قازاقستاندا ەت، كوكونىس، جۇمىرتقا باعاسى قىمباتتادى

ساراپشىلاردىڭ ەسەبىنشە، قىركۇيەكتە قىرىققابات پەن قياردىڭ باعاسى تامىز ايىمەن سالىستىرعاندا شامامەن 15 پايىزعا وسكەن. ال سارىمساق 7,3 پايىزعا، ۇرمەبۇرشاق 1,7 پايىزعا قىمباتتاپتى.

بۇل ورايدا پياز (ءبىر ايدا 25,2 پايىزعا)، ءسابىز (22,8 پايىزعا)، قىزىلشا (9 پايىزعا)، كارتوپ (8,2 پايىزعا) ءتارىزدى ماۋسىمدىق كوكونىستەر باعاسى ارزانداعان. ال قىزاناق باعاسى نەبارى 1,4 پايىزعا تومەندەگەن. ەندىگى ولاردىڭ دا باعاسى ءوسۋى مۇمكىن.

جەمىستەر اراسىندا اپەلسين باعاسى بىردەن 4,3 پايىزعا ايتارلىقتاي قىمباتتاپتى. ال بانان، كەرىسىنشە، 2,8 پايىزعا ارزانداعان.

قىركۇيەكتە جانۋارلاردان الىناتىن ونىمدەر اراسىندا جۇمىرتقا بىردەن قىمباتتادى. ونىڭ باعاسى 6,1 پايىزعا وسكەن. سونىمەن قاتار مۇزداتىلعان بالىق 2,3 پايىزعا، سيىر ەتى 2,1 پايىزعا، جىلقى ەتى 2 پايىزعا وسكەن.

ءداندى داقىلدار اراسىندا بيداي 3,1 پايىزعا جانە كۇرىش 2,2 پايىزعا قىمباتتاعان.

ال سۋسىندار مەن باكالەيا تاۋارلارىنىڭ اراسىندا باعانىڭ جوعارىلاۋى بايقالمادى. مىسالى، قانت ءبىر ايدا 4,6 پايىزعا ارزانداپتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى