يران الەمدەگى ەڭ ءىرى ءدارى- دارمەك ەكسپورتتاۋشى ەل بولۋدى قالايدى

سوڭعى مالىمەتتەر بويىنشا يران فارماتسيەۆتيكالىق نارىعىنىڭ كولەمى 3,5 ميلليارد دوللاردان اسقان. جىل سايىن بۇل سالا % 8 ءوسىپ كەلەدى. الايدا سىرتقى ساۋداسى ارتقانىمەن، ءوز ەلىن قولجەتىمدى ءدارى- دارمەكپەن قامتۋدا كەيبىر قيىندىقتارى بار.

 بۇگىندە يران - تاياۋ شىعىستاعى ءدارى- دارمەك ءوندىرۋشى ەڭ ءىرى ەل. وسى ورنىن كۇشەيتۋ ماقساتىمەن وكىمەت ءبىرقاتار ءىرى ينفراقۇرىلىمدىق جوبانى جۇزەگە اسىرماق. اراسىنداعى ەڭ اۋقىمدىسى - ماماندانعان وندىرىستىك فارماتسيەۆتيكالىق كلاستەر. وسى جەتستىكتەرىنە قاراماستان، وتكەن جىلدان باستاپ ەڭ قاجەتتى دارىلەردىڭ باعاسى ءوسىپ بارادى.

 حاديس زارە، فارماكولوگيالىق زەرتتەۋلەر سالاسىنىڭ ساراپشىسى:

- يراننىڭ ساقتاندىرۋ جۇيەسى نەگىزىندە رەتسەپت بويىنشا % 50 دەيىنگى جەڭىلدىكپەن ءدارى ساتىپ الۋعا بولادى. تابىسى تومەن جانداردى جانە قاتەرلى ىسىك سەكىلدى اۋىر سىرقاتقا شالدىققان ادامداردى قاجەتتى پرەپاراتتارمەن ارنايى الەۋمەتتىك كومەك ورتالىقتارى نەمەسە مەملەكەتتىك اۋرۋحانالار قامتاماسىز ەتەدى. الەۋمەتتىك ورتالىقتار تابىسى تومەن ازاماتتاردى ۆيرۋستىق اۋرۋلار مەن تۇماۋعا قارسى دارىلەرمەن دە قامتيدى. جەڭىلدىكتەر قانت ديابەتى، ۆيچ سەكىلدى دەرتكە شالدىققاندار ءۇشىن دە قاراستىرىلعان.

 الايدا ا ق ش سالعان سانكسيالاردىڭ كەسىرىنەن سوڭعى جىلدارى ەلدە شەتەلدىك دارىلەردىڭ كوبىسى جوعالىپ بارادى.

 يسا رادجابلۋ، گاستروەنتەرولوگ:

 - سانكسيالاردىڭ سالدارىنان شەتەلدەن جەتكىزە المايتىن دارىلەردى ءوز ەلىمىزدە شىعارا باستادىق. ونى جەرگىلىكتى اۋرۋحانالاردا قولدانىپ، ءدارىحانالاردا ساتا باستادىق. ماماندارىمىز قاتەرلى ىسىك، گەپاتيت، ۆ ي چ سەكىلدى اۋىر سىرقاتتارعا قارسى دارىلەردى جەتىلدىرىپ ءجۇر. ازىرشە كەيبىر وتاندىق دارىلەردى تولىعىمەن ءتيىمدى دەپ اتاۋعا بولمايدى، ءبىراق فارماتسيەۆتەر بۇل باعىتتا جۇمىس ىستەپ كەلەدى.

دارىلەردىڭ ساپاسى ەل تۇرعىندارىنىڭ دەنساۋلىعىنا تىكەلەي اسەر ەتۋى مۇمكىن. ءبىراق ۇكىمەت وكىلدەرى وتاندىق پرەپاراتتار ساپاسى جاعىنان شەتەلدىكتەردەن قالىسپايتىنىنا سەندىرىپ وتىر. ءتىپتى يران فارماكولوگياسىن الەمدەگى ۇزدىكتەر قاتارىنا قوسۋ جوسپاردا بار. ماسەلەن، ءبىر عانا ونكولوگيالىق اۋرۋلارعا قارسى دارىلەردى شىعارۋعا مەملەكەت 100 ميلليون ەۋرودان اسا قاراجات جۇمساعان.

www.24.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى