تاۋەلسىزدىك جىلدارى شىعارعان «قازاق فيلمنىڭ» مۋلتفيلمدەرىن جەلىدەن كورۋگە بولادى
«قازاق فيلم» كينوستۋدياسى بارلىق قازاقستاندىقتاردى حالىقارالىق انيماتسيا كۇنىمەن قۇتتىقتايدى. بۇل مەرەكە ۇلكەنگە دە، كىشىگە دە ورتاق، ويتكەنى بالا كەزدەن ءسۇيىپ تاماشالايتىن مۋلتفيلمدەر ادام مىنەز-قۇلقىنىڭ قالىپتاسۋىنا اسەر ەتەتىنى بارشاعا ءمالىم. بۇگىندە وتاندىق انيماتسيانىڭ ساپاسى مەن جەتكەن جەتىستىكتەرى دە قۋانتارلىق. مىسالى، جاقىندا عانا گەرمانيادا وتكەن 24-حالىقارالىق بالالار مەن جاس وسپىرىمدەرگە ارنالعان Schlingel فەستيۆالىندە «مۇزبالاق» تولىقمەتراجدى انيماتسيالىق فيلمى سىنشىلاردىڭ جوعارى باعاسىن الىپ، «ۇزدىك انيماتسيالىق فيلم» جۇلدەسىنە يە بولدى»، دەلىنگەن حابارلامادا.
«امەن قايداروۆ نەگىزىن قالاعان وتاندىق انيماتسيا بۇگىندە ەلىمىزدە، سونىمەن قاتار شەتەلدە دە ۇلكەن سۇرانىسقا يە. ساپاسى جاعىنان باتىستىڭ فيلمدەرىنەن كەم تۇسپەيتىن ءبىزدىڭ مۋلتفيلمدەر ۇنەمى حالىقارالىق فەستيۆالدەرگە قاتىسىپ، جۇلدەلى ورىنداردان كورىنىپ ءجۇر.
وزدەرىڭىز بىلەتىندەي، بيىل قىركۇيەكتىڭ ورتاسىندا «قازاق فيلمدە» قازاق كينوسىنىڭ مۇراجايى اشىلعان بولاتىن. وسى مەرەكەگە وراي «قازاق فيلم» كينوستۋدياسى ەلىمىزدىڭ انيماتسيا سالاسىنىڭ دامۋىنا ۇلەس قوسقان كينوگەر ارداگەرلەرىمىزگە ەستەلىك سىيلىقتاردى - قازاق انيماتسياسىنىڭ 50 جىلدىعىنا ارنايى شىعارعان كۇمىس مونەتالار جانە پوشتا ماركاسىن تابىستادى.
انيماتسيا ونەرى - كينو وندىرىسىندەگى ستراتەگيالىق ماڭىزدى ءارى ەڭ قىزىقتى سالالاردىڭ ءبىرى. ءبىز ءۇشىن ءار كورەرمەن قىمبات، سوندىقتان دا انيماتسيا سالاسىندا دا بۇلدىرشىندەرىمىزدىڭ كوڭىلىنەن شىعۋعا تىرىسامىز»، - دەدى «قازاق فيلم» كينوستۋدياسىنىڭ پرەزيدەنتى ارمان اسەنوۆ.
سونىمەن قاتار، كينوستۋديا باسشىسى وسى جىلدىڭ سوڭىنا دەيىن بۇگىنگى قازاق انيماتسياسىنا ارنالعان پوشتا ماركالارىنىڭ جارىققا شىعاتىنىن ايتتى. بۇل ماركالاردا ش. ايمانوۆ اتىنداعى «قازاق فيلم» كينوستۋدياسىنىڭ «انيماتسيالىق كينو» شىعارماشىلىق بىرلەستىگىندە تۇسىرىلگەن مۋلتفيلمدەردىڭ («قوشقار مەن تەكە»، «ماقتانشاق قىز»، «ەر توستىك جانە ايداھار») كادرلارى بەينەلەنەتىن بولادى.
ايتا كەتسەك، ق ر مادەنيەت جانە سپورت مينيسترلىگى تاپسىرىسى بويىنشا ش. ايمانوۆ اتىنداعى «قازاقفيلم» اق- نىڭ تاۋەلسىزدىك جىلدارى جارىققا شىعارعان بىرنەشە انيماتسيالىق فيلمدەردى «قازاق فيلم» كينوستۋدياسىنىڭ youtube جەلىسىندەگى رەسمي ارناسىنان كورۋگە بولادى.
انيماتسيالىق فيلمدەردىڭ ءتىزىمى:
1. «كۇلتەگىن» / رەجيسسەرى - اداي ءابىلدينوۆ / 2017-جىل.
2. «مۇزبالاق» /رەجيسسەرلەرى - تۇردىبەك مايدان، تىلەك تولەۋعازى / 2017-جىل.
3. «تيمۋر مەن جانيك» / رەجيسسەرى - راميل ۋسمانوۆ/ 2010-جىل.
4. «تيمۋر مەن ايداھار» / رەجيسسەرى - راميل ۋسمانوۆ / 2013-جىل.
5. «جەرۇيىق» / رەجيسسەرى - ا. ءابىلدينوۆ / 2013-جىل.
6. «ماقتانشاق قىز» / رەجيسسەرى - راميل ۋسمانوۆ /2011-جىل.
7. «قوشقار مەن تەكە» / رەجيسسەرى - باتىرحان داۋرەنبەكوۆ / 2008-جىل.
8. «ەر توستىك جانە ايداھار» / رەجيسسەرلەرى - جاكەن دانەنوۆ، رۋستام تۇراليەۆ / 2012-جىل.
9. «قازاقستان - ءبىزدىڭ ورتاق ءۇيىمىز» (9 سەريالى انيماتسيالىق تسيكل) /2014-جىل.
10. «قازاق ەلى» /رەجيسسەرى - ب. داۋرەنبەكوۆ/ 2015-جىل.
ودان بولەك، «قازاق فيلم» كينوستۋدياسى قازاق كينوسىنىڭ التىن قورىنا ەنگەن فيلمدەردى، ونىڭ ىشىندە قازاق كينوسىنىڭ كلاسسيگى شاكەن ايمانوۆ تۇسىرگەن بارلىق فيلمدەردى جەلىدەگى ارناسىندا جۇكتەۋدى جوسپارلاپ وتىرعانىن ايتا كەتكەن ءجون.
