ەر مىنەزدى ايەلدەر تابىسقا جەتە الا ما؟
ءوز ەسىمى - گابريەل بونەر شانەل. شانەل ءسان الەمىن ءبىر مەزەتتە تانىماستاي تۇرلەندىرىپ، وزگەرتكەن ايگىلى مودەلەر.
گابريەل جۇرتقا ءوزىنىڭ 1893 -جىلى تۋعانىن ايتىپ، سەندىرۋگە تىرىساتىن. 12 جاسىندا اناسىنان ايىرىلىپ، اكەسى ونى باۋىرلارىمەن تاستاپ كەتەدى. 18 جاسىندا كيىم ساتاتىن دۇكەنگە ساتۋشى بولىپ جۇمىسقا تۇرادى.
بوس ۋاقىتىندا كافەدە ءان ايتادى. ونىڭ سۇيىكتى اندەرىنىڭ ءبىرى - «KokoRiko» ەدى، سوندىقتان جۇرت ونى گابريەل ەمەس، كوكو دەپ اتاپ كەتتى. ءان ايتۋعا تالابى زور بولماعان. بىردە كافە قوناعى ەتەن بالزان اتتى وفيتسەر كوكوعا دەگەن سەزىمىن بىلدىرەدى. گابريەل سول كىسىنىڭ پاريجدەگى ۇيىنە كوشەدى. الايدا، كوپ ۇزاماي اعىلشىن كاسىپكەرى ارتۋر كەيپەلمەن كەتىپ قالادى.
كوكو العاشقى دۇكەنىن 1910 -جىلى پاريجدە اشىپ، باس كيىمدەر ساتۋدان باستاعان. ايگىلى Chanel #5 ءاتىرىن رەسەيدەن كەلگەن ەرنەست بو ەسىمدى ەميگرانت شىعارعان ەدى. ول كوكوعا 20 شاقتى ءيىس ۇسىنىپ، سونىڭ ءبىرىن تاڭداتقىزدى. شانەل بەسىنشى نومىردەگى ءيىستى ۇناتتى. سودان بەرى ول بەسىنشى شانەل اتالىپ، الەمدەگى ەڭ تانىمال اتىرلەردىڭ ءبىرى بولىپ كەلەدى. جيىرماسىنشى عاسىردىڭ ءسان الەمىن وزگەرتكەن شانەل ۇزىن كويلەك، تىرىسقان بلۋزا مەن كورسەتتى ۇناتپايتىندىقتان، ەرلەر سانىنە قىزىعىپ، ايەلدەر كيىمىن تۇرلەندىرە باستادى. كىشكەنتاي قارا كويلەك ءسانىن دە كوكو شانەل ەنگىزگەن ەدى.
قىز-كەلىنشەكتەر كويلەكتى تەك كەشتە ەمەس، كەز كەلگەن جەردە، كەز كەلگەن ۋاقىتتا كيۋگە بولاتىنىن ايتىپ، تانىمال ەتتى. حالىق بۇل تەندەنتسيانى شانەلدىڭ كولىك اپاتىندا قايتىس بولعان سۇيىكتىسى ارتۋردى جوقتاۋ ماقساتىندا تىگىلگەن كيىم دەپ ءتۇسىندى. ەكىنشى دۇنيەجۇزىلىك سوعىس اياقتالعان سوڭ شانەل نەمىستەرگە كومەكتەستى دەگەن ايىپپەن تۇتقىندالعان ەدى. ۋينستون چەرچيللدىڭ كەڭەسىمەن كوكو تۇتقىننان بوساتىلىپ، شۆەيتسارياعا ايدالدى.
1954 -جىلى كوكو شانەل ءسان الەمىنە قايتا ورالدى. بۇرىنعى تانىمالدىلىعى مەن حالىق قۇرمەتىنەن ايىرىلعان گابريەلگە قايتا ورنىعۋ وڭاي بولعان جوق. ءدال وسى كەزەڭدە تۆيد ماتادان تىگىلگەن كوستيۋم، كيىمدەر، ادەمى كويلەكتەر، جاعاسى جوق جاكەتتەر، جاساندى قالتالار مەن التىنمەن قاپتالعان تۇيمەلەر پوديۋمدا تانىستىرىلدى. 1950-1960 -جىلدارى ودري حەپبەرن، ليز تەيلورسياقتى گولليۆۋد جۇلدىزدارىن كيىندىرگەن. 1971 -جىلى گابريەلدىڭ جۇرەگى ۇستاپ، 87 جاسىندا ومىردەن قايتتى.
كوكو شانەل - ءومىردىڭ سان ءتۇرلى قيىندىقتارىن وتكەرگەنىمەن، جۇرتقا كوز جاسىن كورسەتپەگەن جاننىڭ ءبىرى. اۋىر كەزەڭنەن باسىن يمەي ءوتىپ، جالعىز ءومىر سۇرگەن ايەل. جاستايىنان جاۋاپكەرشىلىككە ۇيرەنگەن، ەر مىنەزىنىڭ ارقاسىندا 87 جاس جاساپ، تابىسقا جەتتى. كوكو شانەل - عاسىرلار وتسە دە ءسان الەمىندە اتى وشپەيتىن ادام.
