وڭتۇستىك كورەيادا بالانى قاعىپ كەتكەن قازاقستاندىق ادۆوكاتىن اۋىستىرادى
بۇل تۋرالى ق ر س ءى م رەسمي وكىلى ايبەك سمادياروۆ بريفينگتە ايتتى، دەپ حابارلايدى قازاقپارات ءتىلشىسى.
«جاقىن ارادا قازاقستان كونسۋلى تەرگەۋ امالدارى قالاي ءجۇرىپ جاتقانىن انىقتايدى. ول قازاقستان ازاماتىنا بىرنەشە رەت بارىپ قايتتى. قازاقستاندىق ازاماتتىڭ تەرگەۋ امالدارىنا قاتىستى شاعىمى جوق. بىزگە بەلگىلىسى - ول قازىر ادۆوكاتىن جەكە مەنشىك ادۆوكاتقا اۋىستىرۋدا.
ول بۇلاي ەتۋگە قۇقىلى. بۇعان دەيىن وندا كورەيا تاراپىنان ۇسىنىلعان ادۆوكات بولعان»، - دەيدى ايبەك سمادياروۆ.
ەسكە سالا كەتسەك، 16- قازان كۇنى قازاقستاندىق ازامات وڭتۇستىك كورەيادا بالانى كولىگىمەن قاعىپ كەتكەن بولاتىن. ول بۇل مەملەكەتتە ءبىر جىلدام استام ۋاقىت بويى زاڭسىز تۇرىپ كەلگەن. بۇگىنگى تاڭدا چانۆون قالاسىنداعى تەرگەۋ يزولياتورىندا جاتىر.
سونداي-اق ، وڭتۇستىك كورەيادا كولىگىمەن بالانى قاعىپ كەتكەن قازاقستاندىق ازاماتقا بىرنەشە ايىپ تاعىلعان بولاتىن.
