قازاقستاندا ەر ادامداردىڭ قانشا پايىزى تەمەكى شەگەدى؟

دۇنيەجۇزىلىك دەنساۋلىق ساقتاۋ ۇيىمىنىڭ زەرتتەۋ مالىمەتىن ق ر دەنساۋلىق ساقتاۋ مينيسترلىگىنىڭ قوعامدىق دەنساۋلىق ساقتاۋ ۇلتتىق ورتالىعى ءبولىسىپ وتىر. ورتالىقتىڭ حابارلاۋىنشا، قازاقستانداعى دەنساۋلىق ساقتاۋ سالاسىنىڭ ۇلعايىپ كەلە جاتقان ۇلكەن پروبلەماسىنا جۇقپالى ەمەس اۋرۋلار جانە ولاردىڭ قاۋىپ فاكتورلارى (تەمەكىنى تۇتىنۋ، ىشىمدىكتى شەكتەن تىس پايدالانۋ، دۇرىس تاماقتانباۋ جانە دەنە قيمىلىنىڭ ازايۋى) جاتادى.

«دۇنيەجۇزىلىك دەنساۋلىق ساقتاۋ ۇيىمى جۇرگىزگەن زەرتتەۋلەردىڭ ناتيجەلەرى بويىنشا، قازاقستاندا ەر ادامداردىڭ 44 پايىزى تەمەكى شەگەدى، 54 پايىزى ىشىمدىك ىشەدى. قازاقستاندا الكوگولدى تۇتىنۋ دەڭگەيى - ەۋروپا ايماعىنداعى ەڭ جوعارى كورسەتكىشتەردىڭ ءبىرى. 2016-جىلى بۇل كورسەتكىش ەر ادامدا جىلىنا شامامەن 25,0 ليتر الكوگولدى، ال ايەلدەردە 8,9 ليتردى قۇرادى. جاستاردىڭ 57 پايىزدان استامى (15-19 جاس) سوڭعى 30 كۇندە ءبىر ۋاقىتتا 60 جانە ودان دا كوپ گرام ىشىمدىك ىشكەن»، - دەلىنگەن قوعامدىق دەنساۋلىق ساقتاۋ ۇلتتىق ورتالىعىنىڭ حابارلاماسىندا.

ورتالىقتىڭ حابارلاۋىنشا، تەمەكىگە سالىناتىن سالىقتى كوتەرۋ -تەمەكىنىڭ قولجەتىمدىلىگى مەن ونى تۇتىنۋدىڭ تومەندەۋىنە اكەلەدى.

«د د س ۇ ۇسىنىستارىنا سايكەس، ورتاشا جانە تومەن كىرىسى بار ەلدەردە الكوگولگە قارسى ساياساتقا قاتىستى ەڭ ءتيىمدى شارالار الكوگولدىك ىشىمدىكتەرگە اكتسيزدىك سالىقتاردى كوتەرۋ، الكوگولدى جارنامالاۋعا تىيىم سالۋلار نەمەسە شەكتەۋلەردى قابىلداۋ جانە ساقتاۋ بولىپ وتىر»، - دەلىنگەن حابارلامادا.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى