تۇركىستاندا بەكزات ساتتارحانوۆ تۋرالى فيلمنىڭ تۇساۋى كەسىلدى
«حابار» اگەنتتىگىنىڭ تاپسىرىسىمەن تۇسىرىلگەن تۋىندى سيدنەي وليمپياداسىنىڭ چەمپيونى، جاسىنداي جارق ەتكەن جۇلدىز، بوكسشى بەكزات ساتتارحانوۆقا ارنالعان، دەپ حابارلايدى قازاقپارات ءتىلشىسى.
كارتينانىڭ تۇساۋكەسەرىندە ءسوز العان «حابار» اگەنتتىگى ا ق باسقارما ءتوراعاسىنىڭ ءبىرىنشى ورىنباسارى رينات كەرتايەۆ جەر جاھانعا 20 جاسىندا ءوز ەلىنىڭ اتىن تانىتىپ كەتكەن ب. ساتتارحانوۆ بارلىق يگى ءىلتيپاتقا لايىق ەكەنىن اتاپ ءوتتى.
«جاسىنداي جارق ەتكەن جاس عۇمىردىڭ ەرتە ۇزىلگەنى قاي- قايسىمىزدىڭ دا قابىرعامىزدى قايىستىردى. بەكزاتتاي باتىردىڭ بولمىسىن بۇگىنگى ۇرپاقتىڭ جادىنا جەتكىزۋ، بۇگىنگى ۇرپاق ساناسىنا ءسىڭىرۋ - بارشامىزدىڭ پارىزىمىز. سوندىقتان دا، «حابار» اگەنتتىگى، سيدنەي وليمپياداسىنىڭ چەمپيونى، بەلگىلى بوكسشى - بەكزات ساتتارحانوۆ تۋرالى تۇڭعىش اۆتوبيوگرافيالىق «بەكزات» دراماسىن تاسپالاۋدى ۇيعاردى. ماقساتىمىز - ەرتە سونگەن جۇلدىزدىڭ ساناۋلى عۇمىرىنداعى جىگەرلى جەتىستىكتەرىن، قايتپاس قايسارلىعىن، ۇلتجاندىلىعى مەن نامىسقويلىعىن كورسەتۋ ارقىلى بۇگىنگى جاس ۇرپاقتى رۋحتاندىرۋ، جاس سپورتشىلارىمىزعا بۇقارالىق سالاۋاتتى ءومىر سالتىن ناسيحاتتاۋ بولىپ تابىلادى» ، - دەدى ول.
فيلمنىڭ العاشقى كورسەتىلىمىنە، سونداي- اق داڭقتى سپورتشىنىڭ اتا- اناسى، تۋىستارى قاتىستى.
«20 جاس عۇمىرىندا قولىنان كەلگەنشە ەلىنە بارلىق كۇش- جىگەرىن بەرىپ كەتتى. بەكزاتقا قانداي ماراپات، قانداي كينو شىعارسا دا ارتىق بولماس. بەكزاتتى جاستاردىڭ الدىنا ۇلگى ەتىپ قويسا.. . ونىڭ يماندىلىعى، ۇلكەندى سىيلاۋى، قازاقىلىعى، بىربەتتىلىگى، العا قويعان ماقساتىن ورىندايتىن مىنەزى قازىرگى قازاق جاستارىنا كەرەك» ، - دەدى مارقۇم سپورتشىنىڭ اكەسى سەيىلحان ساتتارحانوۆ.
تۋىندى سيۋجەتىندە بوكسشى ءومىرىنىڭ ءۇش كەزەڭى قامتىلادى: بالالىق شاعى، بوز بالا كەزەڭى جانە ءومىرىنىڭ سوڭعى ءساتى. 90-جىلداردىڭ باسىنداعى قيىن- قىستاۋ زامانعا تاپ كەلگەن بەكزاتتىڭ بالالىعى كوپ قيىندىقتارمەن وتەدى. تۇركىستان قالاسىنداعى تەمىر جولدى بويلاي ورنالاسقان شاعىن اۋىلدىڭ قاراپايىم تىرشىلىگى بالا بەكزاتتىڭ كوزىمەن بەينەلەنەدى. ونىڭ ارمانى، نامىسقوي ءبىتىمى ءاربىر ساتتە سىنالىپ وتىرادى.
بىردە اتا- اناسى بەكزاتتى كۇرەسكە قاتىسسىن دەپ باپكەرگە اپارادى. وندا ول سەرگەكتىگىمەن كوزگە تۇسەدى. دەگەنمەن كۇرەسكە قاتىسقان بالانىڭ بويى وسپەي قالادى دەگەن تۇسىنىكپەن ونى بوكسقا اۋىستىرادى. باپكەرىمەن تانىسقان كۇننەن باستاپ، بۇل سپورت تۇرىنە ەرەكشە ماحابباتى اشىلادى. كۇن سايىن ەرىنبەي جاتتىعىپ، العاش رەت تۇركىستاندا وتكەن سايىستا جارقىراپ كورىنەدى. بوز بالا شاعىندا گەرمانيادا وتكەن تۋرنيردە توپ جارىپ، باپكەرلەر وليمپياداعا دايارلاۋ جاتتىعۋلارىنا قابىلدايدى. 1999 -جىلى تاشكەنتتە وتكەن بۇكىل ازيا بىرىنشىلىگىندە كۇمىس جۇلدەگە يە بولىپ، وليمپيادا ويىندارىنا جولداما الادى. سولاي، 2000 -جىلى سيدنەيدە تارتىستى ويىندار وتكىزىپ، التىن مەدالعا يە بولادى.
كارتينانىڭ رەجيسسەرى - مۇرات بيدوسوۆ، سەنارييىن سەرجان زاكەر ۇلى جازعان.
فيلمنىڭ ءتۇسىرىلىم جۇمىستارى تۇركىستان، الماتى جانە ىستانبۇل قالالارىندا وتكەن. باستى ءرولدى جاس اكتەر سامات ءازىمقۇلوۆ وينايدى. ول 2006-2007 -جىلدارى كيكبوكستان جاستار اراسىندا ەكى رەت قازاقستان چەمپيونى بولعان. سونىمەن قاتار تۋىندىدان عالىمبەك وسپانوۆ، مۇرات جارىلقاسىنوۆ، مايرا ماقۇلبەكوۆا، دۋلىعا اقمولدا، قۋانىش مۇقاتاي، باقداۋلەت شايماحان جانە باسقا اكتەرلەردى كورۋگە بولادى.
تولىق مەتراجدى كارتينا 3 - قازاننان باستاپ ەلىمىزدىڭ بارلىق كينوتەاترلارىندا كورسەتىلەدى.
