پرەزيدەنت ماسكەۋدە قازا تاپقان قازاقستاندىق بويجەتكەننىڭ اناسىمەن سويلەستى
بۇل تۋرالى Instagram-داعى پاراقشاسىندا جاننا احمەتوۆا جازدى، دەپ حابارلايدى قازاقپارات.
«قازاقستان پرەزيدەنتى قاسىم-جومارت كەمەل ۇلىنا @tokayev_online العىس ايتۋ پوستى. پرەزيدەنت مىرزا، مەنىڭ قايعىما ورتاقتاسقانىڭىز ءۇشىن راحمەت. مەنى قابىلداعانىڭىز ءۇشىن، ءسىزدىڭ ءىستى قاراپ، تەكسەرىپ، اق-قاراسىن اجىراتۋ جونىندەگى تاپسىرماڭىز ءۇشىن، ادامگەرشىلىگىڭىز ءۇشىن... ەر جىگىتكە لايىق ءسوز بەرگەنىڭىز ءۇشىن. ق ر پرەزيدەنتى اكىمشىلىگىنىڭ ۇيلەسىمدى جۇمىسى ءۇشىن»، - دەلىنگەن حابارلامادا.
جاننا احمەتوۆا تەرگەۋ ءىسى قالاي ءجۇرىپ جاتقانىن ايتىپ ءوتتى.
«مەن قاجەتتى ساراپتامالاردىڭ دايىن ەمەستىگى جونىندە، كۋاگەرلەردىڭ جوعالىپ كەتىپ جاتقانى، كامەرالار تۇسىرگەن ۆيدەولاردىڭ جوعالىپ جاتقانى، ايعاق زاتتاردىڭ جوعالىپ جاتقانى، كۋاگەرلەردىڭ جاۋاپتارى وزگەرىپ كەتىپ جاتقانى جونىندە بارلىق ساتىعا ارىز جازىپ جاتىرمىن. ق ر پرەزيدەنتى قاسىم-جومارت توقايەۆ مىرزا قول ۇشىن بەرگەننەن كەيىن ىسكە ەرەكشە دارەجە بەرىلىپ، ەكپىن الدى. ول رەسەيدىڭ تەرگەۋ كوميتەتىنىڭ باس تەرگەۋ باسقارماسىنا تاپسىرىلدى. تەرگەۋ توبى قۇرىلدى، جاڭا تەرگەۋشى تاعايىندالدى. ءىس ءبىزدىڭ بارلىق ەسكەرتپەلەرىمىز بەن ۇسىنىستارىمىزدى ەسكەرە وتىرىپ ءادىل تەرگەلەدى. بۇل تەرگەۋ ءىسى قالاي ءجۇرىپ جاتىر دەگەنگە جاۋاپ»، - دەپ جازدى جاننا احمەتوۆا.
ەسكە سالا كەتەيىك، 13- ءساۋىر كۇنى ماسكەۋ مەملەكەتتىك حالىقارالىق قاتىناستار ينستيتۋتى (م م ح ق ي) حالىقارالىق ەكونوميكالىق قاتىناس فاكۋلتەتىنىڭ 4-كۋرسىندا وقيتىن توميريس بايسافا وقۋ كورپۋسىنىڭ 4-ەتاجىنان قۇلاپ كەتكەن بولاتىن. 3- مامىر كۇنى سكليفوسوۆسكي اتىنداعى عىلىمي-زەرتتەۋ ينستيتۋتىندا بويجەتكەن كوز جۇمدى.
