مەملەكەتتىك تۋدى قوعامدىق ورىنداردا ىلۋگە بولا ما: بايبەكتىڭ جاۋابى
«حالىقارالىق تاجىريبەنى قاراستىرساق، ءاربىر ەلدىڭ ءوزىنىڭ ۇلتتىق رامىزدەرىن كەڭىنەن پايدالاناتىنىن كورەمىز. مىسالى، ا ق ش پەن تۇركيادا كوشەلەر جالاۋشالارمەن بەزەندىرىلگەن. ولار شام باعانالارى اراسىنا تارتىلىپ، جەكە اۋلالاردا، تۇرعىن ۇيلەر ىشىندە، قوعامدىق ورىنداردا، تۋريستىك نىسانداردا ىلىنگەن. ال ءبىزدىڭ قوعامدا وكىنىشكە وراي، «مەملەكەتتىك تۋدى پايدالانۋعا جانە ىلۋگە رۇقسات جوق» دەگەن جالعان ستەرەوتيپ قالىپتاسقان. جۇرتشىلىقتى وسى ستەرەوتيپتەن ارىلتۋ ءۇشىن پارتيا «مەنىڭ تۋىم، مەنىڭ وتانىم!» پاتريوتتىق اكسياسىن قولعا الدى»، - دەدى باۋىرجان بايبەك مەملەكەتتىك رامىزدەر مەن ناگرادالار گەرالديكاسى جونىندەگى رەسپۋبليكالىق كوميسسيا وتىرىسىندا.
بۇل اكسيا ەلىمىزدىڭ تۋىن قوعامدىق ورىنداردا، تۋريستىك نىسانداردا جانە مارشرۋتتاردا، ساۋدا ورتالىقتارىندا، جوعارى جانە ارناۋلى وقۋ ورىندارىندا جاپپاي ءىلۋدى كوزدەيدى.
ءتوراعا ورىنباسارىنىڭ ايتۋىنشا، «Nur Otan» پارتياسىنىڭ قولداۋىمەن 10- قازاندا الماتى قالاسىندا مەدەۋ سپورت كەشەنى اۋماعىندا بيىكتىگى 40 مەتر بولاتىن تۋتۇعىر ورناتىلىپ، بايراق كوتەرىلدى. اتىراۋ مەن قوستانايدان باسقا، بارلىق وبلىس ورتالىقتارىندا بيىك تۇعىردا مەملەكەتتىك تۋ ءىلىنىپ تۇر.
كوميسسيا ءتوراعاسى - مەملەكەتتىك حاتشى قىرىمبەك كوشەربايەۆ اتالعان پاتريوتتىق اكسياعا جان-جاقتى قولداۋ كورسەتۋدى تاپسىردى.
«ۋاكىلەتتى ورگانداردا، اۋداندىق جانە قالالىق اكىمدىكتەردە، شالعايداعى اۋىلدىق وكرۋگتەردە مەملەكەتتىك رامىزدەردى قولدانۋ جانە ناسيحاتتاۋ سالاسىنداعى جۇمىسىنا باقىلاۋ كۇشەيتىلسىن»، - دەپ تاپسىرما بەردى مەملەكەتتىك حاتشى.
ايتا كەتەيىك، ق ر «مەملەكەتتىك رامىزدەرى تۋرالى» زاڭىنىڭ 13-بابىندا «قازاقستان رەسپۋبليكاسىنىڭ مەملەكەتتىك رامىزدەرىنە قۇرمەتپەن قاراۋدى قالىپتاستىرۋ» تۋرالى ايتىلعان.
ەسكە سالا كەتسەك، بۇگىن اقوردادا مەملەكەتتىك رامىزدەر مەن ۆەدومستۆولىق جانە ولارعا تەڭەستىرىلگەن وزگە دە ناگرادالار گەرالديكاسى ماسەلەلەرى جونىندە رەسپۋبليكالىق كوميسسيا وتىرىسى ءوتتى. وتىرىستا ق ر مادەنيەت جانە سپورت ءمينيسترى اقتوتى رايىمقۇلوۆا مەملەكەتتىك رامىزدەردىڭ يمپورتىنا تىيىم سالۋدى ۇسىندى.
سونىمەن بىرگە، مەملەكەتتىك ورگانداردىڭ ۆەدومستۆولىق ناگرادالارىنىڭ دارەجەلەرى الىنىپ تاستالىپ، ۇقساس ناگرادالار بىرىكتىرىلەدى.
