«ەشتەڭەگە وكىنبەيمىن»: ساپيەۆ كەزىندە گولوۆكيننىڭ كومەگىنەن نەگە باس تارتقانىن مالىمدەدى
سەرىك ساپيەۆ اۋەسقوي رينگتە بىرنەشە رەت جەڭىلگەننەن كەيىن كاسىپقوي بوكستا باق سىناپ كورۋدى جوسپارلاعان ەكەن.
2008-جىلى وعان قازاقستاندىق كاسىپقوي بوكسشى گەننادي گولوۆكين قولداۋ كورسەتۋگە ۋادە بەرگەن. ول كەزدە GGG گەرمانيادا جاتتىعىپ جۇرگەن، وتانداسىن دا سول جەرگە شاقىرىپتى.
«ول كەزدە شىنىمەن دە كاسىپقوي بوكسقا اۋىسقىم كەلدى، الايدا، جاقىندارىمنىڭ قولداۋىنىڭ ارقاسىندا كۇش تاۋىپ، وليمپيادا چەمپيونى اتاندىم. كاسىپقوي بوكستا ءوزىمدى سىناپ كورگەنىمدە جاقسى بولار ەدى، دەگەنمەن، ءبارى وسىلاي بولدى، ەشتەڭەگە وكىنبەيمىن»، - دەپ مالىمدەدى 2012-جىلعى وليمپيادا چەمپيونى.
سونداي-اق سەرىك ساپيەۆ بوكس فەدەراتسياسىنىڭ 2013-جىلى ونىڭ ءومىربايانى نەگىزىندە فيلم ءتۇسىرۋدى ۇسىنعانىن ايتادى. الايدا، ول يدەيانى ىسكە اسىرۋ پروتسەسى تۇسىرىلىمگە اقشا ىزدەۋگە بايلانىستى كەيىنگە قالدىرىلىپتى.
ساپيەۆ فەدەراتسيانىڭ ۇسىنىسىنان باس تارتپاعانىن، ءبىراق كارتينانى تۇسىرۋگە قاراجات ىزدەمەگەنىن مويىندادى. جوبانى ىسكە اسىرۋدى رەجيسسەر اقان ساتايەۆ قولعا الىپتى.
«ءوزىنىڭ ءومىربايانى نەگىزىندە فيلم تۇسىرىلگەنىن كىم جامان كورسىن. فيلمگە سينوپسيس جازۋ بارىسىندا مەن ءوز ومىرىمدەگى فاكتىلەردى ايتتىم. رەجيسسەرلەر مەن سەناريستەر كورەرمەندەرگە قىزىقتى بولاتىن ناقتى سۇراقتار قويدى»، - دەدى سەرىك ساپيەۆ.
سپورت كوميتەتىنىڭ باسشىسى اكتەرلىك تاجىريبەسى مەن ءبىلىمىنىڭ جوقتىعىنا بايلانىستى فيلمنىڭ باستى كەيىپكەرىن ويناۋعا باتىلى جەتپەگەنىن ايتادى، دەگەنمەن كادردا ەپيزودتىق رولدەن كورىنۋگە قارسى ەمەس.
رەجيسسەر اقان ساتايەۆ فيلمنىڭ باستى كەيىپكەرىن سومدايتىن اكتەردى ءالى تاپپاعانىن مالىمدەگەن، ءبىراق سەناري جازۋ جۇمىسى جالعاسۋدا. بولجام بويىنشا، ءتۇسىرىلىم كەلەسى جىلدىڭ باسىندا باستالادى.
