سەناتور: قازاق مەكتەپتەرىنىڭ سانىن كوبەيتۋ كەرەك
«الماتى قالاسىنىڭ قۇرامىنا الماتى وبلىسىنان ەكى ۇلكەن جاڭا اۋدان قوسىلدى. وسى اۋدانداردىڭ ماسەلەسى جەتىپ ارتىلادى. ونى دا ەسكەرۋ كەرەك. بۇل ەكى اۋداندا، قۇدايعا شۇكىر، حالىقتىڭ سانى ارتىپ كەلەدى. وسىعان بايلانىستى مەكتەپتەر سالۋ ماسەلەسى بار. اسىرەسە قازاق تىلىندەگى مەكتەپتەردى جىلدان جىلعا كوبەيتۋ كەرەك دەپ ەسەپتەيمىز. ويتكەنى، ءبىر مەكتەپتى الاتىن بولساق، بىلتىردىڭ وزىندە قازاق تىلىندە وقيتىن 13 سىنىپ اشىلعان. ءتىپتى ءبىر سىنىپتىڭ وزىندە 40-42 بالادان وتىرادى. سوندىقتان، بولاشاقتا وسى ماسەلەنى دە ەسكەرۋ كەرەك» ، - دەدى دينار نوكەتايەۆا.
سونىمەن بىرگە، سەناتور الماتى قالاسىنىڭ شەتىندەگى اۋدانداردىڭ اۋىز سۋ ماسەلەسىن دە تىلگە تيەك ەتتى.
«سۋ جۇيەلەرىن رەتكە كەلتىرۋ، كولىكتىك ينفراقۇرىلىم، ىشكى جولدار، مەكتەپتەر مەن اۋرۋحانالاردى سەيسميكالىق سيپاتتا كۇشەيتۋ ماسەلەلەرىن دەر كەزىندە شەشكەن ابزال. ويتكەنى، الماتى قالاسى سەيسميكالىق اۋماقتا ەكەنىن بىلەسىزدەر. نەلىكتەن الماتىدان جىلدان جىلعا قاراجاتتى الىپ قويۋ جاعدايى ۇلعايىپ كەلەدى؟ وسى ماسەلە بويىنشا ۇكىمەت باسشىسى اسقار مامينگە دە سۇراق جولدادىق. سوندىقتان، الماتى قالاسىنا قاراجاتتى بيىلعى بيۋدجەتتەن تاعى قاراستىرۋ كەرەك دەپ ويلايمىن» ، - دەدى ول.
ايتا كەتسەك، بۇگىن قارجى ءمينيسترىنىڭ ءبىرىنشى ورىنباسارى بەرىك شولپانقۇلوۆ پارلامەنت سەناتىنىڭ دەپۋتاتتارىنا 2020-2022 -جىلدارعا ارنالعان رەسپۋبليكالىق بيۋدجەت جوباسىن تانىستىرىپ، ءبىلىم جانە عىلىم جۇيەسىن دامىتۋعا 2020-2022 -جىلدارى 3,7 تىريلليون تەڭگە بولىنگەلى وتىرعانىن ءمالىم ەتكەن بولاتىن.
