باتىس قازاقستاندىق اقىن قاتارىنان ەكى ايتىستا ءبىرىنشى ورىنعا يە بولدى
«التىن ءدان - 2019» مەرەكەسى مەن جالاعاش اۋدانىنىڭ 80 جىلدىعىنا ارنالعان جىر دوداسىنا رەسپۋبليكا وڭىرلەرى مەن قالالارىنان 10 اقىن قاتىسىپ، باق سىنادى.
ايتىستى اقىن، قازاقستاننىڭ ەڭبەك سىڭىرگەن قايراتكەرى ءجۇرسىن ەرمان جۇرگىزدى.
جالاعاش اۋدانىنىڭ اكىمى قايراتبەك اۋباكىر ۇلى بارلىق اقىندارعا ساتتىلىك تىلەدى.
اقىن، كومپوزيتور، قازاقستاننىڭ ەڭبەك سىڭىرگەن قايراتكەرى، جالاعاش اۋدانىنىڭ قۇرمەتتى ازاماتى ەلەنا ءابدىحالىقوۆا باستاعان قازىلار القاسىنىڭ شەشىمىمەن قىزىلوردالىق مۇحتار نيازوۆ باس جۇلدەنى (1 ميلليون تەڭگە) جەڭىپ الدى.
باتىس قازاقستاندىق تالعات مىقي ءبىرىنشى، تاعى ءبىر قىزىلوردالىق ايدوس راحمەتوۆ ەكىنشى، اتىراۋلىق شالقارباي ءىزباساروۆ ءۇشىنشى ورىنعا يە بولدى.
جەڭىمپاز-جۇلدەگەرلەر مەن بارلىق ايتىسكەرلەرگە اۋدان اكىمىنىڭ ديپلومدارى مەن قارجىلاي سىيلىقتار تابىس ەتىلدى.
ايتا كەتەيىك، ورالدىق تالعات مىقي وسىمەن قاتارىنان ەكىنشى ايتىستا ءبىرىنشى ورىنعا يە بولىپ وتىر.
وتكەن اپتادا نۇر-سۇلتان قالاسىندا ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا «Nur Otan» پارتياسىنىڭ تىكەلەي قولداۋىمەن «بەرەكە بىرلىگىڭدە، ەلىم» اتتى رەسپۋبليكالىق اقىندار ايتىسى ۇيىمداستىرىلعان بولاتىن.
مۇندا ەلوردالىق ەركەبۇلان قاينازاروۆ باس جۇلدەنى (2 ميلليون تەڭگە) ەنشىلەسە، تالعاتقا ءبىرىنشى ورىن (1,5 ميلليون تەڭگە) بۇيىرعان-تۇعىن. تاعى ءبىر باتىس قازاقستاندىق جانسايا مۋسينا مەن نۇرسۇلتاندىق بەكزات اسقاروۆ ەكىنشى (1 ميلليون تەڭگەدەن)، پاۆلودارلىق اسپانبەك شۇعاتايەۆ پەن تۇركىستاندىق قاليجان ءبىلداش ءۇشىنشى ورىننان كورىنگەن ەدى.
