ايدى اسپانعا شىعارعان كىم؟
بىلاي قاراساڭ، اي جارىقتىق ءوزى باياعىدان اسپاندا(بالا كۇنىمنەن بەرى اسپاننان كورىپ كەلە جاتىرمىن. ونىڭ جەردە ءيا تەڭىزدە، سۋدا جاتىر ەكەن دەگەندى كورگەن دە ەستىگەن دە جوقپىن) تۇرعان، ءبارىمىزدىڭ قاراڭعى تۇنىمىزگە جارىق سىيلاعان تۇنگى شىراعىمىز ەمەس پە. قىسقاسى، قۇدايدىڭ قۇدىرەتىمەن اسپاندا تۇر دەپ ويلايمىز عوي. ەندى سول اۋەلدەن اسپاندا تۇرعان زاتتى، جەردە جاتقان دۇنيەدەي-اق «اسپانعا شىعارىپتى، اسپانعا شىعاردى» دەي بەرەتىنىمىز نەلىكتەن. بۇنداي ءسوزدى ەستىگەن، كورگەن سايىن «اسپاندا تۇرعان نارسەنى اسپانعا شىعاردىسى نەسى» دەپ ويلاي بەرەتىنمىن. الدە ءتامسىل ءسوز بە، نەمەسە وسىنى شىنىمەن اسپانعا شىعارىپ قويعان بىرەۋ بارما ەكەن دەپ قيالدايتىنمىن كەيدە)).
سويتسەم، راسىندا بۇنى بىرەۋ جەردەن اسپانعا شىعارىپتى. جەردەن بولعاندا، ءجاي قارا جەردەن ەمەس، قۇدىقتىڭ ىشىنەن اسپانعا شىعارعان ەكەن. بۇل ءسوزدىڭ شىعۋ تاريحى سودان باستالعان بولسا كەرەك-تى. كەيىن بۇل «ەرلىكتى» ەستىپ، بىلگەن ەل «ايدى اسپانعا شىعارىپتى» دەگەن ءسوزدى ءتامسىل رەتىندە پايدالانا باستاپتى. ول جونىندە بىلمەۋشى مە ەدىڭىز، ەندەشە ءبىلىپ الىڭىز):
باياعىنىڭ باي زامانىندا ءبىر پاقىر مىسكىن ادام جولاۋشىلاپ كەلە جاتادى. ابدەن شولدەگەن سوڭ، سۋ الىپ ىشپەك بولىپ، تۇندە قۇدىققا كەلەدى. قۇدىققا قانجىعاسىنداعى قاۋعاسىن سالىپ تارتسا، ءبىر نارسەگە ىلىنگەن ىدىسى شىقپاي قويادى. «بۇعان نە بولدى؟» - دەپ، ءۇڭىلىپ قاراسا، قۇدىقتىڭ تۇبىنەن اي كورىنەدى. «ءا، ايعا ءىلىنىپ قالعان ەكەن عوي»، - دەپ، جولاۋشى جۇلقي تارتىپ قالعاندا، قاۋعاسى شىعىپ كەتەدى. ال، ءوزى شالقاسىنان تۇسەدى. جەرگە باسىن سوعىپ، ەسەڭگىرەپ قالعان جولاۋشى الدەن ۋاقىتتا كوزىن اشسا، جاڭاعى قۇدىق ىشىندەگى ايى اسپاندا تۇر ەكەن دەيدى. سوندا ول قۋانىپ:
- نە بولسا، و بولسىن، ايدى اسپانعا شىعاردىم-اۋ، ەندى سۋىمدى الا بەرەيىن - دەپتى.
سول جۇرگەننەن مول جۇرگەن الگى جولاۋشى بۇل اڭگىمەسىن تالاي ادامعا، تالاي ەلگە ايتىپ تاراتىپتى. سودان باستاپ «ايدى اسپانعا شىعاردى» ءسوزى ءتامسىل بولىپ كەتىپتى. ايتپاقشى، سول جيھانكەز - الەمگە اتى ءماشھۇر قوجاناسىر اتامىز ەكەن دەيدى بىلەتىندەر.
بەيسەن سۇلتان ۇلى
