قۋراعان اعاشتارعا جان بىتىرەتىن اقتوبەلىك شەبەر جايلى نە بىلەمىز؟
ورال قالاسىنىڭ تۋماسى قازىر اقتوبە قالاسىنداعى قۋراعان اعاشتارمەن جۇمىس ىستەپ ءجۇر. ول ءارتۇرلى جانۋارلاردىڭ مۇسىنىنەن باستاپ، ادامداردىڭ پورترەتىنە دەيىن جاسايدى.
تامىر بولىپ قيىلىپ قالعان اعاشتارعا ەكىنشى ءومىر سىيلاپ، قازاقتىڭ باتىرلارى مەن سۇلۋلارىنىڭ ءمۇسىنىن ويادى دەپ حابارلايدى KAZ. NUR. KZ ءتىلشىسى.
اقتوبەلىك شەبەردىڭ كىشكەنتاي مۇسىندەرمەن جۇمىس ىستەپ باستاعانىنا توعىز جىلدان اسقان. ال كولەمدى مۇسىندەرمەن اينالىسىپ جۇرگەنىنە التى جىلداي بولىپتى.
«ءوزىم ءۇي جانۋارلارىن، جىلقىنى جاقسى كورەمىن. سولاردىڭ ءمۇسىنىن باستاپ جاسادىم. تاجىريبە جيناپ العاننان كەيىن، اعاشتىڭ مولشەرى كەلسە كەز كەلگەن ءمۇسىندى سالىپ ءجۇرمىن. ۇلكەن مۇسىندەرمەن اينالىسىپ جۇرگەنىمە التى جىلداي ۋاقىت بولدى.
ءتورت جىلدان بەرى سۇرانىسقا جۇمىس ىستەي باستادىم. ات ۇستايتىن اتبەگىلەر اتقا، ءيتتى جاقسى كورەتىندەر ءيتتىڭ مۇسىنىنە تاپسىرىس بەرەدى. تاريحشى كىسىلەرگە ساۋىتىمەن قازاقتىڭ باتىرلارىن جاساپ بەردىم. قازاقتىڭ استاۋلارىن دا جاسايمىن. مەنىڭ استاۋىمنىڭ ەرەكشەلىگى استىندا ەكى باتىر كوتەرىپ تۇرادى»، - دەيدى بولاتبەك بايماعانبەتوۆ.
دەگەنمەن، تازا قولونەر ءتۇرىن قولداۋشىلار از. ەكولوگيالىق تازا ونىمگە كوپشىلىگى قىزىققانىمەن تاپسىرىس بەرۋشىلەر كوپ ەمەس.
شەبەر قازىر جەكە كاسىپكەردىڭ سۇرانىسىمەن جارنامالىق ەرتەگى باتىرىنىڭ ءمۇسىنىن ويىپ جاتىر.
قولىنان ونەر تامعان ەر ادام دەمەۋشىلەر تابىلسا قالاداعى بارلىق قۋراعان اعاشتاردان ەرتەگى كەيىپكەرى مەن قازاق باتىرلارىنىڭ مۇسىنىنە اينالدىرعىسى كەلەدى.
«قولداۋ تاپسا ەرتەگى كەيىپكەرلەرىمەن قالانى بەزەندىرگىم كەلەدى. قازاقتىڭ ەرتەگى كەيىپكەرلەرىمەن اعاشتان ورىندىقتار جاساۋ ويىمدا بار»، - دەيدى شەبەر.
