نۇر- سۇلتاندا ءتىل جاناشىرلارى ماراپاتتالدى
«ەلوردادا جىل سايىن قىركۇيەك ايىندا قالالىق ءتىل فەستيۆالى جاريالانىپ، ونىڭ اياسىندا دارىستەر، مادەني شارالار وتكىزىلەدى. ونداعى باستى ماقسات - رۋحاني بايلىعىمىزدى ۇرپاققا جەتكىزۋ، ءتىل ارقىلى وتانسۇيگىشتىكتى دامىتۋ. اۋقىمدى شارا «مەنىڭ ءتىلىم - ۇلى دالا رۋحى» دەپ اتالىپ، بيىل 21-رەت ۇيىمداستىرىلدى. سول شارا اياسىندا «مەملەكەتتىك ءتىل - ۇلت تىرەگى» دوڭگەلەك ۇستەل وتىرىسى، «ەلتانىم» رۋحاني- تانىمدىق جوباسى، «ءتىل - امانات» جالپى قالالىق اكسياسى، «وي- زەرەك» ينتەللەكتۋالدىق ءتىل سايىسى، «قازاق ءتىلىن وقىتۋ ادىستەمەسى، بولاشاعى مەن وزەكتى ماسەلەلەرى» اتتى عىلىمي- تاجىريبەلىك كونفەرەنتسيالارى ۇيىمداستىرىلدى.
«ازات ەلگە امانات تۋعان ءتىلىم» جاس اقىندار ءمۇشايراسى، «لاتىن گرافيكاسىندا وقۋ- جازۋ داعدىلارىن قالىپتاستىرۋ» سەمينار- كۋرستارى سىندى 300 گە جۋىق ءىس- شارا بارلىق ءبىلىم وشاقتارىندا وتكىزىلدى» ، - دەدى نۇر- سۇلتان قالاسى اكىمىنىڭ ورىنباسارى باقتيار ماكەن «مەنىڭ ءتىلىم - ۇلى دالا رۋحى» قالالىق ءتىل فەستيۆالىندە.
ونىڭ ايتۋىنشا، ەلوردا اكىمى التاي كولگىنوۆتىڭ تاپسىرماسىمەن جىل سوڭىنا دەيىن قالالىق مەكەمەلەردىڭ اتاۋلارى لاتىن گرافيكاسىنا اۋىستىرىلادى. بۇعان اكىمدىك قولعابىس ەتەتىن بولادى.
فەستيۆالدە «ءتىل تۋرالى» زاڭنىڭ قابىلدانعانىنا 30 جىل تولۋىنا وراي، ق ر پرەزيدەنتى قاسىم- جومارت توقايەۆتىڭ العىس حاتىمەن بەكجان ءابدۋالي ۇلى جانە كەنجەگۇل تەرگەمبايەۆا ماراپاتتالدى.
سونىمەن بىرگە، الدان سمايىل، ەردەن قاجىبەك، انۋاربەك ەرالى، نۇرلان اسقاروۆ، ارنۇر ىسقاق، الماس سىرعاباي ، ۆلاديسلاۆ تەن جانە الەكسەي شەگايعا نۇر- سۇلتان قالاسى اكىمىنىڭ «ءتىل تۇعىرى» قۇرمەت ماراپاتى تابىستالدى.
