رەسەيدىڭ وليمپياداعا قاتىسۋىنا تاعى تىيىم سالىنۋى مۇمكىن
WADA- نىڭ حابارلاۋىنشا، اگەنتتىككە قاراستى جارامدىلىقتى انىقتاۋ كوميتەتى (CRC) اتقارۋ كوميتەتىنە حات جولداپ، 9 - جەلتوقساندا پاريجدە وتەتىن جيىنى كەزىندە رۋسادا- نى مارتەبەسىنەن ايىرۋعا كەڭەس بەرگەن. ەگەر اتقارۋ كوميتەتى رۋسادا- نى «جارامسىز» دەپ تانىسا، وندا رەسەي 2020 -جىلى توكيو وليمپياداسىنا قاتىسۋدان شەتتەتىلەدى جانە وزگە دە سانكسياعا ۇشىراۋى مۇمكىن.
2014 -جىلى سوچيدەگى وليمپيادا كەزىندەگى دوپينگ داۋىنان كەيىن بەكىتىلگەن ەرەجەگە سايكەس، رەسەي سپورتشىلارى كەز كەلگەن جازالاۋ تۋرالى شەشىمدى سپورت بويىنشا اربيتراج سوتىنا جۇگىنە الادى. حالىقارالىق وليمپيادا كوميتەتى (ح و ك) WADA نەمەسە سوتتىڭ شەشىمىن ورىنداۋى ءتيىس.
حالىقارالىق وليمپيادا كوميتەتىنىڭ پرەزيدەنتى توماس باح وسى اپتادا جاپپاي تىيىم سالۋدى قولدامايتىنىن جەتكىزگەن. ەرەجە بويىنشا، بەلگىلى ءبىر مەملەكەتتىڭ سپورتشىلارىنىڭ «ورەسكەل» ەرەجە بۇزعانى انىقتالسا، وسى مەملەكەت اتىنان قاتىساتىن بارلىق سپورتشى وليمپيادا ويىندارىنا قاتىسۋدان شەتتەتىلەدى.
2018 -جىلى وڭتۇستىك كورەياداعى پحەنچحان قىسقى وليمپيادا ويىندارى كەزىندە رەسەي جارىسقا قاتىسۋ قۇقىعىنان ايرىلدى، ءبىراق ح و ك رەسەيدىڭ 170 اتلەتىن تاۋەلسىز سپورتشى رەتىندە ويىنعا قاتىسۋىنا رۇقسات ەتتى. ساراپشىلار بۇل جولى دا وسىعان ۇقساس جاعداي قايتالانۋى مۇمكىن دەپ بولجايدى.
ماسكەۋدىڭ دوپينگىگە قارسى زەرتحاناسى دوپينگ سىنامالارىن وزگەرتكەن بولۋى مۇمكىن دەگەن كۇدىككە ىلىنگەننەن كەيىن قىركۇيەك ايىندا WADA بۇل ءىستى قايتا قولعان.
