انكارادا قازاقستان جاستارى اراسىندا فۋتبولدان جارىس ءوتتى
شارانى قازاقستاننىڭ تۇركياداعى ەلشىلىگى ۇيىمداستىردى، دەپ حابارلايدى قازاقپارات.
«رۋحاني جاڭعىرۋ» مەملەكەتتىك باعدارلاماسى اياسىندا قازاقستانداعى جاستار جىلىنا وراي وتكەن ءىس-شاراعا انكارا، ستامبۋل، يزمير، بۋرسا، كاستامونۋ، كونيا، كارابۋك، كايسەري، ساكاريا جانە ەسكيشەحير قالالالارىنىڭ جەتەكشى ۋنيۆەرسيتەتتەرىندە ءبىلىم الاتىن 300 گە جۋىق قازاقستاندىق ستۋدەنتتەر، ماگيسترانتتار مەن دوكتورانتتار قاتىستى.
تەڭبىل دوپ دوداسىنىڭ اشىلۋ سالتاناتىندا ءسوز سويلەگەن قازاقستاننىڭ تۇركياداعى ەلشىسى ابزال ساپاربەك ۇلى وتكەن جىلدىڭ قازان ايىندا ەلباسى نۇرسۇلتان نازاربايەۆتىڭ قازاقستان حالقىنا جولداۋىندا 2019-جىلدى جاستار جىلى دەپ جاريالاۋدى ۇسىنعانىن ەسكە سالدى.
«مەملەكەتىمىز سىزدەرگە ۇلكەن ءۇمىت ارتىپ وتىر. ەلباسى نۇرسۇلتان نازاربايەۆ اتاپ وتكەندەي، جاستار ەلىمىزدىڭ باسەكەگە قابىلەتتىلىگىنىڭ ماڭىزدى فاكتورى. بۇگىنگى تاڭدا تەك مەملەكەتتەر اراسىندا عانا ەمەس، ادامدار اراسىندا دا باسەكەلەستىك بار. عىلىم مەن ءبىلىمدى كوتەرەتىن جانە جاسامپاز ۇرپاق بولاتىن ەل عانا جەڭىسكە جەتەدى»، - دەدى ەلشى.
سونداي-اق، قازاقستان مەن تۇركيا اراسىنداعى باۋىرلاستىق قارىم-قاتىناستاردى اتاپ وتكەن ەلشى ا. ساپاربەك ۇلى مەملەكەت باسشىسى قاسىم-جومارت توقايەۆتىڭ حالىققا جولداۋىنا توقتالا وتىرىپ، قازاقستان رەسپۋبليكاسى پرەزيدەنتىنىڭ جانىنداعى جاستار كادر رەزەرۆى باستاماسى تۋرالى باياندادى.
اشىلۋ سالتاناتىندا ءسوز سويلەگەن بىلىمگەرلەر، جارىسقا قاتىسۋشىلارعا جىلى لەبىزدەرىن جەتكىزىپ، ەلشى ا. ساپاربەك ۇلىنا جاستارعا كورسەتكەن قولداۋى ءۇشىن العىستارىن ءبىلدىردى.
انكارا، كايسەري جانە ىستانبۇل قالالارىنان 2 قۇرامالار، يزمير، بۋرسا، كاستامونۋ، كونيا، كارابۋك جانە ساكاريا قۇرامالارى قاتىسقان جارىستا بارلىعى 12 توپ دوداعا ءتۇستى. جارىستا بۋرسا قالاسىنىڭ قۇراماسى ۇزدىك بولىپ، ەكىنشى ورىندى انكارا قالاسىنىڭ كارا حارپ اسكەري ۋنيۆەرسيتەتىنىڭ قۇراماسى، ال ءۇشىنشى ورىندى كونيا قالاسىنىڭ قۇراماسى يەلەندى.
