قاراعاندىدا «دۇنيەگە كەلەر ءالى تالاي قاسىم» اقىندار بايقاۋىنىڭ جەڭىمپازدارى ماراپاتتالدى
بايقاۋ قاراعاندى وبلىسىنىڭ تىلدەردى دامىتۋ جونىندەگى باسقارماسىمەن «رۋحاني جاڭعىرۋ» باعدارلاماسى اياسىندا ۇيىمداستىرىلدى.
وتكەن جىلدان باستاپ بايقاۋ رەسپۋبليكالىق دەڭگەيدە وتكىزىلەدى. بۇل جولى باق سىناۋ ءۇشىن قازاقستاننىڭ تۇپكىر- تۇپكىرىنەن 42 ادام ءوتىنىم بەردى. قازىلار القاسى 7 ءوڭىردىڭ 15 ۇزدىك ۇمىتكەرىن تاڭدادى. قاتىسۋشىلاردىڭ جاسى 18 دەن 40 قا دەيىنگى ارالىقتا. ولار قاسىم امانجولوۆقا، ءابىش كەكىلبايەۆقا ارناۋلار جانە ەركىن تاقىرىپتاعى تۋىندى سەكىلدى ءۇش تاقىرىپتا ولەڭدەرىن ۇسىنۋلارى ءتيىس بولاتىن.
بايقاۋ قورىتىندىسى بويىنشا باس جۇلدەنى الماتى وبلىسىنان مۇحتار كۇمىسبەك يەلەندى. وعان 500000 تەڭگەگە سەرتيفيكات تابىس ەتىلدى. قازىلار القاسى ءبىرىنشى ورىندى بالقاش قالاسىنىڭ اقىنى ماقات كۇزەمحانعا تاعايىندادى. ەكىنشى ورىندى نۇر- سۇلتاننان كەلگەن ۇلاربەك نۇرعالىم جانە جامبىل وبلىسىنان تابيعات ابايلدايەۆ ءبولىستى. ءۇشىنشى ورىندى تەمىرتاۋدان كەلگەن تاڭساۋلە ەركىن، نۇر- سۇلتاننان كەلگەن ولجاس قاسىم جانە قاراعاندىلىق ەركىن نارىن يەلەندى. بايقاۋدىڭ جەڭىمپازى مەن لاۋرەاتتارى ديپلومدارمەن جانە اقشالاي سىيلىقتارمەن ماراپاتتالدى. ايتا كەتكەن ءجون، «دۇنيەگە كەلەر ءالى قالاي قاسىم» پوەتيكالىق بايقاۋى 2009 -جىلدان بەرى وتكىزىلىپ كەلەدى. وسى جىلدار ىشىندە وعان 300 گە جۋىق ادام قاتىستى.
ۇيىمداستىرۋشىلاردىڭ ايتۋىنشا، بايقاۋدىڭ ماقساتى - جاستار اراسىندا قاسىم امانجولوۆتىڭ ادەبي مۇراسىن ناسيحاتتاۋ، پوەزياداعى جاڭا ەسىمدەردى انىقتاۋ، ولاردىڭ شىعارماشىلىعىن قولداۋ، تاۋەلسىز ەلدىڭ جەتىستىكتەرىن، ونىڭ تاريحي وتكەنىن جانە جارقىن بولاشاعىن دارىپتەۋ.
