تارباعاتايداعى قاسقىرلى اۋىلدىڭ تۇرعىندارىنا قارۋ ۇستاۋعا رۇقسات بەرىلدى
ەسكە سالايىق، شىعىس قازاقستان وبلىسىنىڭ تارباعاتاي اۋدانىنا قارايتىن احمەتبۇلاق اۋىلىندا ءبىر ءۇيدىڭ 70 باس قويىن قاسقىر قىرىپ تاستاعان ەدى. بۇل وقيعا شامامەن ءبىر ايداي ۋاقىت بۇرىن بولدى. سول كەزدە تۇرعىندار قارۋلارى بولا تۇرا، قاسقىرعا وق اتا المايتىندارىن ايتىپ، ارىزدانعان ەدى. سەبەبى رۇقسات جوق. ال قازىرگى ۋاقىتتا اتالمىش اۋىلدىڭ ەكى تۇرعىنى قاسقىر اتۋعا مۇمكىندىك الدى. ءبىراق ونىڭ دا بەلگىلى ءبىر شارتتارى بار.
- شەكارا شەبىندەگى اۋىلداردا تۇراتىن مىلتىعى بار 15 تۇرعىنعا قاسقىر اتۋعا رۇقسات بەرىلدى. اۋداندىق پروكۋراتۋرا، پوليسيا، ۇلتتىق قاۋىپسىزدىك كوميتەتى جانە شەكارا قىزمەتكەرلەرىمەن كەلىسە وتىرىپ، وسىنداي شەشىمگە كەلدىك. اتاپ ايتار بولساق، جاڭااۋىل اۋىلدىق وكرۋگىنە قارايتىن جاڭاتالاپتان 8, احمەتبۇلاقتان 2 قارۋى بار ادام رۇقسات الدى. ءبىراق ولار قاسقىر اتاۋلىنىڭ ىزىنە ءتۇسىپ، شەتىنەن قىرا بەرمەيدى. بەلگىلى ءبىر شارتتارى بار. ولارعا ءتۇسىندىرىلدى. ماسەلەن، قاسقىر شەكارادان بەرى وتكەندە عانا وق اتادى، - دەدى تارباعاتاي اۋدانىنىڭ اكىمى سەرىكقازى سادۋاقاسوۆ.
