ەلوردادا قازاقتىڭ ءۇش بيىنە جانە ءال- فارابيگە كوشە اتاۋى بەرىلۋى مۇمكىن

«2019 -جىلدىڭ 3 - قازانىندا وتكەن نۇر- سۇلتان قالالىق ونوماستيكا كوميسسياسىنىڭ وتىرىسىندا ەلوردامىزدىڭ 8 قۇرامداس بولىگىنە اتاۋ بەرۋ تۋرالى ۇسىنىس قولداۋ تاپتى. ءبىرىنشىسى - اكىمدىككە جولدانعان مەملەكەتتىك حاتشىنىڭ «قالامگەرلەر اللەياسىن» اشۋ تۋرالى وكىمىنە سايكەس، نۇر- سۇلتان قالاسىنىڭ بايقوڭىر اۋدانىنداعى اباي داڭعىلىنىڭ بويىندا ورنالاسقان ءالمۇقان سەمبينوۆ كوشەسىنەن باستالىپ، ەگەمەن قازاقستان كوشەسىندە اياقتالاتىن اتاۋسىز اللەياعا «قالامگەرلەر اللەياسى» اتاۋىن بەرۋ تۋرالى ۇسىنىس»، - دەدى تىلەۋعالي قىشقاشبايەۆ.

باسقارما باسشىسى، ەكىنشىدەن، «اراي» ساياباعىنا «جەتىسۋ» اتاۋىن بەرۋ تۋرالى ۇسىنىس قولداۋ تاپقانىن اتاپ ءوتتى.

«ۇشىنشىدەن، قالا تۇرعىندارى رايىمبەك باتىردىڭ، قازاقتىڭ ءۇش ءبيى - تولە، قازىبەك، ايتەكە بيلەردىڭ، الەم جانە ەۋروپانىڭ بىرنەشە دۇركىن چەمپيونى اناتوليي حراپاتىيدىڭ ەسىمىمەن كوشە اتاۋ ۇسىنىسىن ءبىلدىردى. ونوماستيكا كوميسسياسىنىڭ وتىرىسىندا ول ۇسىنىس، سونىمەن بىرگە ءابۋ ناسىر ءال- فارابيدىڭ 1150 جىلدىعىنا وراي عالىمنىڭ اتىنا كوشە بەرۋ تۋرالى ۇسىنىس قولداۋ تاپتى»، - دەدى ول.

تىلەۋعالي قىشقاشبايەۆ اتالمىش ۇسىنىستاردى قالالىق قوعامدىق كەڭەس مۇشەلەرىنىڭ تالقىسىنا شىعاردى. وعان كەڭەس مۇشەلەرى ءبىراۋىزدان قولداۋ ءبىلدىردى.

بۇل ۇسىنىستار ەندىگى كەزەكتە قالالىق ءماسليحاتتىڭ قاراۋىنا جولدانادى.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى