تۇرمەگە قامالۋ ءۇشىن اقىسىن تولەيتىندەردىڭ قاتارى ارتىپ كەلەدى
تۇرمەگە قامالعانى ءۇشىن اقىسىن بەرەدى. تۇرمە بازبىرەۋلەر ءۇشىن الاڭسىز جاتىپ تىنىعاتىن بىردەن-ءبىر جالعىز ورىنعا اينالعان. كيم حون جي ەسىمدى فوتوگراف «مەنىڭ ىشىمدەگى تۇرمە» دەپ اتالاتىن اباقتىدا بولىپ قايتقان ەكەن...
كوردىڭىزدەر مە، ءىستىڭ كوزىن تاپقان ادامدار وسىنداي جولمەن دە اقشا تاۋىپ، بيزنەسىن ورگە دوڭگەلەتىپ وتىر. ادامدار شالعايىنا وراتىلعان شارۋادان ءبىر ءسات دامىل تاباتىن تۇرمەنىڭ ىرگەتاسىن قالاسقانداردىڭ ءبىرى نو جي حياننىڭ كۇيەۋى زاڭ سالاسىنىڭ مامانى، ياعني، پروكۋرور. مۇنداي وي وعان قايدا كەلدى؟
كۇيەۋىنىڭ سىلەلەپ شارشاپ تۇرىپ اۋزىنان شىققان سوزىنەن.
«تىنىعىپ، ەس جيىپ العانشا ءبىر اپتا كامەرادا جالعىز وتىرىپ شىقسا، جاقسى بولار ەدى. ءبارى وسىدان باستالدى»، - دەپ ەسكە الادى ول مۇنداي ەرەكشە بيزنەس ءتۇرىن اشقانىنا نە تۇرتكى بولعانىن ايتا كەلىپ.
ءبىز ءسوز ەتىپ وتىرعان «مەنىڭ ىشىمدەگى تۇرمە» تاڭعى شىق ەلىنىڭ سولتۇستىك- شىعىسىندا ورىن تەپكەن حونچحون قالاسىندا وسىدان شامامەن 5 جىل بۇرىن اشىلعان. 2013 -جىلدان بەرى مۇندا ەكى مىڭنان اسا ادام اقىسىن تولەپ، تىنىعىپ كەتكەن بولاتىن. ولاردىڭ دەنى ستۋدەنتتەر مەن كەڭسە قىزمەتكەرلەرى بولاتىن. نو جي حياننىڭ ايتۋىنشا.
وسى ورايدا مىناداي دەرەك كەلتىرە كەتكەندى ءجون كورىپ وتىرمىز: ەكونوميكالىق ىنتىماقتاستىق جانە دامۋ ءۇيىمىنىڭ مالىمەتىنشە، 2017 -جىلى وڭتۇستىك كورەيا تۇرعىندارى ورتاشا ەسەپپەن العاندا 2024 ساعات جۇمىس ىستەگەن. بۇل ۇلكەن كورسەتكىش. اتالعان ەلدى بۇل جاعىنان تەك مەكسيكا مەن كوستا- ريكا ازاماتتارى عانا ارتقا تاستاعان.
«مەنىڭ ىشىمدەگى تۇرمەدە» «تۇتقىندارعا» (مەيماندارعا) تەك جازاسىن وتەۋشىلەر كيەتىن كيىم، ماتراس، شاي ىشەتىن ىدىس- اياق، قالامساپ پەن بلوكنوت بەرىلەدى. سوسىن اۋماعىن بەس شارشى مەتردەن اسپايتىن، نە قابىرعاسىندا ءىلۋلى تۇراتىن ساعاتى جوق، نە ايناسى جوق كامەراعا جالعىز قاماپ تاستايدى. سىرتىنان قۇلىپتاپ. مۇنداعى مەيماندار تۇرمەدەگى سەكىلدى قاتاڭ تارتىپكە باعىنادى.
كورشى كامەراداعىلارمەن سويلەسۋگە تىيىم سالىنعان. اجەتحانادان جانە «تۇرمە» قوجايىنى بەرگەن اتالعان زاتتاردان باسقا ەشتەڭە جوق كامەرادا «تۇتقىندار» ماتراسىن توسەپ، ەدەندە ۇيىقتايدى. قالتا تەلەفونى «تۇرمە» قوجايىنىنىڭ قولىندا. كامەراداعىلارعا سىرتقى الەممەن بايلانىسۋعا تىيىم سالىنعان.
تاڭعى اسقا كۇرىش بوتقا بەرىلەدى. ال تۇسكى اسقا بۋعا پىسىرىلگەن باتات پەن بانان كوكتەيلى عانا بەرىلەدى. ماسەلەن، پاك حە ري ەسىمدى 28 جاستاعى ستارتاپ مەنەدجەرى ارتىق- كەمى جوق تۇپ- تۋرا ءبىر تاۋلىككە، ياعني، 24 ساعات قامالعانى ءۇشىن «تۇرمە» قوجايىنىنىڭ قولىنا قالتاسىنان 1000 ۆون (ۆون - كارىستەردىڭ ۇلتتىق ۆاليۋتاسى) ساناپ بەرگەن بولاتىن. «بۇل تۇرمە ماعان بوستاندىق سىيلايدى»، - دەپ اعىنان اقتارىلدى ول.
islam.kz
