قىتايدا قانات يسلامنىڭ قاتىسۋىمەن بوكس كەشى وتپەك
ال قانات يسلام وندا وتە جاقسى تانىمال، كوپشىلىگى ونىڭ جەكپە- جەكتەرىن ۇنەمى باقىلاپ، تاماشالاپ جۇرەدى. بۇل تۋرالى «Qazaq Promotions» كومپانياسىنىڭ ديرەكتورى دارحان مۇقتاربەك الماتىدا وتكەن باسپا ءسوز ماجىلىسىندە ايتتى.
جيىن بارىسىندا ول QP TV سترەمينگتى پلاتفورماسىنىڭ سەرۆەرى بۇكىل الەمدە ورنالاسقانىن ايتا كەلە، قىتاي نارىعىن پايدالانۋ وتە ماڭىزدى ەكەنىن جەتكىزدى.
«بولاشاقتا قىتايدىڭ تورىندە ۇلكەن شوۋ جاساساق دەگەن جوسپارىمىز بار. الداعى جەكپە- جەكتى قانات ويداعىداي اياقتاسا، وندا چەمپيوندىق بەلدىككە تالاساتىن بولامىز. ەگەر قىتايدا بوكس كەشىن ۇيىمداستىراتىن بولساق، جوق دەگەندە 100 ميلليون ادام ءبىزدىڭ پلاتفورما ارقىلى ونى كورەتىن بولادى. بۇل قازاقستاننىڭ بوكس سالاسىنىڭ دامۋىنا الىپ كەلەدى، قانشاما ميلليونداعان دوللار تۇسەدى جانە ول مەملەكەت قازىناسىنا سالىق بولىپ قۇيىلادى»، - دەدى كومپانيا ديرەكتورى.
سونىمەن قاتار، ول وسى پلاتفورمانىڭ ارقاسىندا الەمدەگى كەز- كەلگەن چەمپيوندى قازاقستانداعى جارىسقا اكەلۋگە بولاتىنىن ايتتى.
«ا ق ش، قىتاي ەلدەرىندە بىزبەن ارىپتەستىكتە جۇمىس ىستەپ جاتقان پروموۋتەرلىك كومپانيالارىمىز بار. QP TV سترەمينگتى پلاتفورماسى قىتايدا تىركەلىپ، ليسەنزياسىن العان جالعىز كانال. ءبىز عانا ولارعا جارىستاردى ەمىن- ەركىن كورسەتە الامىز. سول ءۇشىن ەۋروپا مەن ا ق ش- تىڭ پروموۋتەرلىك كومپانيالارى بىزگە قىزىعۋشىلىق تانىتىپ، ۇسىنىستار جاساپ جاتىر. ويتكەنى ولار قىتايعا كىرە المايدى، وندا Faceebok, Youtube جەلىلەرىنە شەكتەۋ قويىلعان. بىلەسىزدەر قىتايدا وتە ۇلكەن اۋديتوريا بار جانە كوپ ساتىلىم جۇرەدى»، - دەدى دارحان مۇقتاربەك.
بۇعان دەيىن، قازاننىڭ 26- كۇنى بالۋان شولاق اتىنداعى مادەنيەت جانە سپورت سارايىندا قانات يسلامنىڭ قاتىسۋىمەن كاسىپقوي بوكس كەشى وتەتىنى تۋرالى حابارلاعانبىز.
