مەككەدە قوناق ءۇي سالدىرعان دوسجان يشاننىڭ ءمورى مۋزەيگە تاپسىرىلادى

اقتوبە وبلىسى، تەمىر اۋدانىنىڭ تۇرعىنى بۇعان دەيىن ءموردى 1 ميلليون تەڭگەگە باعالاعان بولاتىن. اۋدان اكىمى جولداس قالماعانبەتوۆ ءمور شۇبارقۇدىق تۇرعىنىنان دوسجان يشان ۇرپاعىنا بەرىلگەنىن، ۇرپاعى ونى مۋزەيگە تاپسىراتىنىن حابارلادى.

«ءارقيلى سەبەپتەرمەن جەكە ادامنىڭ قولىندا ساقتالعان دوسجان حازىرەتتىڭ ءمورى زاڭدى مۇراگەرى، اتانىڭ شوپشەگى اسقار حابيبۋلليننىڭ قولىنا ءتيدى. اسقار باۋىرىمىز حازىرەتتەن قالعان قۇران كىتابى مەن ءموردى وبلىستىق مۋزەيگە تاپسىرۋدى ماقسات ەتىپ وتىر. موردە ارابشا: «اللاعا قۇلشىلىق ەتۋشى موللا دوسمۋحامماد يبن قاشاق 1248» (حيجرا جىل ەسەبىمەن) دەپ جازىلعان. قاسيەتتى جادىگەردىڭ ەل يگىلىگىنە اينالاتىندىعىنا قۋانىشتىمىن. بابانىڭ مۇراسىن ىزدەگەن باۋىرىمىز اسقارعا، سونشاما جىل مۇقيات ساقتاعان شۇبارقۇدىقتىڭ تۇرعىنىنا شىنايى العىسىمدى بىلدىرەمىن»، - دەپ جازدى اۋدان اكىمى ج. قالماعانبەتوۆ.

ايتا كەتەيىك، اۋدانداعى دوسجان يشان مەشىتى قايتا قالپىنا كەلتىرىلەدى. بۇل جۇمىس كەلەر جىلى اياقتالادى. سونىمەن قاتار حازىرەت ۇرپاقتارى بۇلاق كوزىن اشىپ، ەل يگىلىگىنە پايدالانۋعا بەرىپ قويعان.

«بۇل ءمور اۋىل تۇرعىنىنىڭ قولىندا 10 جىلعا جۋىق ۋاقىت ساقتالدى. ءبىز ىزدەپ، جان- جاقتان سۇراپ، ساقتاۋشىنى تاپتىق. كوپ قارجى سۇرادى، ءبىراق ورتاق كەلىسىمگە كەلدىك. بۇگىن تاڭەرتەڭ كەلىپ، الىپ، العىسىمىزدى بىلدىردىك. قازىر وزىمىزدە اتامىز ۇستاعان قۇران كارىم بار. دوسجان يشان قورىمىندا اشىق اسپان استىنداعى مۋزەي بولادى. كەلەر جىلى جۇمىس اياقتالعان سوڭ ءمور مەن كىتاپتى مۋزەيگە تاپسىرامىن. قۇندى جادىگەردى تەك ءبىر وتباسى ەمەس، وسكەلەڭ ۇرپاق كورىپ، ءبىلىپ ءوسۋى ءتيىس»، - دەدى دوسجان يشان ۇرپاعى اسقار حابيبۋللين.

دوسجان يشاننىڭ ەكى ءمورى بولعان. ءبىرى ءتوس ءمورى، ەكىنشىسى قول ءمورى. قول ءمورى تابىلمادى.

اۆتور التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى