قازاقستاندا نەسيە بەرۋ شارتتارى جاقساردى - ءمادينا ءابىلقاسىموۆا
«ۇلتتىق بانك قىزمەتىنىڭ باسىم باعىتى - ەكونوميكانى نەسيەلەۋ دەڭگەيىن ءوسىرۋ. بانكتەردىڭ نەسيە بەلسەندىلىگى بىرتىندەپ قالپىنا كەلە باستادى. بيىل ءساۋىر- قىركۇيەك ارالىعىندا بانك سەكتورىنىڭ كرەديتتىك پورتفەلى 7,4 پايىزعا نەمەسە 921,8 ميلليارد تەڭگەگە ءوسىپ، جالپى 13,4 تىريلليون تەڭگەگە دەيىن ءوستى. زاڭدى تۇلعالارعا كرەديت كولەمى وسى جىلدىڭ I توقسانىندا بيزنەستىڭ جۇمىس ىستەمەيتىن نەسيەلەرىن ەسەپتەن شىعارۋىنا بايلانىستى 8,1 پايىزعا ازايىپ، 7,2 تىريلليون تەڭگە كولەمىندە قالدى» ، - دەدى ءمادينا ءابىلقاسىموۆا پارلامەنت سەناتىنىڭ قارجى جانە بيۋدجەت كوميتەتىنىڭ وتىرىسىنداعى «2020-2022 -جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىنىڭ تانىستىرىلىمىندا.
ۇلتتىق بانك ءتوراعاسى ورىنباسارىنىڭ ايتۋىنشا، قازاقستاندا نەسيە بەرۋ شارتتارى جاقسارعان. تەڭگەمەن بەرىلەتىن بيزنەسكە ارنالعان نەسيەلەر بويىنشا سىياقى مولشەرلەمەسى وتكەن جىلدىڭ قىركۇيەگىندەگى 12,2 پايىزدان بۇگىندە 11,7 پايىزعا تومەندەگەن.
«قازىر بانك جۇيەسىندە كەشەندى تۇردە بانك اكتيۆتەرىنىڭ ساپاسىن تاۋەلسىز باعالاۋ جۇمىسى جالعاسىپ كەلەدى. اكتيۆتەردىڭ ساپاسىن باعالاۋدى وسى جىلدىڭ جەلتوقسانىندا اياقتاۋ جوسپارلانىپ وتىر. 2020 -جىلدىڭ اقپانىندا بانكتەرمەن تۇزەتۋ ءىس- قيمىلدارىنىڭ جەكە جوسپارلارىن تالقىلاپ، بەكىتەمىز. وتكىزىلەتىن ءىس- شارالاردىڭ ناتيجەسىندە بانك جۇيەسىنىڭ اشىقتىعىن ارتتىرىپ، نىعايتۋ كوزدەلگەن. بۇل قادام بانكتەردىڭ ەكونوميكانى نەسيەلەۋ كولەمىن ارتتىرۋعا مۇمكىندىك بەرەدى» ، - دەدى ول.
ءمادينا ءابىلقاسىموۆا ەكونوميكانى نەسيەلەۋ ءۇشىن بانكتەردى ۇزاق مەرزىمدى تەڭگەمەن قورلاندىرۋ ءۇشىن 600 ميلليارد تەڭگەگە «جەڭىلدىكتى نەسيەلەۋ باعدارلاماسى» ىسكە اسىرىلعانىن اتاپ ءوتتى. ونىڭ ايتۋىنشا، بيىل 18 - قازانعا دەيىن بانكتەردە 263,8 ميلليارد تەڭگە سوماعا 368 جوبا قارالىپ جاتىر. قازىرگە دەيىن 46,6 ميلليارد تەڭگەنىڭ 127 نەسيەسى بەرىلىپ قويعان.
