الەم ەلدەرىندە ەرەۋىل بەلەڭ الدى
حالىق ەلدە جۇمىسسىزدىقتىڭ جانە جەمقورلىقتىڭ بەلەڭ الۋىنا نارازى. ءتىپتى قوعامدىق قىزمەتتىڭ جۇمىسىنا دا كوڭىلدەرى تولمايدى. ايتۋىنشا، ايماقتا ەلەكتر قۋاتى مەن اۋىز سۋ تاپشى. اشىنعان جۇرت مەملەكەتتىك مەكەمەلەر مەن ەلشىلىكتەر ورنالاسقان جاسىل ايماققا قاراي بەت الدى. ەرەۋىل ءتارتىپ ساقشىلارىمەن قاقتىعىسقا ۇلاستى. اقپارات كوزدەرى پوليسيا حالىققا وق جاۋدىرىپ، كوز جاساۋراتاتىن گاز قولدانعانىن حابارلايدى. سالدارىنان 10 نان استام ادام قازا تاپتى. تاعى 200 گە جۋىق تۇرعىن ءتۇرلى جاراقات العان.
«حالىق ابدەن اشىنىپ وتىر. ءبىزدى ەشكىم توقتاتا المايدى. بيلىكتى اۋىستىرۋ كەرەك. تولىپ كەتكەن پارتيالاردى قولدامايمىز. ۇكىمەتكە الدىمەن ءبىر جىل، كەيىن تاعى ۋاقىت بەردىك. الايدا ءومىرىمىز وزگەرگەن جوق»، - دەسە ەرەۋىلگە شىققانداردىڭ ءبىرى. ەند ءبىرى: «كومەندانتتىق ساعات ەنگىزسە دە ءبىز باسىلمايمىز. مۇمكىن ەمەس نارسەنى تالاپ ەتىپ وتىرعان جوقپىز. بالالارىمىزدىڭ بولاشاعى ءۇشىن شىعىپ وتىرمىز. ولاردىڭ جاقسى ءومىر ءسۇرۋى ءۇشىن جانپيدا»، - دەپ وتىر.
جەرگىلىكتى بيلىك Facebook, Twitter، Instagram, WhatsApp سياقتى بارلىق الەۋمەتتىك جەلىلەر مەن مەسسەندجەرلەردى بۇعاتتاپ تاستادى. بۇل تۋرالى NetBlocks ۇكىمەتتىك ەمەس ۇيىمى مالىمدەدى. سونىمەن قاتار ايماقتا كومەندانتتىق ساعات ەنگىزىلدى. ال يراكتىڭ قوعانىس مينيسترلىگى ەل اسكەرىنە تولىق جاۋىنگەرلىك دايىندىقتا بولۋدى بۇيىرىپ وتىر.
گرەكيادا جەكەمەنشىك سەكتورىنىڭ وكىلدەرى ەرەۋىل جاريالاپ، نارازىلىق شەرۋىن وتكىزدى. سونىمەن قاتار دەمونستراتسياعا مىڭداعان ءمۇعالىم مەن بانك قىزمەتكەرلەرى جانە ب ا ق وكىلدەرى قاتىسقان. كاسىپكەرلەر، ۇكىمەتتىڭ ەڭبەك زاڭىن رەفورمالاۋعا قارسى. سەبەبى، بيلىك ەرەۋىل وتكىزۋ مەن كاسىپوداقتاردى تىركەۋدى وزگەرتپەك. ەرەۋىلشىلەر رەفورما جۇمىسسىزدىقتى ازايتۋعا ەش سەپتىگىن تيگىزبەيدى دەپ وتىر. پارلامەنت بولسا زاڭ جوباسىن وسى ايدا تالقىلاۋى ءتيىس.
ۇكىمەت بۇل ارقىلى كاسىپوداقتىڭ ەركىندىگىن شەكتەمەك. ءبىز بۇعان جول بەرمەيمىز. مۇنداي رەفورمالار ەشقاشان ەشبىر ەلدە جەڭىسكە جەتكەن ەمەس.
«بۇل رەفورما ءبىزدى ورتاعاسىرلىق ەڭبەك جاعدايىنا تۇسىرەدى. سەبەبى كاسىپكەر مەن ولاردىڭ باسەكەلەستىككە قابىلەتىن ارتتىرۋ ءۇشىن عانا جۇزەگە اسىرىلعالى وتىر. ال مەكسيكادا 1968 -جىلى ءتارتىپ ساقشىلارىنىڭ قولىنان قازا تاپقان ستۋدەنتتەردىڭ قۇرمەتىنە ەرەۋىل ءوتتى»، - دەيدى ەرەۋلگە قاتىسۋشىلار.
بۇندا دا شارا تىنىش بولعان جوق. شاھار كوشەلەرىنە شىققاندار پوليسيامەن قاقتىعىسىپ، سالدارىنان 14 ادام جاراقات الدى. ولاردىڭ التاۋى ۇكىمەت جاساعى. ابىروي بولعاندا ادام شىعىنى جوق. وڭىردە قاۋىپسىزدىكتى قامتاماسىز ەتۋ ءۇشىن 2,5 مىڭ جاساق جۇمىلدىرىلدى.
ال فرانسيادا كەرىسىنشە پوليسيا وكىلدەرىنىڭ ايتار نازى بار. دەمونستراتسياعا 20 مىڭعا جۋىق ادام قاتىستى. نارازىلاردىڭ ايتۋىنشا، سوڭعى كەزدەرى ارىپتەستەرىنىڭ اراسىندا ءوز- وزىنە قول جۇمساۋ جيىلەپ كەتكەن. بيىلدىڭ وزىندە 52 وفيسەر سۋيتسيد جاساپتى. ۇكىمەت جاساقتارى بۇعان ەڭبەك جاعدايىنىڭ قيىندىعى سەبەپ دەيدى. سونىمەن قاتار ەلدە بەلەڭ العان ەرەۋىلدەر ءتارتىپ ساقشىلارىنىڭ ابدەن اشۋ- ىزاسىنا تيگەن كورىنەدى. ءتىپتى پوليسياعا شابۋىل جاساعانداردى قاتاڭ جازالاۋ كەرەك دەگەن تالاپ قويىلدى.
