قانات يسلام «كانەلومەن» جۇدىرىقتاسادى - نەلسون لوپەس
«ءبىز قازىر الەمدىك رەيتينگتە سەگىزىنشى ورىندامىز، ءبىراق ءبىرىنشى بولۋىمىز كەرەك. ەگەر ءبىز چەمپيون بولعىمىز كەلسە، «كانەلونى» جەڭۋىمىز كەرەك. قانداي اتاققا تالاساتىنىمىز ماڭىزدى ەمەس، سوڭىندا «كانەلونى» قازاقستانعا اكەلگىمىز كەلەدى. ءبىز وعان قارسى شىعامىز. ەسكەرتە كەتەيىن، بۇل جەردە ماعان جانە مەنىڭ كومانداما اقشا كەرەك ەمەس. ءبىز جەكپە-جەك وتكىزگىمىز كەلەدى. بۇل - مەنىڭ عانا ەمەس، قانات يسلام مەن دارحان مۇحتاربەكتىڭ دە ارمانى. ءبىز بۇل ءۇشىن بارىمىزدى سالامىز»، - دەدى قانات يسلامنىڭ مەنەدجەرى نەلسون لوپەس .
سونداي-اق، ول ەگەر «كانەلو» جوعارى سالماققا كوتەرىلسە، قانات سول سالماققا اۋىسۋعا دايىن ەكەنىن ايتتى.
«اۋەسقوي بوكستا مەن 69 جانە 75 كەلى سالماق دارەجەسىندە جۇدىرىقتاستىم. جاقىندا 69.9 سالماقتان 72 گە اۋىستىم. قازىر بۇل سالماقتا دەمەتريۋس اندرادە چەمپيون، ءبىز ونىمەن كەزدەسپەدىك. ءبىراق ونىڭ اۋەسقوي بوكستاعى تەحنيكاسى جاقسى. ونىڭ قاتتى سوققىسى جوق، ول اياعىمەن كوپ جۇمىس ىستەيدى. ونى جەڭۋگە بولادى. كانەلو تۋرالى ايتاتىن بولساق، ول قاراپايىم بوكسشى. مۇمكىن، ول كوپ سوققى جاسايتىن شىعار. ءبىراق، ونىڭ ءتورت قولى، ءتورت اياعى جوق قوي. مەن عانا ەمەس، ونىمەن كەز كەلگەن قازاق 12 راۋندقا شىداپ، جۇدىرىقتاسا الادى. ءبىز، قازاقتار، ءوزىمىزدى باعالامايمىز، وزگەلەردى كوتەرمەلەيمىز. ءبىز شەتەلدە جەتىستىككە جەتكەندەردى عانا بىلەمىز. ءبىزدىڭ بوكسشىلاردىڭ ءبارى مىقتى، مەن سولاردىڭ ءبارىن قولداۋعا شاقىرامىن»، - دەپ تولىقتىردى قانات يسلام.
بۇعان دەيىن، قانات يسلام مەكسيكالىق ساۋل «كانەلو» الۆارەسپەن رينگكە شىعۋعا دايىن ەكەنىن ايتقان بولاتىن.
ايتا كەتەيىك، 26- قازاندا بالۋان شولاق اتىنداعى سپورت سارايىندا كاسىپقوي بوكس كەشى وتەدى، وندا قانات يسلام (26-0، 21 KO) مەن ناميبيالىق بوكسشى ۋولتەر كاۋتوندوكۆا (18-، 17 ك و) نەگىزگى جەكپە-جەكتە جۇدىرىقتاسادى.
بوكس كەشى اياسىندا داۋلەت داۋكەنوۆ، ساپارباي ايداروۆ، بەكسۇلتان راۋشانوۆ، نۇرسۇلتان امانجولوۆ، اسقار ەرۋبەك، ارمان رىسبەك جانە رۋسلان مىرساتايەۆ سياقتى قازاقستاندىق بوكسشىلاردىڭ قاتىسۋىمەن 9 جەكپە-جەك وتەدى. ولاردىڭ قارسىلاستارى – ا ق ش، قىتاي جانە ەۋروپا ەلدەرىنىڭ وكىلدەرى.
