى جاڭا دەڭگەيگە كوتەرگەن ازامات

- ساتيرا اكتەرى تۇرسىنبەك قاباتوۆتىڭ شەتەلدىك ادامداردىڭ مۋزەيگە بارۋى مەن ءبىزدىڭ ەلدەگى ادامداردىڭ مۋزەيگە بارۋى تۋرالى ءازىلى بار. شەتەلدىك مۋزەيلەردىڭ ىشىندە ادام تولى بولسا، ءبىزدىڭ مۋزەيلەردە ساۋساقپەن سانارلىق ادام جۇرەتىنىن ايتادى. ءسوزىنىڭ جانى بارداي... مۋزەيگە ادامدار كوپتەپ كەلۋى ءۇشىن قانداي جۇمىس اتقارىلىپ جاتىر؟

- تۇرسىنبەك - قازاقتىڭ ساتيراسىن جاڭا دەڭگەيگە كوتەرگەن مىقتى ازامات. ول ساحنادا بۇرىنعىداي كەمپىر مەن شال، بازار، ىدىس- اياق سەكىلدى تۇرمىستىق دەڭگەيدە ەمەس، مەملەكەتتىك باعدارلامالاردى دا ازىلىنە قوسىپ، استارلى سىن ايتادى. ۇكىمەت ءبىر باعدارلاما قابىلداسا، ارادا 1-2 اي وتكەن سوڭ ول تۋرالى مىندەتتى تۇردە تۇرسىنبەكتىڭ ازىلدەرىنەن كورۋگە بولادى. مىسالى، «قولجەتىمدى باسپانا» تۋرالى ءازىلىن الار بولساق، «ۇكىمەت ءبىزدىڭ جاعدايىمىزدى قاتتى ويلايدى. «قولجەتىمدى باسپانا» بويىنشا ءۇي الدىق. شىنىمەن ءبارى قولجەتىمدى ەكەن. اسۇيدە ورنىڭنان تۇرماعان كۇيدە- اق قول سوزىپ، توڭازىتقىشتى اشا سالاسىڭ. قول سوزىپ- اق شاۋگىمدى الا سالاسىڭ. شىنىمەن قولجەتىمدى باسپانا ەكەن. ال وزدەرى قول جەتىمسىز ۇيدە تۇرادى: توڭازىتقىشقى بارۋ ءۇشىن ونى ىزدەۋ كەرەك، شاي الىپ كەلگەنشە سۋىپ قالادى» دەيدى. استارلى ءازىل مە - استارلى ءازىل! ال، مۋزەي تۋرالى سۇراعىڭىزعا كەلەر بولساق، ادامدار از بولسا دا كەلە باستادى. بۇل - باستاماسى عانا، بولاشاقتا وسى جەرگە كەلۋ ءۇشىن كەزەكتە تۇراتىنداي ەتكىم كەلەدى.

جادىگەرلەر تابىلعان وڭىردە ساقتالۋى كەرەك

- جۇرت تامسانا قارايتىن ەكسپوناتتاردىڭ ءبىرى - «التىن ادام». قازاقستاننىڭ تۇكپىر- تۇكپىرىنەن «التىن ادامدار» تابىلىپ، ءسۇيىنشى سۇراعان جاڭالىقتاردى ءجيى كورەتىن بولدىق. سوڭعى 1-2 جىلدىڭ وزىندە ش ق و- داعى ەلەكە سازىنان (ول – ش ق و- داعى بەسىنشى «التىن ادام»)، اقتوبە وبلىسىنان «التىن ادامدار» تابىلدى. وسى قۇندى جادىگەرلەر ۇلتتىق مۋزەي قورىن تولىقتىرۋى مۇمكىن بە؟

- ەڭ قۇندى جادىگەرلەردى ۇلتتىق مۋزەيگە اكەلۋ - جاقسى، ءبىراق ماسەلەنىڭ ەكى ۇشى بار. وسى مۋزەي بەس جىل بۇرىن اشىلعان كەزدە ەلىمىزدەگى بۇكىل جادىگەرلەر وسى جەرگە قويىلۋى كەرەك دەگەن اڭگىمەنى توقتاتقانمىن. وتە قۇندى جادىگەرلەر وسى جاقتا بولۋى كەرەك، ءبىراق بارلىق جادىگەرلەردى الىپ كەلۋ - دۇرىس ەمەس. ءار ايماقتا ونداي مۋزەي مەن جادىگەرلەر بولۋى كەرەك. قازاق حاندىعىنىڭ 550 جىلدىعىندا تارازدا ءبىرىنشى رەت ارحەولوگيالىق قالاشىق قازدىق. وعان دەيىن مۇنىمەن نەگە ەشكىم اينالىسپادى؟

اتا- بابالارىمىز التىنمەن اپتالىپ، كۇمىسپەن قاپتالىپ جاتسا، ونى وڭدەۋ جۇمىستارى كيىز ءۇي ىشىندە ءوتۋى مۇمكىن ەمەس قوي. التىندى قورىتۋ ءۇشىن وت جاققان كەزدە كيىز ءۇي ورتەنىپ كەتپەي مە؟ دەمەك، ول كەزدە كەرەمەت شەبەرحانالار بولعان. بۇل - زەرتتەۋدى قاجەت ەتەتىن سالا. ارحەولوگيالىق جۇمىستار ارقىلى تۋريزم سالاسىن دامىتۋعا بولادى. تۇركىستاننىڭ قاسىنداعى قۇلتوبە قالاشىعى قايتا قالپىنا كەلتىرىلىپ جاتىر. سول جەردەن ەكى كىتاپ تابىلدى، دەمەك ول جەردە ساۋدا- ساتتىق قانا ەمەس، بىلىمگە دەگەن قۇشتارلىق بولعان. بۇل - جارتى جىل عانا ىستەگەن جۇمىس ناتيجەسىندە تابىلعان جادىگەر. ارى قاراي تەرەڭدەي باستاعان سايىن ناعىز جاڭالىقتارعا كۋا بولامىز.

امىرە نەگە جۇپىنى شاپانمەن ءجۇرۋى كەرەك؟

- قازىر الەۋمەتتىك جەلى دامىعان زاماندا العىس تا، قارعىس تا الاتىن كەزدەر كوپ بولادى. ماقتاۋدى قالاي قابىلدايسىز، سىندى قالاي كوتەرەسىز؟ ءوزىڭىز تۋرالى الۋان ءتۇرلى پىكىرلەردى وقىعاندا قانداي سەزىمدە بولاسىز؟

- ديماش سۇحبات بەرگەندە قازاقستاندا ءبىلىم العانىن، ۇستازى دا قازاقستاندىق ەكەنىن ايتادى، ءبىراق حالىق ول تۋرالى تىڭداعىسى كەلمەيدى. ءبىراق الەۋمەتتىك جەلى قولدانۋشىلارى «ديماش قىتايدا وتكەن I'm a Singer بايقاۋىنا قاتىسپاسا، تانىمال بولماس ەدى»، «سامال ەسلياموۆا رەسەيدە تۇسىرىلگەن «ايكا» فيلمىنە تۇسپەسە - ەلەنبەس ەدى» دەگەن سيپاتتاعى پىكىرلەر جازادى. بۇل - قۇلدىق سانا، بەيشارالىق پسيحولوگيا دەر ەدىم.

دانيار ەلەۋسىنوۆ ريو- دە- جانەيرودا وتكەن وليمپياداعا قاتىسپاسا، دانيار ەلەۋسىنوۆ بولار ما ەدى؟ ولگا رىپاكوۆا لوندونداعى وليمپياداعا قاتىسپاسا، ولگا رىپاكوۆا بولار ما ەدى؟ دەمەك، قاي سالادا جۇرسەڭ دە مىقتىنىڭ مىقتىسى، ۇزدىكتىڭ ۇزدىگى ەكەنىڭدى وسىنداي بايقاۋلارعا قاتىسىپ دالەلدەيسىڭ. مەملەكەت ودان كەيىن عانا ارى قاراي قاناتتانىپ كەتۋىڭە جاعداي جاسايدى.

ديماش قۇدايبەرگەندە دە وسى جاعداي. سامال ەسلياموۆا تۇسكەن فيلم رەسەيدە تۇسىرىلگەنمەن، قاراجاتتى قازاقستان مەن دەمەۋشىلەر قۇيدى. حالىق نەگە ونى ەسكەرمەيدى؟ مىسالى، «امىرە» فيلمىنە قاتىستى «امىرە ونداي بولعان جوق. ول شەتەلدە ادەمى كوستيۋممەن جۇرگەن جوق، امەريكالىق قىزبەن سۇيىسكەن جوق، توسەكتە جاتقان جوق. اتاقتى كومپازيتورمەن بىرگە مۋزىكا ويناعان جوق. ول شاپانمەن جۇرگەن، قولىندا دومبىراسى عانا بولعان» دەگەن سياقتى پىكىرلەر جازادى. اتالعان فيلم تۇسىرىلەر كەزدە مەن رەجيسسەرلەرمەن وتىرىپ، «نەگە ءبىز قازاقتى بەيشارا قىلىپ كورسەتە بەرەمىز؟ ونى كەرەمەت وبرازدا شىعارايىق» دەپ كەڭەس بەردىم.

 امىرە شەتەلگە ءۇش رەت شاقىرىلعان تالانتتى جان. ءبىرىنشى رەت پاريجدە وتكەن كورمەدە ەكىنشى ورىن الدى. ەكىنشى رەت گەرمانياعا شاقىرىلدى. پاسپورتىندا ۆيزاسى تۇر، ءبىراق مۇستافا شوقايدىڭ حاتىن احمەت بايتۇرسىنوۆقا الىپ كەلگەندىكتەن ن ك ۆ د ونىڭ اياعىنان شالدى. ءۇشىنشى رەت لوندونعا شاقىرىلدى، ءبىراق دەنساۋلىق جاعدايىنا بايلانىستى بارا الماعان. سوندا امىرە بەيشارا بولسا، وسىنشا شاقىرتۋ الار ما ەدى؟ ونى نەگە جۇپىنى شاپانمەن، بەيشارا ەتىپ كورسەتۋىمىز كەرەك؟ «امىرە» فيلمى گولليۆۋدتا «ەڭ ۇزدىك شەتەلدىك فيلم» نوميناتسياسىن الدى. مۇنداي جاعداي بۇرىن- سوڭدى بولماعان.

شەتەلدە وقىپ كەلگەندەر عانا باسشى بولۋى كەرەك پە؟

- الەۋمەتتىك جەلىدەگى پاراقشانى ءوزىڭىز جۇرگىزەتىنىڭىز تۋرالى اقپارات وقىدىم. سىزگە ەڭ ءجيى قويىلاتىن سۇراق قانداي؟ مىسال كەلتىرە الاسىز با؟

- ساكەن مايعازييەۆ نەگە ۇلتتىق ونەر اكادەمياسىنا پرورەكتور بولىپ كەتكەنى، ازامات ساتىبالدى نەگە بالالار تەاترىنا باسشى بولعانى، مەيرامبەك بەسپايەۆ، قايرات نۇرتاستار ماگيستراتۋرانى وقىپ جاتقانى تۋرالى سۇرايتىن وقىرماندار بار. ولار ساباققا بارمايتىنىن دا جازادى. ساباققا ۇنەمى ەمەس، مۇمكىندىگىنشە قاتىسىپ، ەمتيحان تاپسىرسا بولدى ەمەس پە؟ ولار وزدەرىن ونەرىمەن مويىنداتىپ قويعان ازاماتتار. ساكەن مايعازييەۆ ينتەللەكتۋالدىق تۇرعىدان وتە كەرەمەت جان، قايرات نۇرتاس تا جاماناتتى بولماعان جىگىت. ولاردى نەگە قولداپ، كوتەرمەسكە؟ شەتەلدە وقىپ كەلگەندەر عانا باسشى بولۋى كەرەك پە؟ حالىق اراسىندا جۇرگەن ونەر ادامدارى دا باسشى بولسىن. نەگە ءوزىمىزدى تومەن ساناي بەرۋىمىز كەرەك؟

- ءوزىڭىز تۋرالى كىتاپ جازاتىن بولساڭىز، اتىن نە دەپ قويار ەدىڭىز؟

- ابايدىڭ «وزىڭە سەن، ءوزىڭدى الىپ شىعار، ەڭبەگىڭ مەن اقىلىڭ ەكى جاقتاپ» دەگەن ولەڭ جولدارى بار. كىتاپتىڭ اتىن بىلمەيمىن، ءبىراق ول - ومىردەگى ۇمتىلىستار تۋرالى كىتاپ بولار ەدى.

سەنىڭ قولىڭنان ءبارى كەلەدى

- بالا ارىستانبەككە حات جازساڭىز، نە جازار ەدىڭىز؟

- مەن الماتى وبلىسى تالعار اۋدانى تۇزدىباستاۋ اۋىلىندا ومىرگە كەلدىم. بالا كەزىمدى ەسكە العاندا 9 - مامىر كۇنىنە دايىندالىپ جاتقان كەزىمىز ەسىمە تۇسەدى. انام ىسمەر ادام بولاتىن. مەرەكە كۇنى قارساڭىندا ول تۇنىمەن اعا، باۋىر، قارىنداستارىما كيىم تىگەتىن. ول تىككەن كويلەك، جەيدە، شورتىلارى ءالى كۇنگە دەيىن كوز الدىمدا. قازىر دە ءوزىم دەمالىس كۇندەرى مىندەتتى تۇردە وتباسىممەن بىرگە تاۋعا شىعىپ نەمەسە اتپەن سەرۋەندەۋدى ادەتكە اينالدىرعانمىن. وسىنىڭ ءبارى اكەم مەن انامنىڭ تاربيەسىنەن قالىپتاسقان ادەتتەر. سول كەزدەگى ينكۋباتوردان شىققان بالاپاندارداي قاز- قاتار ءتىزىلىپ كەتىپ بارا جاتقان بالالاردىڭ ىشىندەگى ارىستانبەككە حات جازار بولسام «سەنىڭ قولىڭنان ءبارى كەلەدى» دەپ جازار ەدىم.

- سۇحباتقا الىپ- قوسارىڭىز بار ما؟

- ءار ۇلت ءوزىن ماقتان تۇتىپ، كەرەك كەزدە بىرىگە ءبىلۋى كەرەك. سۋنامي بولعان كەزدە شەتەلدە تۇرىپ جاتقان جاپوندار بىرىگىپ، ەلىنە بارىپ، قولداۋ كورسەتكەن. امەريكادا «ءار پرەزيدەنتىمىز - كەرەمەت پرەزيدەنت» دەگەن تۇسىنىك بار. سونداي- اق، ولار وزدەرىنىڭ ەرەكشە، ەكەنىنە سەنەدى. ءبىز دە ءوز- وزىمىزگە دەگەن كوزقاراسىمىزدى وزگەرتۋىمىز كەرەك. ءبىزدىڭ وتباسىلىق قۇندىلىقتارىمىز ساقتالىپ قالعان، ۇلكەنگە قۇرمەتتى، ءبىر- بىرىمىزبەن سىيلاسۋدىڭ نە ەكەنىن جاقسى بىلەمىز. ەرەكشە سالت- داستۇرلەرىمىز بار. نەگە وسى قۇندىلىقتاردى باعالاپ، ءوزىمىزدى جوعارى ۇستامايمىز؟

- سۇحباتىڭىز ءۇشىن راحمەت!

اۆتور: زارينا قاھارمان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى