موڭعوليا كومپوزيتورى بۇركىتشى قىز ايشولپانعا تۋىندى ارنادى
جيىنعا قازاقستاننىڭ تۇكپىر-تۇكپىرىنەن جانە الىس-جاقىن شەت ەلدەردەن ارنايى شاقىرىلعان ديريجەرلەر قاتىستى.
ولاردىڭ ءبىرى - كوپتەگەن حالىقارالىق بايقاۋلاردىڭ لاۋرەاتى، الەمدىك دەڭگەيدەگى مۋزىكانت، سوليست، كومپوزيتور، «كۇمىس اعاش» يەگەرى چينبات ورحونبااتار ەرتىس وڭىرىندە وتەتىن فەستيۆالدە بۇركىتشى قىز ايشولپانعا ارناعان تۋىندىسىنىڭ تۇساۋىن كەسۋدى جوسپارلاپ وتىرعانى تۋرالى جاڭالىقپەن ءبولىستى.
«قازاقستانعا، پاۆلودار وڭىرىنە العاش رەت كەلگەنىمە وتە قۋانىشتىمىن. 2012 -جىلى پاۆلودار قالاسىنىڭ وركەسترى تالعات كارىموۆپەن بىرگە سەۋلدە وقىعان كەزدە تانىسقان ەدىك. بۇگىنگى كەزدەسۋ سول دوستىقتىڭ جالعاسى دەسە بولادى. ەرتەڭ سيىردىڭ مۇيىزىنەن جاسالعان موڭعول حالقىنىڭ ۇرمەلى اسپابى - ەۆەر- بۋرەە جانە قازاق حالىق اسپاپتارى وركەسترىمەن ونەر كورسەتەمىن»، - دەيدى چينبات ورحونبااتار.
سونداي-اق، كلاسسيكاعا اينالعان مونتيدىڭ چارداش دەگەن شىعارماسىن وينايمىن. بۇل فەستيۆالگە ارنايى اتى الەمگە تانىلعان بۇركىتشى قىز ايشولپانعا ارناعان «بۇركىتشى قىز» دەگەن شىعارمامدى جازعان ەدىم جانە سول ءتول تۋىندىمدى كورەرمەن قاۋىمعا ۇسىنامىن.
كومپوزيتور رۇستەمبەك وماروۆتىڭ شىعارماشىلىعىمەن جاقسى تانىس ەكەنىن جانە حالىق اسپاپتار وركەسترىنىڭ قۇرىلۋى تۋرالى ءبىراز زەرتتەگەنىن ايتادى. ونەر يەسى جاپونيا، كورەيا، گەرمانيا ەلدەرىنە شاقىرتۋ العان جانە مەندەلسون كونتسەرتىنىڭ قاتارىنان ءۇش بولىمىندە تاريحتا العاش ەۆەر- بۋرەە - موڭعول ۇلتىق اسپابىندا ويناعان. التاي رەسپۋبليكاسى مەملەكەتتىك وركەسترىنىڭ كوركەمدىك جەتەكشىسىمەن بىرگە كەلگەن 26 جاستاعى مۋزىكانت دوبرىنيا ساتين فەستيۆالدە التاي تاقىرىپتارىندا پوپۋري جانە سالتاناتتى «التاي» سيۋيتاسىن ورىندايتىنىن ايتادى. اۆتورى - ۆلاديمير كونچيەۆ.
«رۇستەمبەك وماروۆ وركەسترى ءبىزدى وتە جاقسى قارسى الدى جانە ولاردىڭ التاي حالقىنىڭ مادەنيەتىمەن تانىسۋعا دەگەن قىزىعۋشىلىعى زور. البەتتە، ءبىز كونە التاي انىمەن، يكيلي، امىرگى، توپشۋر، كومىس ۇلتتىق اسپاپتاردا ويناۋدىڭ قۇپياسىمەن بولىسەمىز. بارىنشا ۇلتتىق ەتنيكالىق اسپاپتاردى، مادەنيەتىمىزدى، باتىرلار ەپوستارىنان ءۇزىندى كورسەتكىمىز كەلەدى»، - دەيدى دوبرىنيا ساتين.
بۇدان باسقا، فەستيۆالدە رەسەي مەن قىرعىزستاننىڭ، موڭعوليا مەن قازاقستاننىڭ ەڭبەك سىڭىرگەن قايراتكەرلەرى، مادەنيەت سالاسىنىڭ ۇزدىكتەرى حالىقارالىق كونكۋرستاردىڭ لاۋرەاتتارى ۆلاديمير كونچيەۆ، باقىت تىلەگەنوۆ، جاناس بەكەنتۇروۆ، ءالي الپىسبايەۆ، داۋرەن گلىموۆ، نازىمبەك مولداحمەتوۆ، تالعات كارىموۆ، ەركىن نۇرىمبەتوۆ، نۇرلان توكەي ۇلى، اسەم سەمبينا ونەر كورسەتەدى.
ەسكە سالا كەتەيىك، موڭعوليادا قۇسبەگىلىكپەن اينالىساتىن قازاق قىزى ايشولپان نۇرعايىپ جايلى تۇسىرىلگەن دەرەكتى فيلم «وسكار» كينوسىيلىعىنىڭ شورت-پاراقشاسىنا ەنگەن.
ول وسىدان بىرنەشە جىل بۇرىن بۇركىتشىلەر اراسىندا ۇيىمداستىرىلعان ۇلكەن جارىسقا قاتىسقان سوڭ تانىمال بولا باستاعان.
