باسپانامەن قامتاماسىز ەتۋدىڭ جاڭا باعدارلاماسى بەكىتىلەدى
بۇل تۋرالى ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ءمالىم ەتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ سايلاۋالدى تۇعىرناماسىن ىسكە اسىرۋ اياسىندا جىلدىڭ سوڭىنا دەيىن جاڭا «نۇرلى جەر» باعدارلاماسى بەكىتىلەدى. ول 5 مىندەتتى قامتيتىن بولادى: ءبىرىڭعاي تۇرعىن ءۇي ساياساتىن ىسكە اسىرۋ، حالىقتى ساپالى اۋىز سۋمەن جانە سۋ بۇرۋ قىزمەتتەرمەن قامتاماسىز ەتۋ، كوممۋنالدىق سەكتوردى جاڭعىرتۋ جانە دامىتۋ، تۇرعىن ءۇي قورىن كۇردەلى جوندەۋ جانە جاڭارتۋ، قۇرىلىس سالاسىن دامىتۋ»، - دەدى ب. اتامقۇلوۆ پارلامەنت ماجىلىسىندە «نۇرلى جەر» باعدارلاماسىنىڭ جۇزەگە اسىرىلۋىنا ارنالعان ۇكىمەت ساعاتىندا.
وسى ورايدا، مينيستر ونىڭ تەتىكتەرى ارقىلى بارلىق قازاقستاندىقتار تابىس دەڭگەيگە سايكەس تۇرعىن ۇيمەن قامتاماسىز ەتىلەتىنىن اتاپ ءوتتى.
«باعدارلاما جوباسى قازاقستاندا بۇعان دەيىن قولدانىستا بولعان تۇرعىن ءۇي باعدارلامالارىنىڭ بارلىق اسپەكتىلەرى مەن ارتىقشىلىقتارىن قامتيدى. جاڭا تۇرعىن ءۇي ساياساتىنىڭ يدەولوگياسى - بۇل ءاربىر جۇمىس ىستەيتىن قازاقستاندىق ءوز ۇيىنە يە بولادى. وسى ماقساتتا تۇرعىن ءۇيدىڭ قولجەتىمدىلىگى بىرتىندەپ ارتادى جانە تۇرعىن ۇيگە مۇقتاج ءاربىر وتباسىنا تۇرعىن ءۇي جاعدايىن جاقسارتۋ تەتىگى ۇسىنىلادى»، - دەدى مينيستر.
ودان بولەك، قازىرگى ۋاقىتتا مەملەكەت باسشىسىنىڭ تاپسىرماسىنا سايكەس، «بايتەرەك ديەۆەلوپمەنت» اق، قيك جانە تۇرعىن ءۇي قورىنا كەپىلدىك بەرۋ قورى سياقتى جۇمىس ىستەپ جاتقان وپەراتورلاردى ءبىرىڭعاي وپەراتورعا بىرىكتىرۋ جولىمەن حولدينگتىڭ تۇرعىن ءۇي بلوگىن وڭتايلاندىرۋ جۇمىسى جۇرگىزىلىپ جاتىر. ءبىرىڭعاي وپەراتور جوبانىڭ بارلىق كەزەڭدەرىندە ستراتەگيالىق جوسپارلاۋدان باستاپ جوبالاردى تولىق سۇيەمەلدەۋگە دەيىن تىكەلەي قولداۋدى كەشەندى تۇردە كورسەتەتىن بولادى. مۇندا ينجينيرينگ، سيفرلىق مونيتورينگ جانە كەيىن پايدالانۋعا بەرۋ بىرگە جۇرگىزىلەدى. بۇل رەتتە، تۇرعىن ءۇي قۇرىلىس جيناق بانكى تۇرعىن ءۇي قۇرىلىس جيناقتار جۇيەسىن دامىتاتىن ەلدەگى جالعىز وپەراتور رەتىندە حالىققا جەڭىلدىكپەن تۇرعىن ءۇي قارىزدارىن بەرۋ جونىندەگى جۇمىستى جالعاستىرادى.
«سونىمەن بىرگە، مەملەكەت باسشىسىنىڭ تاپسىرماسى بويىنشا كوپبالالى وتباسىلاردىڭ تۇرعىن ءۇي ماسەلەلەرىن شەشۋ ءۇشىن الداعى 3 جىلدا جىل سايىن قارجىلاندىرۋدى ۇلعايتۋ جانە ونىمەن 10 مىڭ وتباسىن قامتۋ جوسپارلانعان. «باقىتتى وتباسى» (2-10-25) جەڭىلدىكپەن كرەديت بەرۋ باعدارلاماسىنا قاتىسۋشىلاردىڭ سانىن 10 مىڭعا دەيىن ارتپاق»، - دەدى ب. اتامقۇلوۆ.
