«توميريس» فيلمىنىڭ قازاق تىلىندەگى نۇسقاسى كورسەتىلە باستادى
بۇل تۋرالى فيلمنىڭ رەجيسسەرى اقان ساتايەۆ ءوزىنىڭ Instagram پاراقشاسىندا جازدى.
«دوستار، بۇگىننەن باستاپ، «توميريس» فيلمىنىڭ تولىق قازاقشا نۇسقاسىن ءبىزدىڭ «مەلومان» ديستريبيۋتور كومپانيامىز كينوتەاترلارعا تاراتا باستادى. كينومىزدىڭ قازاقشا نۇسقاسىن كۇتىپ قالعاندارىڭىز ءۇشىن، شىن جۇرەگىمىزدەن كەشىرىم سۇرايمىز»، - دەپ جازدى رەجيسسەر.
ايتا كەتەيىك، الەۋمەتتىك جەلى قولدانۋشىلارى تۋىندىنىڭ تەك قانا ورىس تىلىندە ءجۇرىپ جاتقانىن ايتىپ، قازاق كينوسىنىڭ قازاق تىلىندە كورسەتىلمەۋىنە نارازىلىق بىلدىرگەن ەدى.
رەجيسسەر فيلمنىڭ قازاق تىلىندە دىبىستالعان نۇسقاسى بار ەكەنىن، تيترلەردى لاتىن الىپبيىندە جازعاندا گرامماتيكالىق قاتەلەر كەتكەنىن ءتۇسىندىردى .
«توپ مۇشەلەرى مەن اكتەرلەردىڭ اتى-ءجونى قۇجاتقا سايكەس كەلمەۋىنە بايلانىستى كەشىكتىرىلىپ جاتىر. قۇقىقتىق تۇرعىدان ءبىز كارتينانى مۇنداي قاتەلەرىمەن كورسەتىلىمگە جىبەرە المايمىز. شۇعىل تۇردە اتالمىش ماسەلەنى شەشىپ جاتىرمىز»، - دەدى ا. ساتايەۆ.
تاريحي درامادا كىشكەنتاي توميريستىڭ ساق پاتشايىمى لاۋازىمىنا دەيىنگى ءومىر جولى كورسەتىلەدى. وندا ساق تايپالارىنىڭ پارسى پاتشاسى كيرگە قارسى جورىعى كورىنىس تاپقان جانە كەيىپكەرلەر ەجەلگى تۇركى، ەجەلگى پارسى تىلدەرىندە سويلەيدى.
وعان ەلىمىزدىڭ تانىمال كينوجۇلدىزدارى ديماش احيموۆ، ەرىك جولجاقسىنوۆ، بايكەنجە بەلبايەۆ، بەرىك ايتجانوۆ، ەركەبۇلان دايىروۆ، مۇرات بيسەمبين، ازامات ساتىبالدى، ءادىل احمەتوۆ، ايجان لايدجي، ايان وتەپبەرگەن، اسىلحان تولەپوۆ، اسحات ۇرپەكوۆتەر تۇسكەن.
فيلم 27 -قىركۇيەكتە پروكاتقا شىقتى.
اۆتور: ايجان سەرىكجان قىزى
