قاراعاندىدا عالىمدار التىن وردا تاريحىن تالقىلاۋدا

كونفەرەنسيانىڭ اشىلۋى قاراعاندى قالاسىنىڭ دوستىق ۇيىندە ءوتتى.

«سارىارقا جەرى تاريحقا وتە باي. ونى زەردەلەپ، ءدۇيىم جۇرتقا پاش ەتۋ ءبىزدىڭ پارىزىمىز. ۇلىتاۋ وڭىرىندە التىن وردا تاريحىنا قاتىستى اسا باعالى تاريحي ەسكەرتكىشتەر وتە كوپ، ولاردىڭ ءبىرى - ونىڭ نەگىزىن قالاعان جوشى xاننىڭ كەسەنەسى. مەملەكەت باسشىسى قاسىم- جومارت توقايەۆ « ۇلىتاۋ-2019» حالىقارالىق تۋريستىك فورۋمىندا جوشى حاننىڭ كەسەنەسىن مادەني تۋريزم نىسانىنا اينالدىرۋ قاجەتتىگى تۋرالى ايتقان بولاتىن»، - دەدى وبلىس اكىمى جەڭىس قاسىمبەك.

ول مەملەكەت باسشىسىنىڭ التىن وردا تاريحىن جاڭا كوزقاراستار تۇرعىسىندا زەرتتەۋ مەن ونىڭ نەگىزىن قالاعان جوشى حاننىڭ ەسىمىن ۇلىقتاۋ ارقىلى مەملەكەتتىك يدەولوگيانى قالىپتاستىرۋدىڭ باسىم باعىتتارى ەكەندىگىن اتاپ كورسەتكەنىن اتاپ ءوتتى.

سونداي- اق جەڭىس قاسىمبەك التىن وردا كەزەڭى تۋرالى ناقتى تاريحي فاكتىلەر الۋ ءۇشىن قاراعاندى وبلىسىندا عىلىمي- زەرتتەۋ جۇمىستارى ءجۇرىپ جاتقانىن ايتتى. كونفەرەنسيا بارىسىندا وسى زەرتتەۋدىڭ العاشقى ناتيجەلەرى باياندالادى. سارىارقانىڭ تاريحي ەسكەرتكىشتەرى تۋرالى كوركەم فيلم ءتۇسىرىلىپ، عىلىمي-تانىمدىق جيناق شىعارىلادى. ۇلىتاۋدا تۋريستەردىڭ جايلىلىعى ءۇشىن ينفراقۇرىلىمدىق جوبالار ىسكە اسىرىلۋدا. 2030 -جىلعا قاراي بۇل وڭىرگە كەلەتىن تۋريستەر اعىنى 100 مىڭ ادامعا دەيىن جەتۋى كەرەك.

«التىن وردانىڭ 750 جىلدىعىن تويلاۋ - بۇل، ءبىرىنشى كەزەكتە عىلىمي جوبا. «قوعامدىق سانانى جاڭعىرتۋ» باعدارلاماسىنىڭ ءبىر بولىگى تاريحتى تۇتاس قابىلداۋ بولىپ تابىلادى. قازاقستان اۋماعىندا، ونىڭ ىشىندە قاراعاندى وبلىسىنىڭ اۋماعىندا بولعان كوپتەگەن تاريحي وقيعالار كەيبىر سەبەپتەرگە بايلانىستى ءالى كۇنگە دەيىن تولىق زەرتتەلمەگەن. سوندىقتان مەملەكەت وسى ماسەلەگە ەرەكشە نازار اۋدارۋدا. بۇگىنگى كونفەرەنسيا التىن وردانىڭ 750 جىلدىعىن تويلاۋدىڭ باستاماسى. سونىمەن قاتار، التىن وردا تاريحىنا دەگەن قىزىعۋشىلىق قازاقستانعا كوپتەگەن تۋريستەردى تارتۋعا كومەكتەسەدى. مۇنىڭ ءبارى ەلىمىزدىڭ دامۋىنا ءوز ىقپالىن تيگىزەدى»، - دەيدى ۇلىتاۋ اۋدانىنىڭ اكىمى بەرىك ءابدىعالي ۇلى.

التىن وردانىڭ مەرەيتويىنا قاتىستى نەگىزگى شارالار كەلەسى جىلى وتەدى. كوپتەگەن عىلىمي زەرتتەۋلەر، كىتاپتاردىڭ تۇساۋ كەسەرى مەن كوركەم فيلمدەردىڭ ءتۇسىرىلىمى، وسى كەزەڭمەن بايلانىستى ەسكەرتكىشتەردى قالپىنا كەلتىرۋ، بەزەندىرۋ جانە اباتتاندىرۋ جۇمىستارى جۇرگىزىلەدى. سونىمەن قاتار ايماقتىق عىلىمي كونفەرەنسيالار وتەدى. مۇنىڭ ءبارى ورتاعاسىرداعى قازاقستان تاريحىنا، ونىڭ ىشىندە التىن وردا - جوشى ۇلىسىنا دەگەن قىزىعۋشىلىقتى ارتتىرادى.

«سارىارقا جانە التىن وردا: ۋاقىت پەن كەڭەستىك» حالىقارالىق كونفەرەنسياسىندا قاتىسۋشىلار ءوز باياندامالارىن وقىدى. وندا التىن وردا اتاۋلارى، سول كەزەڭدەگى تاريحي- مادەني مۇرالار، تابىلعان ارحەولوگيالىق سۇيەكتەرگە جاسالىپ جاتقان گەنەتيكالىق تالداۋلار، التىنوردالىق توقتى حانىنىڭ بيلىك باسىنا كەلۋىندەگى تاريحي- قۇقىقتىق اسپەكتىلەر، تابىلعان ەسكەرتكىشتەرگە جاسالىپ جاتقان ورگانيكالىق زەرتتەۋلەر تۋرالى ءسوز قوزعالدى.

سونىمەن قاتار كونفەرەنسيا اياسىندا وبلىستىق تاريحي- ولكەتانۋ مۇراجايى دايارلاعان «ۇلىتاۋ - التىن وردانىڭ التىن بەسىگى» اتتى كورمە ۇيىمداستىرىلدى. ەكسپوناتتار اراسىندا وتكەن جىلى بولعان انا كەسەنەسىنە جۇرگىزىلگەن ارحەولوگيالىق زەرتتەۋ جۇمىستارى كەزىندە جاسالعان سۋرەتتەر مەن تابىلعان زاتتار، اتاپ ايتساق، التىن كەسە مەن اشەكەي بۇيىمدار قويىلعان.

كونفەرەنسيا قاتىسۋشىلارى ءۇشىن تەاترلاندىرىلعان قويىلىم مەن گالا- كونسەرت ۇيىمداستىرىلدى.

سونداي-اق، قاراعاندى وبلىسىنىڭ قولونەرشىلەرى مەن تاۋار وندىرۋشىلەرىنىڭ كورمە- جارمەڭكەسى ءوتتى. ۇيىمداستىرۋشىلار اتاپ وتكەندەي، وسى حالىقارالىق عىلىمي- تاجىريبەلىك كونفەرەنسيانى الەم تاريحىنىڭ ورتاعاسىرلىق كەزەڭىندەگى ساياسي، تاريحي، مادەني جانە گەوگرافيالىق بەت- بەينەسىنە تۇبەگەيلى وزگەرىستەر اكەلگەن جوشى ۇلىسىنىڭ مۇرالارىن زەرتتەۋگە قوسقان ۇلەسى دەۋگە بولادى. 24 جانە 25 -قازان كۇندەرى كونفەرەنسياعا قاتىسۋشىلار جەزقازعان وڭىرىنە بارادى، وندا ولار تاريحي ەسكەرتكىشتەردى ارالايدى.

اۆتور: اگاتا مۋحامەدجانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى