تاجىكستان پارلامەنتى قىتايعا كۇمىس كەنىشىن بەرۋدى ماقۇلدادى
بيلىك كۇمىس كەنىشىن يگەرەتىن قىتاي كومپانياسىن جەتى جىلعا سالىقتان بوساتتى.
ازاتتىقتىڭ تاجىك قىزمەتىنىڭ حابارلاۋىنشا، قىتاي كومپانياسىنا بەرىلەتىن «ياكچيلۆا» كۇمىس كەنىشى مۋرگاب اۋدانىندا، تەڭىز دەڭگەيىنەن 4500 مەتر جوعارىدا پامير تاۋىندا ورنالاسقان.
«ينۆەستور كەنىشتى يگەرىپ، قالدىق قويماسىن اشىپ، ەلەكتر لينيالارىن جۇرگىزۋگە 385 ميلليون سوموني جۇمسايدى. العاشقى ءۇش جىل جۇمىس ورىندارىنىڭ 60 پايىزىنا جەرگىلىكتى تۇرعىندار تارتىلادى، ودان كەيىن بۇل كورسەتكىش 80 پايىزعا دەيىن ۇلعايادى. ينۆەستور جۇمىسشىلاردىڭ بىلىكتىلىگىن ارتتىرۋعا جىلىنا 500 مىڭ سوموني جۇمسايدى» دەيدى تاجىكستاننىڭ مەملەكەتتىك ينۆەستيتسيا كوميتەتىنىڭ ءتوراعاسى فاررۋح حامراليزودا.
كەيبىر ساراپشىلاردىڭ پىكىرىنشە، تاجىك بيلىگى قىتاي كومپانياسىن جەتى جىلعا سالىقتان بوساتقانىمەن كۇمىس كەنىشىن تولىق بارلاۋعا ءۇش جىل جەتكىلىكتى. سوندىقتان بيلىك سالىقتان پايدا تابا الماۋى مۇمكىن.
«گەولوگيالىق بارلاۋ جۇمىستارى ءجۇرىپ جاتىر، سىناق رەتىندە كەنىشتى يگەرە باستادىق. ءبىر جىلدا 40 توننا كۇمىس وندىرەمىز. قازىر بارلانعان كۇمىس قورى 113 توننا» دەدى «كاشن سينيۋي دادي ماينينگ ينۆەستمەنت» كومپانياسىنىڭ ءتوراعاسى يۋان ين حۋ.
2019-جىلى تامىز ايىندا تاجىكستاننىڭ اينين اۋدانىنداعى التىن كەنىشىن تاجىك-قىتاي بىرلەسكەن كاسىپورنىنا بەرگەنى تۋرالى اقپارات شىققان. تاجىكستاندا التىننىڭ 80 پايىزدان استامىن وسىنداي بىرىككەن كومپانيالار وندىرەدى.
تاجىكستان ينۆەستيتسيا تارتۋ ءۇشىن عانا ەمەس، پەكيننەن العان قارىزىن وتەۋ ءۇشىن دە قىتايعا كەنىشتەرىن جالعا بەرۋگە ءماجبۇر. مىسالى، «دۋشانبە-2» جىلۋ ەلەكتر ستانتسياسىن سالۋ ءۇشىن بيلىك قىتايعا «ۆەرحنيي كۋمارگ» التىن كەنىشىن بەلگىسىز مەرزىمگە جالعا بەرگەن.
«ازاتتىق»
