قازاقستاندىقتار قىركۇيەك ايىنىڭ ۇزدىك سپورتشىسىن تاڭداپ جاتىر
«قىركۇيەك ايى ءىرى سپورتتىق باسەكەلەرگە تولى بولدى. اسىرەسە، قازاقستاندىق جانكۇيەرلەر اسىعا كۇتكەن بوكس پەن كۇرەس تۇرلەرىنەن الەم چەمپيوناتتارىنىڭ اسەرى ەرەكشە. وتاندىق سپورتشىلار الەمدىك جارىستاردا نامىسقا تىرىسىپ، ەلىمىزدىڭ كوك بايراعىن جەلبىرەتتى. ءانۇرانىمىز شىرقالىپ، ابىرويىمىز ارتتى. وسى ورايدا، Olympic.kz ايدىڭ ۇزدىك سپورتشىسىن انىقتاۋعا كىرىستى» ، - دەلىنگەن كوميتەتتىڭ رەسمي سايتىندا.
ايتا كەتەيىك، ەلىمىزدىڭ ۇزدىك سپورتشىلارى سوڭعى بىرنەشە ايدا انىقتالىپ كەلەدى.
قازاقستاندىقتارعا داۋىس بەرۋ ءۇشىن قىركۇيەك ايىندا زور تابىسقا جەتكەن سپورتشىلاردىڭ ءتىزىمى ۇسىنىلىپ وتىر. داۋىستى Olympic.kz سايتىنىڭ باستى بەتىندە قالدىرۋعا بولادى. اياقتالاتىن ۋاقىتى - 9 - قازان، ساعات 13:00.
بەكزات نۇرداۋلەتوۆ، بوكس
رەسەي جەرىندە وتكەن بوكستان الەم چەمپيوناتى قازاق ەلىنە جاڭا جۇلدىز سىيلادى. 81 كەلىدە جۇدىرىقتاسقان بەكزات نۇرداۋلەتوۆ ءوز سالماعىندا قارسىلاس شىداتپاي، جەڭىسكە جەتتى. الەمدىك سىندا التى كەزدەسۋ وتكىزىپ، بارلىعىنان باسىم تۇسكەن بەكزات كوپشىلىكتىڭ سۇيىكتى سپورتشىسىنا اينالىپ ۇلگەردى. ول الەم بىرىنشىلىگىندە باسقانى ەمەس، ايگىلى كۋبالىق بوكسشى، ءتورت دۇركىن الەم چەمپيونى، وليمپيادا ويىندارىنىڭ جەڭىمپازى حۋليو سەزار لا كرۋزدى جەڭىپ، كوزگە ءتۇستى. ودان بولەك، بىرىنشىلىك بارىسىندا ءتورت نوكداۋن تىركەدى. فينالدا وزبەكستاندىق دىلشودبەك رۋزمەتوۆتى تازا جەڭگەن نۇرداۋلەتوۆ ايدىڭ ۇزدىك سپورتشىسى اتانۋدان ءۇمىتتى.
قامشىبەك قوڭقابايەۆ، بوكس
بوكستان قازاقستان كومانداسىنىڭ كاپيتانى دا الەم چەمپيوناتىنان قۇر قايتقان جوق. قامشىبەك قوڭقابايەۆ اسا اۋىر سالماقتا فينالعا جەتىپ، اقتىق سىندا وزبەكستاندىق ءباحادۇر جالولوۆتان ۇتىلدى. قامشىبەككە قارسىلاسىنىڭ سالماعى الدەقايدا اۋىر، بويى بيىك بولعانى ىڭعايسىزدىق تۋدىرعانى راس. دەگەنمەن، قازاق بوكسشىسى ايانىپ قالعان جوق. ءوز سالماعىندا اۋەسقوي بوكستاعى ۇزدىكتەردىڭ ءبىرى ەكەنىن تاعى دا دالەلدەدى.
داۋلەت نيازبەكوۆ، ەركىن كۇرەس
نۇر- سۇلتان ءتورىن دۇبىرگە بولەگەن كۇرەس تۇرلەرىنەن الەم چەمپيوناتىندا قازاق بالۋاندارى ۇلكەن ەرلىك كورسەتتى. الەمدىك دودادا اقتىق سىنعا دەيىن سۇرىنبەي، ازۋلى قارسىلاستارىنان باسىم تۇسكەن بالۋانداردىڭ ءبىرى - داۋلەت نيازبەكوۆ. داۋلەت الەم چەمپيوناتىنىڭ «كۇمىسىن» يەلەنىپ قانا قويماي، 65 كەلى سالماق دارەجەسىندە 2020 -جىلعى توكيو وليمپياداسىنا ليتسەنزيا جەڭىپ الدى. ال جارتىلاي فينالدا الەمنىڭ ۇزدىك بالۋاندارىنىڭ ءبىرى، ءۇندىستاندىق بادجرانگ پۋنيانى جەڭدى.
نۇرعوجا قايپانوۆ، ەركىن كۇرەس
جاستار كومانداسىنان جاقىندا اۋىسىپ، ەرەسەكتەر اراسىنداعى العاشقى الەم چەمپيوناتىندا فينالعا جەتكەن نۇرعوجا قايپانوۆ كوپشىلىكتىڭ سۇيىكتى سپورتشىسىنا اينالىپ ۇلگەردى. ماماندار ەلوردا تورىندە اتوي سالعان قايپانوۆتىڭ بولاشاعىنان زور ءۇمىت كۇتىپ وتىر. نۇرعوجا نۇر- سۇلتانداعى الەم چەمپيوناتىندا تەك رەسەيلىك داۆيد بايەۆقا جول بەردى. دەگەنمەن، قايپانوۆتىڭ كۇرەسى كوپ جانكۇيەردىڭ كوڭىلىنەن شىققانى انىق.
حورلان جاقانشا، گرەك- ريم كۇرەسى
گرەك- ريم كۇرەسىنەن قازاقستان كومانداسىنىڭ مۇشەسى حورلان جاقانشا دا الەم بىرىنشىلىگىنە العاش رەت قاتىسقان بالۋان. «كلاسسيكتەر» دوداسىندا ەشكىمنەن تايسالماي، ءازىربايجاندىق چەمپيون ءازيزليدى دە التىننان قاقتى. ءبىراق فينالدا اسىعىستىق تانىتىپ، گرۋزيالىق قارسىلاسىنا ەسە جىبەردى. حورلاننىڭ كۇمىس مەدالى قازاقستاندىق گرەك- ريم كۇرەسى شەبەرلەرى ۇتىپ العان ەڭ جوعارعى جۇلدە.
يگور سون، اۋىر اتلەتيكا
تايلاندتىڭ پاتتايا قالاسىندا ءوتىپ جاتقان الەم چەمپيوناتىندا يگور سون كۇمىس جۇلدەگەر اتاندى. ول قازاقستان قورجىنىنداعى جالعىز مەدالدى جەڭىپ العان زىلتەمىرشى. 55 كەلى سالماقتا سىنعا تۇسكەن سون قوسسايىس قورىتىندىسى بويىنشا 266 كەلىنى (120+146) باعىندىردى.
